រាជធានីភ្នំពេញ ៖ បច្ចុប្បន្ន យុវជនកម្ពុជាដែលកំពុងពេញថាមពល មានអាយុក្រោម៣៥ឆ្នាំចុះ ស្មើនឹងប្រមាណ៦៦%នៃប្រជាពលរដ្ឋខ្មែរសរុប ប៉ុន្ដែឱកាសទទួលបានការងារធ្វើនៅមានកម្រិត ខណៈអ្នកផ្គត់ផ្គង់ការងារបានលើកឡើងពីកង្វះកម្មករនិយោជិតដើម្បីបម្រើការក្នុងសង្វាក់ផលិតកម្មរបស់ខ្លួន ។ បញ្ហានេះ អ្នកសេដ្ឋកិច្ចមើលឃើញថា ដោយសារតែការផ្ដល់ព័ត៌មានពីតម្រូវការការងារ មិនទូលំទូលាយ និងកត្តារួមផ្សំមួយចំនួនទៀត ។
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting បានលើកឡើងថា សព្វថ្ងៃនេះ បញ្ហាទីផ្សារការងារ និងកម្លាំងពលកម្មមិនខ្វះទេនៅក្នុងស្រុក ប៉ុន្ដែការផ្សព្វផ្សាយព័ត៌មានពីតម្រូវការងារ មិនបានជ្រាបដល់គ្រប់ស្រទាប់យុវជននៅឡើយ ដែលជាហេតុធ្វើឲ្យពួកគេបាត់បង់ឱកាស ។
លោក ង៉ែត ជូ ថ្លែងថា ៖« តាមពិត បើនិយាយពីកម្លាំងពលកម្មនៅស្រុកយើង មិនខ្វះទេ តែបើកម្មករជំនាញអាចនៅខ្វះ ។ ចំណែកអ្នកផ្គត់ផ្គង់ការងារដែលកំពុងខ្វះបុគ្គលិកនោះ អាចមកពីការផ្សព្វផ្សាយពីតម្រូវការការងារមិនបានទូលំទូលាយ និងកត្តារួមផ្សំមួយចំនួនទៀត » ។ លោកថា ៖« កាលណាខ្វះព័ត៌មាន គឺមិនដឹងថាកន្លែងណាត្រូវការកម្មករធ្វើការទេ ។ និយាយរួម កាលណាយើងផ្ដល់ព័ត៌មានមិនទូលំទូលាយ អ្នកស្វែងរកការងារធ្វើនៅតែគ្មានឱកាសនឹងទទួលបានការងារធ្វើ ។ មួយវិញទៀត គឺកម្មករជំនាញមិនចេះតែមានទេ វាទាមទារឲ្យមានការបណ្ដុះបណ្ដាលជាដើម ។ ចំណែកលក្ខខណ្ឌការងារ ក៏ជាមូលហេតុមួយធ្វើឲ្យពលរដ្ឋខ្មែរ ដែលពេញកម្លាំង ធ្វើចំណាកស្រុកទៅស្វែងរកការងារនៅក្រៅប្រទេសផងដែរ ក្រៅពីទៅតាមបងប្អូនសាច់ញាតិ និងមិត្តភក្តិ » ។
លោក បូដ ចេហ្វ (Jef BOEDT) អគ្គនាយកក្រុមហ៊ុនសុកហ្វីនកម្ពុជា បានឲ្យដឹងថា ក្រុមហ៊ុនលោកកំពុងត្រូវការកម្មករ និងបុគ្គលិករាប់ពាន់នាក់បន្ថែមដើម្បីបម្រើការនៅចម្ការកៅស៊ូទាំងពីរទីតាំងរបស់ខ្លួននៅខេត្តមណ្ឌលគិរី ហើយនៅអំឡុងខែមេសា ឆ្នាំ២០១៨ខាងមុខនេះ ក្រុមហ៊ុនលោកនឹងបើកដំណើរការរោងចក្រកែច្នៃជ័រកៅស៊ូក្រែបមួយទៀត ។ ដូច្នេះ នៅពេលដំណើរការ រោងចក្រនេះនឹងស្រូបយកកម្លាំងការងារយ៉ាងច្រើនបន្ថែមទៀត ។
