រាជធានីភ្នំពេញ ៖ ជនរងគ្រោះ៣នាក់ ក្នុងនោះស្ត្រី២នាក់ជិះម៉ូតូ MSX ដើរលេងសុខៗក៏ត្រូវជនសង្ស័យ៣នាក់ធ្វើសកម្មភាពឆក់កាបូបស្ពាយពីអ្នកអង្គុយពីក្រោយបានសម្រេច អស់លុយខ្មែរ១លានរៀល និងលុយដុល្លារចំនួន300$ ហេតុការណ៍នេះបានកើតឡើងកាលពី ម៉ោង២និង៣០នាទី រំលងអធ្រាត្រឈានចូលថ្ងៃទី១៨ ខែតុលា ឆ្នាំ២០១៨ តាមបណ្តោយផ្លូវ២១៧ នៅចំណុចក្បែរនឹងស្តុបអូតែលស ស្ថិតក្នុងសង្កាត់ផ្សារថ្មី២ ខណ្ឌដូនពេញ ។
តាមប្រភពព័ត៌មានពីជនរងគ្រោះសុំមិនបញ្ចេញឈ្មោះបានឱ្យដឹងថា មុនកើតហេតុពួកគេជិះម៉ូតូមួយគ្រឿងគ្នា៣នាក់ ប្រុសម្នាក់ និងស្រី២នាក់ ដោយជិះម៉ូតូម៉ាក MSX ពណ៌ស បើកបរមកតាមបណ្តោយផ្លូវ២១៧ ក្នុងទិសដៅពីកើតទៅលិច ។
ជនរងគ្រោះបន្តថា ខណៈពេលបើកមកដល់ចំណុចកើតហេតុខាងលើនេះ ស្តុបអូតែលស ក៏ស្រាប់តែលេចមុខជនសង្ស័យ៣នាក់ ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ មិនចាំស្លាកលេខ បើកស្របទិសដៅគ្នាក្នុងទិសដៅពីកើតទៅលិចជិះមកជិត រួចក៏ធ្វើសកម្មភាពឆក់កាបូបពីជនរងគ្រោះអង្គុយពីក្រោយបានសម្រេច ហើយបើករត់គេចខ្លួនបាត់ស្រមោល។
ភ្លាមៗនោះជនរងគ្រោះក៏ស្រែកថា «ចោរៗ» និងជិះម៉ូតូដេញតាម ប៉ុន្តែតាមអត់ទាន់ ។ ហើយនៅក្នុងកាបូបនោះមានលុយខ្មែរ១លានរៀល និងលុយដុល្លារចំនួន300$ អត្តសញ្ញាណប័ណ្ឌ១ និងលិខិតឆ្លងដែន 1 ។
ក្រោយពេលកើតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋផ្សារថ្មី២ដើម្បីឱ្យសមត្ថកិច្ចតាមចាប់ជនសង្ស័យមកផ្តន្ទាទោសទៅតាមផ្លូវច្បាប់ ៕
ចែករំលែកព័តមាននេះ