រាជធានីភ្នំពេញ ៖ នគរបាលនាយកដ្ឋានព្រហ្មទណ្ឌក្រសួងមហាផ្ទៃ កាលពីរសៀលថ្ងៃទី១៥ ខែមីនា ឆ្នាំ២០១៨ បានបញ្ជូនជនជាតិម៉ាឡេស៊ីម្នាក់ទៅកាន់សាលាដំបូងរាជធានីភ្នំពេញ ពាក់ព័ន្ធករណីស៊ីដាច់ប្រាក់ជនជាតិជប៉ុន២៩នាក់ លើសាច់ប្រាក់ប្រមាណជិត២លានដុល្លារអាមេរិក ។…
រាជធានីភ្នំពេញ ៖ នគរបាលនាយកដ្ឋានព្រហ្មទណ្ឌក្រសួងមហាផ្ទៃ កាលពីរសៀលថ្ងៃទី១៥ ខែមីនា ឆ្នាំ២០១៨ បានបញ្ជូនជនជាតិម៉ាឡេស៊ីម្នាក់ទៅកាន់សាលាដំបូងរាជធានីភ្នំពេញ ពាក់ព័ន្ធករណីស៊ីដាច់ប្រាក់ជនជាតិជប៉ុន២៩នាក់ លើសាច់ប្រាក់ប្រមាណជិត២លានដុល្លារអាមេរិក ។ ជនសង្ស័យឈ្មោះ WOO KEE MUN ហៅ Woo Clemen ភេទប្រុស អាយុ៤៦ឆ្នាំ ជនជាតិម៉ាឡេស៊ី កាន់លិខិតឆ្លងដែនលេខ A24080192 A28365413 ចុះថ្ងៃទី១៨ ខែមីន ឆ្នាំ២០១១ និងកាន់អត្តសញ្ញាណប័ណ្ណសញ្ជាតិខ្មែរ លេខ០១០៨៩០៨១៨ មានទីលំនៅផ្លូវលេខ៥៩៨ សង្កាត់ឃ្មួញ ខណ្ឌសែនសុខ រាជធានីភ្នំពេញ ។
លោកវរសេនីយ៍ឯក ជាវ វិបុល ប្រធានការិយាល័យនគរបាលព្រហ្មទណ្ឌកម្រិតធ្ងន់ក្រសួងមហាផ្ទៃ បានឲ្យដឹងថា ការឃាត់ខ្លួនជនជាតិម៉ាឡេស៊ីខាងលើនេះ គឺជាការអនុវត្តន៍តាមដីកាបញ្ជាឲ្យចូលខ្លួនរបស់លោកស្រី ស៊ឺ វណ្ណនី ព្រះរាជអាជ្ញារងអមសាលាដំបូងរាជធានីភ្នំពេញ ចុះថ្ងៃទី១៥ ខែមីនា ឆ្នាំ២០១៨ ។ ដើមចមរឿងនេះ ត្រូវបានលោក ណាច ទ្រី មេធាវីតំណាងឲ្យដើមបណ្ដឹង បានទម្លាយឲ្យដឹងថា កាលពីពេលថ្មីៗនេះ ឈ្មោះ Woo Keep Mun បានលួងលោមពាណិជ្ជករជនជាតិជប៉ុន២៩នាក់ ឲ្យចូលមកបោះទុនវិនិយោគលើវិស័យកសិកម្ម ដាំដំណាំម្រេច និងស្វាយ នៅតាមបណ្ដាខេត្តមួយចំនួន ដោយជនសង្ស័យបានដឹកម្ចាស់ទុនវិនិយោគដើរទៅមើលចម្ការម្រេច ចម្ការស្វាយ តាមបណ្ដាខេត្តជាច្រើនកន្លែង ថែមទាំងបានបង្ហាញផែនការវិនិយោគលើវិស័យដាំដុះនេះ យ៉ាងស្ទាត់ជំនាញ ធ្វើឲ្យម្ចាស់ទុន២៩នាក់ជឿទុកចិត្ត ហើយក៏បានកក់ប្រាក់បណ្ដាក់ទុនចូលមកជាបន្តបន្ទាប់រហូតដល់មានទឹកប្រាក់សរុបប្រមាណជិត២លានដុល្លារអាមេរិក ។
មេធាវីបន្តទៀតថា ក្រោយពេលបានទទួលប្រាក់ហើយ ស្រាប់តែមិនឃើញឈ្មោះ Woo Kee Mun ធ្វើសកម្មភាពវិនិយោគដូចតាមផែនការដែលនិយាយគ្នានោះទេ ជាហេតុធ្វើឲ្យម្ចាស់ទុនទាំង២៩នាក់ មានការសង្ស័យក៏ចុះទៅដល់ចម្ការម្រេច ចម្ការស្វាយដែល ឈ្មោះ Woo Kee Mun ចង្អុលបង្ហាញនោះ ស្រាប់តែម្ចាស់ចម្ការពិត ចេញមុខមកបដិសេធទើបម្ចាស់ទុនវិនិយោគភ្ញាក់ខ្លួនដឹងថា ចាញ់បោកជនសង្ស័យ ទើបបានពឹងពាក់មេធាវីការពារក្តី ដាក់ពាក្យបណ្តឹងប្ដឹងជនសង្ស័យនោះ នៅថ្ងៃទី០៧ ខែមីនា ឆ្នាំ២០១៨ ចូលមកអយ្យការអមសាលាដំបូងរាជធានីភ្នំពេញ រហូតដល់សមត្ថកិច្ចតាមចាប់ខ្លួនជនសង្ស័យនាំមកប្រគល់ជូនដំណាងអយ្យការ ដើម្បីចាត់ការតាមច្បាប់ ៕
ចែករំលែកព័តមាននេះ