លោក ចេហ្វ ថ្លែងថា ៖« សុកហ្វីនកម្ពុជា ជាក្រុមហ៊ុនវិនិយោគដ៏ធំមួយនៅខេត្តមណ្ឌលគិរីលើផ្ទៃដីទំហំ៧.៥០០ហិកតា ដែលបានបោះទុនប្រមាណ៩៩លានដុល្លារហើយ គិតចាប់ពីឆ្នាំ២០០៩មក ។ គិតមកទល់ពេលនេះ យើងមានកម្មករនិយោជិត និងបុគ្គលិកជំនាញ ដែលកំពុងបំពេញការងារអចិន្ត្រៃយ៍ចំនួន៦៥០នាក់ ហើយកំពុងត្រូវការកម្លាំងជាច្រើនបន្ថែមទៀត»។
យ៉ាងណាក៏ដោយ លោកថា ការស្វែងរកបុគ្គលិកមកធ្វើការ វាជារឿងស្មុគស្មាញមួយ បើទោះបីលោកបានផ្សព្វផ្សាយតាមមធ្យោបាយនានាក៏ដោយ ខណៈដែលដើមកៅស៊ូពេញវ័យអាចជៀរជ័រប្រមាណ២.០០០ហិកតា កំពុងចាប់ផ្ដើមប្រមូលផលជាបន្តបន្ទាប់។
ពាក់ព័ន្ធនឹងលក្ខខណ្ឌការងារវិញ លោកចេហ្វលើកឡើងថា ក្នុងនាមជាក្រុមហ៊ុនអន្តរជាតិលំដាប់ពិភពលោកមួយ ការគោរពលក្ខខណ្ឌ និងច្បាប់ការងារ គឺជារឿងចាំបាច់បំផុត ។
លោកថ្លែងថា ៖« វាមិនត្រឹមតែទទួលបានប្រាក់ខែ និងថ្ងៃឈប់សម្រាកតាមស្ដង់ដាប៉ុណ្ណោះទេ ថែមទាំងទទួលបានអត្ថប្រយោជន៍ជាច្រើនទៀតដូចជា ការស្នាក់នៅ ទឹក-ភ្លើងដោយឥតគិតថ្លៃ ឧបត្ថម្ភអង្ករប្រចាំខែ និងប្រាក់លើកទឹកចិត្តផ្សេងៗទៀត ហើយប្រសិនបើពួកគេមានកូន យើងក៏មានសាលាបឋមសិក្សាសម្រាប់បណ្ដុះបណ្ដាលចំណេះដឹងទូទៅ ។ ក្រៅពីនេះ យើងបានគិតគូរបណ្ដុះបណ្ដាញជំនាញជៀរជ័រដល់ពួកគេរយៈពេល៤សប្ដាហ៍ មុននឹងចាប់ផ្ដើមធ្វើការងារ ដោយមានទាំងប្រាក់ប្រចាំថ្ងៃទៀតផង។ លើសពីនេះទៀតសោត យើងមានមណ្ឌលសុខភាព និងទីកន្លែងសម្រាប់ហាត់កីឡាផងដែរ។ អ្វីដែលជាកាតព្វកិច្ចនោះ យើងបានបង់ពន្ធជូនរដ្ឋលើប្រាក់បៀវត្សរបស់ពួកគេ ហើយមន្ទីរការងារក៏តែងតែចុះមកត្រួតពិនិត្យប្រចាំខែដែរ » ។
នាយកគ្រប់គ្រងក្រុមហ៊ុន All Public Relations បានយល់ស្របថា ការចែកចាយព័ត៌មានគឺជារឿងសំខាន់ណាស់នៅក្នុងការជ្រើសរើសបុគ្គលិក តែអ្វីដែលជាបញ្ហាប្រឈមនោះគឺចំណេះ និងជំនាញរបស់យុវជននៅមានកម្រិត ។
