ខេត្តបាត់ដំបង ៖ បន្ទាប់ពីតាមប្រមាញ់យ៉ាងក្ដៅគគុក កម្លាំងជំនាញការិយាល័យព្រហ្មទណ្ឌកំរិតស្រាលនៃស្នងការខេត្ត ក៏បានឈានដល់ការឃាត់ខ្លួនបក្សពួកចោរដៃស្អិត(ចោរឆក់)ម្នាក់ទៀត នៅម៉ោង១០ និង២៥នាទីព្រឹកថ្ងៃទី២៦ មីនា នេះ ខណ:ពេលជនសង្ស័យរូបនេះកំពុងសំងំក្នុងផ្ទះរបស់ខ្លូន ស្ថិតនៅភូមិអូរតាគាំ២ សង្កាត់ទួលតាឯក ក្រុងបាត់ដំបង ។ នេះបើតាមការផ្ដល់ព័ត៌មានបឋមរបស់សមត្ថកិច្ចជំនាញ ។ គួររំលឹកថា៖ គេចបាន១០ថ្ងៃដែរ…លោកបងចោរ
ជនសង្ស័យរូបនេះ មានឈ្មោះហ៊ន សុគន្ធិន ហៅថិន អាយុ៣៣ឆ្នាំ មានមុខរបរ«ចោរឆក់» រស់នៅក្នុង
ភូមិ-ឃុំខាងលើ ។ បើតាមសមត្ថកិច្ចបានឱ្យដឹងថា ជននេះ ជាបក្សពួករបស់ឈ្មោះសេង វិចិត្រ ដែលកម្លាំងអធិការក្រុងបាត់ដំបង បានឃាត់ខ្លួនកាលពីម្សិលមិញ ដែលជាប់ពាក់ព័ន្ធ រួមគំនិតជិះម៉ូតូធ្វើសកម្មភាព
«ឆក់កាបូប»ជនបរទេសចំនួន២លើកផ្ទូនៗ កាលពីជាងមួយសប្ដាហ៍មុន នៅក្នុងក្រុងបាត់ដំបង ។
សូមបញ្ជាក់ថា យោងតាមរបាយការណ៍បឋមរបស់សមត្ថកិច្ចបានឱ្យដឹងទៀតថា ជនដៃដល់ឈ្មោះសេង វិចិត្រ ដែលចាប់ខ្លួនបាន កាលពីថ្ងៃទី២៥ មីនា និងឈ្មោះហ៊ន សុគន្ធិន ហៅថិន ដែលសមត្ថកិច្ចទើបចាប់ខ្លួនបាន នៅព្រឹកថ្ងៃទី២៦ មីនា នេះ ត្រូវកម្លាំងជំនាញកំណត់ថា ជាមុខសញ្ញាដែលធ្វើសកម្មភាព
«ឆក់កាបូប»ជនបរទេសចំនួន២លើកជាបន្តបន្ទាប់ កាលពីជាងមួយសប្ដាហ៍មុននៅសង្កាត់ចំការសំរោង និងសង្កាត់ព្រែកព្រះស្ដេច ក្នុងក្រុងបាត់ដំបង ។ នៅក្នុងហេតុការណ៍នោះ ជនរងគ្រោះបានបាត់បង់លុយ ទូរស័ព្ទ, ប៉ាស្ព័រ និងឯកសារផ្ទាល់ខ្លួនមួយចំនួនទៀតផង ។
ទោះយ៉ាងណា បើតាមសមត្ថកិច្ចបានឲ្យដឹងមុននេះថា ជាមួយនឹងការឃាត់ខ្លួនបក្សពួកម្នាក់ទៀតនេះ កម្លាំងជំនាញដកហូតបានវត្ថុតាងមួយចំនួនហើយ ។ ពេលនេះ កម្លាំងជំនាញកំពុងស្វែងរកវត្ថុតាងមួយចំនួនទៀត ដែលក្រុមចោរដៃស្អិតនេះយកទៅលក់ ឬលាក់ទុក ។
ចែករំលែកព័តមាននេះ