«The Mirror » របស់អង់គ្លេសកាលពីពេល ថ្មីៗកន្លងមកផ្សាយថា ឆ្មាញីអាយុ៦ឆ្នាំ មួយក្បាលល្បីរន្ទឺ ព្រោះតែចូលចិត្តលួចខោក្នុងបុរស និងស្រោមជើងរបស់អ្នកក្រុងហាមីលតុន ចក្រភពអង់គ្លេស ។ អ្នកស្រុកយល់ថាជនកើតរោគចិត្តជាអ្នកលួចរបស់ទាំងនោះ តែតាមពិតជាសត្វឆ្មា ។
អ្នកស្រី Sarah Nathan ជាម្ចាស់ឆ្មា «Brigit» ឱ្យដឹងថា ឆ្មារបស់គាត់លួចខោស្ល៊ីបបុរសចំនួន១១ និងស្រោមជើង៥០យកទៅទុកក្នុងផ្ទះ ដូច្នេះហើយគាត់ប្រកាសសុំទោសអ្នកស្រុក និងឱ្យពួកគេទៅយកសម្ភារដែលបាត់វិញ ។
អ្នកស្រី Sarah ចម្លែកចិត្តចំពោះឆ្មារបស់គាត់ ព្រោះកាលពីមុនវាចូលចិត្តខោស្ល៊ីបបុរស-ស្ត្រី សម្លៀកបំពាក់ ទ្រនាប់ស្មងជើងសម្រាប់កីឡាវាយកូនបាល់លើទឹកកក (Hoekey) និងអាវក្រណាត់សូត្រ ប៉ុន្តែបច្ចុប្បន្នវាបែរជាចូលចិត្តលួចខោស្ល៊ីប និងស្រោមជើងបុរសទៅវិញ ។
អ្នកដែលបាត់ខោក្នុង ឬស្រោមជើងជាដើមនោះ នឹកស្មានថាជនកើតរោគចិត្តជាអ្នកលួច ។ នៅពេលដឹងថា ឆ្មាញីជាអ្នកលួចក៏ហួសចិត្តគ្រប់់គ្នា។ ទោះជាយ៉ាងណាក្តី គេនៅតែឆ្ងល់ តើហេតុអ្វីបានជាឆ្មាញីនោះចូលចិត្តតែខោក្នុងបុរស ឯខោក្នុងនារីវាមិនលួច ៕
ចែករំលែកព័តមាននេះ