កញ្ញា ផេង គីមហ៊ន នាយកគ្រប់គ្រងរូបនេះបានថ្លែងថា ៖« ការជ្រើសរើសបុគ្គលិក វាពិតជារឿងស្មុគស្មាញមួយ ដោយពួកគេនៅខ្វះខាតចំណេះដឹង និងជំនាញ ប៉ុន្ដែប្រទេសរបស់យើងពោរពេញដោយយុវជន និងកំណើនធនធានមនុស្ស ដូច្នេះយើងត្រូវជួយជ្រោមជ្រែងពួកគេ ដោយទទួលយកមកធ្វើការទាំងចំណេះដឹងនៅមានកម្រិត ហើយយើងត្រូវតែអភិវឌ្ឍន៍ពួកគេបន្ថែមទៀត » ។
កញ្ញាបន្ថែមថា ៖« នេះជាអ្វីដែលក្រុមហ៊ុនយើងបាននិងកំពុងតែអនុវត្ត ហើយពួកយើងកំពុងស្វែងរកបេក្ខជនដែលឆ្លាតវៃ និងមានសក្ដានុ ពលមកជួយធ្វើការ ហើយយើងត្រូវបង្ហាត់បង្រៀនពួកគេបន្ថែម។ ប្រសិនបើយើងគ្រប់គ្នាធ្វើដូច្នេះ ខ្ញុំជឿជាក់ថា យើងនឹងមិនមានបញ្ហាជាមួយការជ្រើសរើសបុគ្គលិកទេ ហើយយើងអាចជួយបង្កើនឱកាសការងារនៅក្នុងសង្គមបានច្រើនផងដែរ »។
ការចែកចាយព័ត៌មានបច្ចុប្បន្ន មានលក្ខណៈជឿនលឿនតាមបច្ចេកវិទ្យាឌីជីថល ខណៈយុវជនកម្ពុជាភាគច្រើនហាក់ពុំទាន់ត្រៀមខ្លួនរួចរាល់នៅឡើយសម្រាប់ទទួលយកលំហូរបច្ចេកវិទ្យាថ្មីៗដែលកំពុងវិវត្តន៍ឥតឈប់ឈរ ដែលជាហេតុនាំឲ្យពួកគេមួយចំនួនក៏ពុំទទួលបានព័ត៌មានពីទីផ្សារការងារផងដែរ ។
ក្នុងជំនួបជាមួយអ្នកសារព័ត៌មានកាលពីថ្ងៃទី២០ ខែធ្នូ កន្លងមក លោកកាន ច័ន្ទមេត្តា រដ្ឋលេខាធិការក្រសួងប្រៃសនីយ៍ និងទូរគមនាគមន៍ បានលើកឡើងថា ចំណេះដឹងខាងបច្ចេកវិទ្យារបស់ពលរដ្ឋកម្ពុជានៅមានកម្រិតនៅឡើយ ខណៈកំណើនយុវជនសក្ដានុពលសព្វថ្ងៃ មានប្រមាណ៦៦%នៃប្រជាជនសរុប ប៉ុន្ដែអ្នកដែលមានចំណេះដឹងមូលដ្ឋានខាងបច្ចេកវិទ្យានៅតិចតួចបំផុត ។
លោកថ្លែងថា ៖« ប្រជាជនយើងមិនអាចត្រឹមតែចេះប្រើYoutubeនិងFacebook ប៉ុណ្ណោះទេ យើងត្រូវចេះប្រើអ្វីៗផ្សេងទៀត ដូចជា ការបំពេញពាក្យតាមអនឡាញជាដើម »។
យោងតាមទិន្នន័យរបស់អង្គការ UNFPA ក្នុងឆ្នាំ២០១៥ បានបង្ហាញថា កម្ពុជាជាប្រទេសដែលមានយុវជនច្រើនជាងគេនៅក្នុងតំបន់អាស៊ីអាគ្នេយ៍។ ក្នុងនោះ ១ភាគ៥នៃប្រជានជនកម្ពុជាមានអាយុចន្លោះពី១៥ដល់២៤ឆ្នាំ និងស្ទើរតែ២ភាគ៣នៃអត្រាប្រជាជនសរុបមានអាយុក្រោម៣០ឆ្នាំ ហើយយុវជនវ័យក្មេងទាំងនេះ គឺជាទំពាំងស្នងឫស្សីដ៏មានសក្ដានុពលសម្រាប់ជំរុញកំណើនសេដ្ឋកិច្ច និងអភិវឌ្ឍន៍សង្គម ៕
ចែករំលែកព័តមាននេះ