រាជធានីភ្នំពេញ ៖ ជនសង្ស័យម្នាក់ធ្វើសកម្មភាពលួចម៉ូតូបានសម្រេចហើយ ពេលជិះគេចខ្លួនស្រាប់តែជួបម្ចាស់កំពុងដើររកក៏ស្រែកចោរៗផ្អើលប្រជាពលរដ្ឋដេញតាមចាប់ពីក្រោយ ដោយមើលសភាពការណ៍មិនស្រួលក៏ផ្តួលម៉ូតូចោល រួចរត់គេចខ្លួនបាត់តែម្តង បង្កឱ្យមានការភ្ញាក់ផ្អើកាលពីម៉ោង៦ព្រលប់ ថ្ងៃទី១៧ ខែវិច្ឆិកា ឆ្នាំ២០១៨ ស្ថិតនៅភូមិទ្រុងមាន់ សង្កាត់អូរបែកក្អម ខណ្ឌសែនសុខ។
ម្ចាស់ម៉ូតូខាងលើមានឈ្មោះ ស្វាយ ច័ន្ទកន្និដ្ឋា អាយុ២៥ឆ្នាំ ភេទស្រី មុខរបរបុគ្គលិកក្រុមហ៊ុនឯកជន ស្នាក់នៅភូមិទ្រុងមាន់ សង្កាត់អូរបែកក្អម ខណ្ឌសែនសុខ ចំណែកម៉ូតូដែលចោរលួចមិនបានសម្រេចខាងលើម៉ាក ZOOMER X ពណ៌ខ្មៅលាយទឹកក្រូច ពាក់ស្លាកលេខ ភ្នំពេញ1GL-4274។
បើតាមម្ចាស់ម៉ូតូឲ្យដឹងថា មុនកើតហេតុក្រោយត្រឡប់មកពីធ្វើការវិញ បានទុកម៉ូតូនៅជាន់ខាងក្រោមក្បែរជណ្តើរផ្ទះដូចសព្វដង ហើយឡើងទៅបន្ទប់ជាន់ទី១ដើម្បីងូតទឹក ពេលចុះមកវិញគោលបំណងទៅទិញបាយហូប ស្រាប់តែមិនឃើញម៉ូតូ ពេលនោះគាត់ចេញមករកមើលនៅតាមផ្លូវ២០០៤ ស្រាប់តែជនសង្ស័យម្នាក់កំពុងជិះម៉ូតូរបស់គាត់ ពេលឃើញដូចនោះគាត់បានស្រែក «ចោរលួចម៉ូតូៗ» ។ ពេលនោះមានអ្នករត់ម៉ូតូឌុបក្បែនោះឃើញក៏នាំគ្នាដេញតាមពីក្រោយ រហូតបានមួយគីឡូដី ទើបជនសង្ស័យផ្តួលម៉ូតូចោល ហើយរត់គេចខ្លួនបាត់។
ក្រោយហេតុការណ៍កើតឡើងសមត្ថកិច្ចមូលដ្ឋានបានចុះដល់កន្លែងកើតហេតុភ្លាមៗ និងបានយកម៉ូតូ និងម្ចាស់មកធ្វើការសាកសួរនៅប៉ុស្តិ៍ និងឱ្យម្ចាស់ម៉ូតូដាក់ពាក្យបណ្តឹងតែម្តង ដើម្បីកំណត់មុខសញ្ញាជនសង្ស័យងាយស្រួលធ្វើការស្រាវជ្រាវពេលក្រោយ ៕
ចែករំលែកព័តមាននេះ