រាជធានីភ្នំពេញ ៖ ទីបំផុត ក្រុមជនប្រដាប់អាវុធដែលលើកគ្នាចូលដីឡូត៍១កន្លែងទំនងជាប៉ុនប៉ងសម្លាប់មន្ត្រីអាវុធហត្ថលើផ្ទៃប្រទេសម្នាក់ ដែលជាអ្នកចាំដីឡូត៍លោកឧកញ៉ាត្រូវបានចាប់ខ្លួន នៅថ្ងៃទី១៣ មីនា សរុបទាំងអស់៦នាក់ដែលបានធ្វើសកម្មភាពនៅទំនប់កប់ស្រូវភូមិត្រពាំងពោធិ៍ ឃុំគោករកា ខណ្ឌព្រែកព្នៅ កាលពីយប់ថ្ងៃទី០៨ មីនា ត្រូវបានកម្លាំងអាវុធហត្ថរាជធានីភ្នំពេញចាប់ខ្លួនបានអស់ហើយ ។
ការបង្ក្រាបនោះត្រូវបានសមត្ថកិច្ចប្រមូលយកបានកាំភ្លើងវែងម៉ាកAK 47 ស្វាយបត់១ដើម បង់១ មានគ្រាប់ចំនួន៨ និងទូរស័ព្ទចំនួន២គ្រឿង ដែលដកហូតពីជនម្នាក់ក្នុងចំណោមបក្សពួក៦នាក់ដែលត្រូវបាញ់របួសបាក់ជើង ពេលកើតហេតុ ។ ពេលនេះមិនទាន់ដឹងថា ក្រុមជនទាំង៦នាក់ជាក្រុមចោរប្លន់ឬជាក្រុមស៊ីឈ្នួលសម្លាប់មនុស្សនោះទេ ដោយសារតែសមត្ថកិច្ចកំពុងធ្វើការសាកសួរ សូម្បីតែអត្តសញ្ញាណជនទាំងនេះក៏មិនទាន់ដឹងនៅឡើយ ព្រោះចាប់បានក្តៅៗ ។
គួររំលឹកថា ជនប្រដាប់អាវុធម្នាក់ ក្នុងចំណោមបក្សពួកទាំងអស់ ត្រូវបានមន្ត្រីកងរាជអាវុធហត្ថលើផ្ទៃប្រទេសម្នាក់បាញ់បាក់ភ្លៅដេកស្តូកស្តឹង និងចាប់វាយទ្រមខ្លួនព្រមទាំងដកហូតបានកាំភ្លើង អាកាកាត់ស្វាយមួយដើម ខណៈពេលដែលជននេះបានចូលធ្វើសកម្មភាពធាក់ទ្វារ និងភ្ជង់ដោយកាំភ្លើងមកលើកម្មករនៅផ្ទះមន្ត្រីកងរាជអាវុហត្ថរូបនោះ ។ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៨និង៣០នាទីយប់ថ្ងៃទី៨ មីនា នៅចំណុចផ្ទះលក់ប្រេងមួយកន្លែងនៅមុខដីឡូត៍មួយលើផ្លូវទំនប់កប់ស្រូវក្នុង ភូមិត្រពាំងពោធិ៍ សង្កាត់គោករការ ខណ្ឌព្រែកព្នៅ ។
ទាក់ទិនក្រុមជនប្រដាប់អាវុធអាកាចូលផ្ទះមន្ត្រីកងរាជអាវុធហត្ថនោះ សមត្ថកិច្ចមូលដ្ឋានមានការសង្ស័យថា ជារឿងគំនុំ ព្រោះតាមចម្លើយជនសង្ស័យដែលរងរបួសបានអះអាងថាខ្លួនត្រូវបានគេជួល ។ ជាមួយគ្នានេះក្នុងរបាយការណ៍នានាបានផ្សាយថាអាចជាការប៉ុនប៉ងប្លន់ ។ជនសង្ស័យឈ្មោះ ស៊ុន ចេង អាយុ៣២ឆ្នាំ មានលំនៅផ្ទះជួលភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យដែលត្រូវបាញ់របួស១គ្រាប់ចំភ្លៅឆ្វេង និងត្រូវបានវាយបែកក្បាលយ៉ាងដំណំផងដែរ ។ ចំណែកម្ចាស់ផ្ទះ(រោងលក់ប្រេង)ឈ្មោះ ថោង គីរី ភេទប្រុស អាយុ៣៨ឆ្នាំ ជាមន្ត្រីកងរាជអាវុធហត្ថលើផ្ទៃប្រទេសប្រចាំការនៅតំបន់អតីតបុរីឡុង ឈិន និងមានប្រពន្ធឈ្មោះ សេក ចិន្តា អាយុ៤៥ឆ្នាំ ជាអ្នករកស៊ីលក់ប្រេង ។
