ខេត្តកំពង់ធំ ៖ លោក អ៊ិត សុធា ព្រះរាជអាជ្ញាអមសាលាដំបូងខេត្ត បញ្ជាឲ្យសមត្ថកិច្ចតំបន់ប្រតិបត្តិការសឹកខេត្តកំពង់ធំ សហការជាមួយសង្កាត់រដ្ឋបាលព្រៃឈើទំរីង ឃាត់រថយន្តកូរ៉េចំណុះ៥តោន ដឹកឈើជាង១០ម៉ែត្រគូប ចេញពីព្រៃឡង់
ខេត្តកំពង់ធំ ៖ លោក អ៊ិត សុធា ព្រះរាជអាជ្ញាអមសាលាដំបូងខេត្ត បញ្ជាឲ្យសមត្ថកិច្ចតំបន់ប្រតិបត្តិការសឹកខេត្តកំពង់ធំ សហការជាមួយសង្កាត់រដ្ឋបាលព្រៃឈើទំរីង ឃាត់រថយន្តកូរ៉េចំណុះ៥តោន ដឹកឈើជាង១០ម៉ែត្រគូប ចេញពីព្រៃឡង់ កាលពីវេលាម៉ោង៩ យប់ថ្ងៃទី៨ ខែឧសភា ឆ្នាំ២០១៥ ។
ប្រភពព័ត៌មានបានឲ្យដឹងថា រថយន្តកូរ៉េចំណុះ៥តោន ដឹកឈើជាង១០ម៉ែត្រគូប ចេញពីព្រៃឡង់ ត្រូវលោកអ៊ិត សុធា ព្រះរាជអាជ្ញាអមសាលាដំបូងខេត្ត បញ្ជាឲ្យសមត្ថកិច្ចតំបន់ប្រតិបត្តិការសឹកខេត្តកំពង់ធំ សហការជាមួយសង្កាត់រដ្ឋបាលព្រៃឈើទំរីង ឃាត់បាននៅចំណុចចំការកៅស៊ូ ស្ថិតនៅតាមបណ្តោយផ្លូវពី ឃុំទំរីង ឆ្ពោះទៅ ភូមិ៩៩ ស្រុកសណ្តាន់ ខេត្តកំពង់ធំ រថយន្តកូរ៉េដឹកឈើខាងលើនេះ ត្រូវបានគេស្គាល់ថា ជារបស់មេឈ្មួញរកស៊ីឈើឡើងដុះស្លែរម្នាក់ឈ្មោះ ម៉ុន និងមានប្រពន្ឋឈ្មោះ ឡែន រស់នៅភូមិបឹង ស្រុកបារាយណ៍ ខេត្តកំពង់ធំ បានធ្វើសកម្មភាពដឹកឈើយ៉ាងរលូន ដោយពុំមានការខ្លាចញញើតច្បាប់សូម្បីតែបន្តិចនោះទេ ។
ចំណែកលោក ម៉ុន ដែលជាអ្នករកស៊ីឈើខាងលើបានអះអាងថា លោកបានបង់លុយឲ្យទៅលោកសៅ វណ្ណនី នាយផ្នែករដ្ឋបាលព្រៃឈើសណ្តាន់ ក្នុងមួយរថយន្តៗ ចំនួន២០ដុល្លា ហើយនឹងសមត្ថកិច្ចផ្សេងៗទៀត ជាច្រើនកន្លែង ទើបរូបគាត់អាចដឹកឈើបាន ហើយក៏ពុំត្រូវបានសមត្ថកិច្ចណាចាប់ទេ ទើបតែពេលនេះរថយន្តកូរ៉េ ៥តោន ពណ៌ស អត់ស្លាកលេខ ត្រូវបាននាំយកមករក្សាទុកនៅ សង្កាត់រដ្ឋបាលព្រៃឈើទំរីង ។
តាមប្រភពព័ត៌មានឲ្យដឹងថា ជារៀងរាល់ថ្ងៃរថយន្តដឹកឈើប្រភេទលេខ២ ដឹកបន្តកន្ទុយគ្នា ចេញពីព្រៃឡង់ ស្ថិតត្រង់ចំណុចភូមិស្រុកចាស់ ចំនុចភូមិអូល្អក់ និងចំណុចផ្លូវព្រះអាទិត្យ ក្នុងមួយយប់ៗ ចាប់ពី១០គ្រឿងទៅ១៥គ្រឿង គឺសុទ្ធតែគ្មានច្បាប់ ជាហេតុធ្វើឲ្យមហាជនមានការព្រួយបារម្ភថា មិនយូរនោះទេ ព្រៃឡង់ នឹងក្លាយទៅជាវាលរហោឋាន នឹងក្លាយទៅជាដីចំការរបស់សមត្ថកិច្ចប៉ូលិស ប៉េអ៊ឹម និងមន្ត្រីរាជការអ្នកមានអំណាចមួយចំនួនជាក់ជាមិនខាន ។
មតិពីប្រជាពលរដ្ឋបានរិះគន់ទៅលើសមត្ថកិច្ចចំៗថា ចំណែកប្រជាពលរដ្ឋក្រីក្រ បានត្រឹមតែស្រក់ទឹកភ្នែក បើហានតែទៅកាប់ ហើយនៅពេលគេចាប់បាននោះ គឺមានតែផ្លូវ១គត់ គឺគុក! រីឯការបង្កើតគណៈកម្មការចម្រុះដាក់ស្នាក់ការ នៅចំណុចស្ពានបាក់ស្នានោះ គឺចាប់បានតែកាឡេថង ដឹកអុស របស់អ្នកស្រុកនោះទេ ចំណែកពួកឈ្មួញដឹកឈើ ដោយរថយន្តយីឌុប និងរថយន្តកូរ៉េ ពុំហ៊ានចាប់ទេ ដោយសារតែអស់លោកទាំងអស់នោះ បានបង់លុយឲ្យអស់ហើយ នេះបានចំជាគំរូ ដ៏អាក្រក់ជួរជាតិ មែនរបស់អស់លោក ដែលស៊ីប្រាក់ខែរបស់រដ្ឋ ដែលបានមកពីញើសឈាមរបស់ប្រជាពលរដ្ឋ បង់ពន្ធជូនរដ្ឋនោះ បែរជាអស់លោកត្រូវខួរក្បាលខ្មូតវាស៊ីអស់ លក់ឧត្តមគតិ ទៅស្រវាយកលុយ ពីពពួកមេឈ្មួញ ដែលជាពួកឧក្រិដ្ឋជនបំផ្លាញព្រៃឈើទៅវិញ ។ សួរថា តើវាមានទៅខុសអ្វីនឹងពួកទាំងនោះទៅ? ចម្លើយ គឺថា អ្នកកាប់ឈើ អ្នកដឹកឈើអ្នកទទួលលុយ ពីបទល្មើស គឺសុទ្ធតែជាពួកឧក្រិដ្ឋជនបំផ្លាញព្រៃឈើទាំងអស់ដូចគ្នា ៕
ចែករំលែកព័តមាននេះ