រាជធានីភ្នំពេញ ៖ បុរសម្នាក់ក្នុងចំណោម២នាក់ ខណៈជិះម៉ូតូចេញពីផ្ទះគោលបំណងទៅញ៉ាំបាយឆា លុះជិះដល់ពាក់កណ្ដាលផ្លូវ ក៍ស្រាប់តែមានក្រុមជនសង្ស័យមានគ្នា៦ទៅ៧នាក់ បានធ្វើសកម្មភាពកាប់ប្លន់យកបានទូរសព្ទ័មួយគ្រឿងដោយសុវត្ថិភាព និងធ្វើឱ្យជនរងគ្រោះ រងរបួសផងដែរ ហេតុការណ៍នេះ បានកើតឡើងកាលពីវេលាម៉ោង១១យប់ថ្ងៃទី២៧ ខែឧសភា ឆ្នាំ២០១៨ ស្ថិតនៅចំណុចផ្លូវ៤៣២ កែងនឹងផ្លូវលេខ១៦៣ សង្កាត់ទួលទំពូង១ ខណ្ឌចំការមន ។
ជនរងគ្រោះឈ្មោះ អា រ៉ាវី ភេទប្រុស អាយុ១៩ឆ្នាំ មុខរបរបុគ្គលិកក្រុមហ៊ុនឯកជន ស្នាក់នៅផ្ទះជួល សង្កាត់បឹងសាឡាង ខណ្ឌទួលគោក ចំណែកម្នាក់ទៀតដែលជាអ្នករួមដំណើរ មិនបានឱ្យដឹងឈ្មោះឡើយ ហើយទូរសព្ទ័ដែលជនសង្ស័យប្លន់យកទៅគឺម៉ាក iphone 6 plus ។
តាមសម្តីជនរងគ្រោះបានឱ្យដឹងថា មុនពេលកើតហេតុ រូបគេ និងអ្នករួមដំណើរម្នាក់ទៀតបានជិះ
ម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ ២០១៨ ពណ៌ខ្មៅ ចេញពីផ្ទះគោលបំណងទៅញ៉ាំបាយឆានៅម្តុំស្តុបទួលទំពូង ដោយបានធ្វើដំណើរតាមផ្លូវ៤៣២ ក្នុងទិសដៅពីលិចទៅកើត ខណៈមកដល់ចំណុចកើតហេតុ កែងនឹងផ្លូវលេខ១៦៣ ជិតផ្សារទួលទំពូង ក៍ស្រាប់តែក្រុមជនសង្ស័យមានគ្នាប្រហែល៦ទៅ៧នាក់ បានជិះម៉ូតូចំនួន៣គ្រឿង ក្នុងនោះមានម៉ាកហុងដាឌ្រីម, ហ្ស៊ុយស៊ុយគីនិច និងហ្ស៊ុយស៊ុយគីលែត មិនចាំស្លាកលេខបានធ្វើសកម្មភាពយកដាវមកកាប់លើរូបគេ បណ្តាលឱ្យរងរបួសរយះដៃទាំងសង្ខាង ហូរឈាម ចំណែកមិត្តភក្តិរបស់គេម្នាក់ទៀតដែលជាអ្នករួមដំណើរ បានរត់គេចរួច ។
ជនរងគ្រោះបានបន្តទៀតថា បន្ទាប់ពីក្រុមជនសង្ស័យកាប់មកលើ រូបគេហើយ ក៍ស្រាប់តែរថយន្តមួយគ្រឿង បើកឆ្លងកាត់ទីនោះបានឃើញហេតុការណ៍ ក៍បានចុចស៊ីផ្លេដាក់ពួកក្រុមជនសង្ស័យទាំងនោះ ទើបធ្វើអោយក្រុមជនសង្ស័យទាំងនោះភ័យ ក៍បានជិះគេចខ្លួនអស់ ដោយបានដណ្តើមយកទូរសព្ទ័របស់គេម៉ាក iphone 6plus យកទៅបាត់ ។ បន្តិចក្រោយមក រូបគេបានជិះម៉ូតូទៅអោយសមត្ថកិច្ចប៉ុស្តិ៍នគរបាលទំនប់ទឹកជួយអន្តរាគមន៍ តែដោយសារតែករណីនេះមិនមែនកើតហេតុនៅទឹកដីប៉ុស្តិ៍ទំនប់ទឹក គឺកើតហេតុនៅទឹកដីប៉ុស្តិ៍នគរបាលទួលទំពួង១ ទើបសមត្ថកិច្ចបានប្រាប់ជនរងគ្រោះ ទៅដាក់ពាក្យបណ្តឹងនៅ
ប៉ុស្តិ៍នគបាល ទួលទំពូង១វិញ ។
ក្រោយពេលកើតហេតុ ដោយសារតែជនរងគ្រោះរងរបួសហូរឈាម ទើបជនរងគ្រោះបានទៅមន្ទីរពេទ្យ ដើម្បីព្យាបាលរបួស នឹងទៅដាក់ពាក្យបណ្តឹងតាមក្រោយ ៕
ចែករំលែកព័តមាននេះ