តាមសមត្ថកិច្ចបានឱ្យដឹងថា ជនសង្ស័យមានបក្សពួកចំនួន៦នាក់ ប្រដាប់ដោយអាវុធអាកា២ដើម ជិះម៉ូតូចំនួន២គ្រឿង បានចូលទៅធាក់ទ្វារបាញ់គំរាមមន្ត្រីកងរាជអាវុធហត្ថរូបនោះតែបាញ់មិនផ្ទុះ និងចាប់ភ្ជង់កម្មករ ហើយត្រូវមន្ត្រីកងរាជអាវុធហត្ថរូបនោះបាញ់១គ្រាប់វិញបណ្តាលឱ្យត្រូវម្នាក់បាក់ភ្លៅ ដួលនៅនឹងកន្លែង ទើបបក្សពួកផ្សេងទៀតបានរត់គេចខ្លួនបាត់អស់ ។ នគរបាលឱ្យដឹងថា ទាក់ទិននឹងជនប្រដាប់អាវុធចូលផ្ទះមន្ត្រីកងរាជអាវុធហត្ថ តាមការបំភ្លឺគឺជារឿងគំនុំ មិនមែនជាករណីប្លន់ប្រដាប់អាវុធនោះឡើយ ។
មន្ត្រីកងរាជអាវុធហត្ថដែលជាម្ចាស់ផ្ទះបានឱ្យដឹងថា នៅយប់នោះមុនពេលកើតហេតុ គាត់បានឃើញជនទាំងនោះ ជិះម៉ូតូចំនួន២គ្រឿងចុះឡើងជាច្រើនត្រឡប់នៅតាមផ្លូវទំនប់កប់ស្រូវ និងសម្លឹងមើលមកផ្ទះរបស់គាត់ ។ ក្រោយមករូបគាត់ និងប្រពន្ធបាននាំគ្នាចូលដេកក្នុងរោងលក់ដូរ ។ ចំណែកកម្មកររបស់គាត់២នាក់ទៀត ដេកក្នុងរោងមួយទៀតនៅខាងលិច ។ នៅពេលដែលកំពុងតែដេកមិនទាន់លក់ផង ស្រាប់តែមានជនមួយក្រុមប្រដាប់អាវុធអាកាចំនួន២ដើម ដែល៣នាក់បានមកធាក់ទ្វារផ្ទះ(រោង) របស់គាត់និងបាញ់គំរាមឱ្យបើកទ្វារ តែមិនផ្ទុះនិង២នាក់ទៀតបានភ្ជង់កម្មករបស់គាត់ដែលដេកនៅរោងផ្សេង ។
មន្ត្រីកងរាជអាវុធហត្ថម្ចាស់ផ្ទះមានឱ្យដឹងទៀតថា នៅពេលដែលក្រុមជនទាំងនោះរត់គេចខ្លួនក៏បានបាញ់មកលើលោកចំនួន១គ្រាប់តែពុំត្រូវ ។ ចំណែកជនម្នាក់ដែលរងរបួសជើងក៏បានអង្វរ ដោយស្រែកថា «កុំបាញ់សម្លាប់ខ្ញុំ ! ខ្ញុំត្រូវបានគេជួល» ជននេះបានប្រាប់ថា អ្នកជួលគឺជាមន្ត្រីប៉ូលិសម្នាក់នៅខណ្ឌព្រែកព្នៅ ។
តាមព័ត៌មានឱ្យដឹងថា ជនសង្ស័យបានសារភាពថា ខ្លួនត្រូវបានគេជួលក្នុងតម្លៃ៨ពាន់ដុល្លារ ។ ទោះបីជាយ៉ាងណា នោះគឺជាចម្លើយរបស់ជនសង្ស័យដែលបានសារភាព ប្រាប់មន្ត្រីកងរាជអាវុធហត្ថ នៅកន្លែងកើតហេតុតែប៉ុណ្ណោះ ឯករណីបែបណានិងពិតយ៉ាងណា នោះនៅមិនទាន់មានការអះអាងនៅឡើយទេ ។
ក្នុងចំណោម៦នាក់ដែលធ្វើសកម្មភាពនោះ ដោយសារម្នាក់ត្រូវបាញ់បាក់ភ្លៅ រត់មិនរួចទើបឈានទៅចាប់បាន៥នាក់ទៀត កំពុងសួរចម្លើយនៅឡើយ ៕
ចែករំលែកព័តមាននេះ