ថ្មីៗនេះ អ្នកនិយមលេងបណ្តាញសង្គមនៅកម្ពុជាបាននាំគ្នាចែករំលែកអំពីការរាតត្បាតនៃវីរុសបង្កអោយមានជំងឺផ្លូវដង្ហើម ដែលមានរោគសញ្ញាស្រដៀងនឹងជំងឺផ្តាសាយធំ ដែលមានឈ្មោះថា យូមែនមេតាប៉ូណេម៉ូណូ (Human Metapneumovirus)។ យូមែនមេតាប៉ូណេម៉ូណូ (Human Metapneumovirus)…
ថ្មីៗនេះ អ្នកនិយមលេងបណ្តាញសង្គមនៅកម្ពុជាបាននាំគ្នាចែករំលែកអំពីការរាតត្បាតនៃវីរុសបង្កអោយមានជំងឺផ្លូវដង្ហើម ដែលមានរោគសញ្ញាស្រដៀងនឹងជំងឺផ្តាសាយធំ ដែលមានឈ្មោះថា យូមែនមេតាប៉ូណេម៉ូណូ (Human Metapneumovirus)។
យូមែនមេតាប៉ូណេម៉ូណូ (Human Metapneumovirus) ត្រូវបានគេហៅឱ្យងាយយល់ថា ជំងឺគ្រុនផ្តាសាយ-HMPV គឺជាមេរោគបង្កជំងឺផ្លូវដង្ហើមស្រួចស្រាវ មានរោគសញ្ញាស្រដៀងគ្នាទៅនឹងជំងឺCOVID-19 ហើយដែលថ្មីៗនេះវាត្រូវបាននាយកដ្ឋានប្រយុទ្ធនឹងជំងឺឆ្លងរបស់ប្រទេសចិនរាយការណ៍ថា បានឆ្លងរាតត្បាតគួរឱ្យព្រួយបារម្ភទូទាំងប្រទេសចិន ជាពិសេសមកទល់នឹងពេលនេះ ជាពិសេសមកទល់ពេលនេះនៅមិនទាន់មានថ្នាំកម្ចាត់មេរោគ និងវ៉ាក់សាំងការងារដ៏មានប្រសិទ្ធភាព ដើម្បីប្រឆាំងនឹងវាឡើយ ហើយគ្រូពេទ្យគ្រាន់តែអាចព្យាបាលអ្នកជំងឺទៅតាមរោគសញ្ញាដែលបង្ហាញចេញតែប៉ុណ្ណោះ ។
យ៉ាងណាក៏ដោយ អ្នកជំនាញផ្នែកវេជ្ជសាស្ដ្របានអះអាងតាមរយៈគេហទំព័រ clevelandclinic ថា មេរោគ HMPV នេះមានវត្តមានយូរមកហើយ មិនមែនវីរុសថ្មីនោះឡើយ ហើយវាត្រូវចាត់ថ្នាក់ជាមេរោគបង្កជំងឺផ្លូវដង្ហើមដ៏គ្រោះថ្នាក់ដែលមានអាយុកាលជាង២០ឆ្នាំមកហើយ គ្រាន់តែមនុស្សភាគច្រើននៅតែមិនស្គាល់ច្បាស់ពីវានៅឡើយ ។
តើអ្វីជា មេរោគមេតាប៉ូណេម៉ូណូ ឬ HMPV ? មេរោគ HMPV ត្រូវបានគេរកឃើញនៅដើមឆ្នាំ២០០១ ក្រុមអ្នកស្រាវជ្រាវជនជាតិហូឡង់ ហើយកំមានវត្តមាននៅក្នុងសង្គមមនុស្សអស់រយៈពេលជាង៦០ឆ្នាំមកហើយ និងកំពុងចរាចរពាសពេញពិភពលោក ។
HMPV គឺជាភ្នាក់ងារបង្ករោគផ្លូវដង្ហើមស្រួចស្រាវជាប់ខ្សែស្រឡាយជាមួយមេរោគ paramyxo ដែលជះឥទ្ធិពលជាចម្បងលើប្រព័ន្ធផ្លូវដង្ហើម បណ្តាលឱ្យមានការឆ្លងមេរោគ ដោយចាប់ផ្តើមពីរោគសញ្ញាដូចជា ផ្តាសាយស្រាលរហូតដល់ការឆ្លងមេរោគលើផ្លូវដង្ហើមធ្ងន់ធ្ងរ ជាពិសេសចំពោះទារក កុមារតូចៗមនុស្សវ័យចំណាស់ និងបុគ្គលដែលមានប្រព័ន្ធការពាររាងកាយចុះខ្សោយ ។
រោគសញ្ញានៃការឆ្លងមេរោគ HMPV ស្រដៀងទៅនឹងមេរោគផ្លូវដង្ហើមផ្សេងទៀតហើយអាចរួមមានៈ ហៀរសំបោរ ឬតឹងច្រមុះ ,ក្អក ,ឈឺបំពង់ក ,គ្រុន ,ពិបាកដកដង្ហើម ,ដង្ហើមខ្លី, អស់កម្លាំង និងឈឺសាច់ដុំ ។ ប៉ុន្តែក្នុងករណីធ្ងន់ធ្ងរ ជាពិសេសចំពោះកុមារតូចៗ ឬបុគ្គលដែលមានស្ថានភាពសុខភាពខ្សោយស្រាប់ ការឆ្លងមេរោគ HMPV អាចនាំឱ្យមានជំងឺរលាកសួត ឬរលាកទងសួត ។
មេរោគ HMPV អាចឆ្លងពីមនុស្សម្នាក់ទៅមនុស្សម្នាក់បានយ៉ាងងាយតាមរយៈការទំនាក់ទំនងជិតស្និទ្ធ មិនថាការចាប់ដៃ ការនិយាយជាមួយគ្នា ឆ្លងតាមរយៈដំណក់ទឹកផ្លូវដង្ហើម នៅពេលដែលអ្នកជំងឺ ក្អក ឬកណ្តាស់ ហើយវាក៏អាចឆ្លងតាមរយៈការប៉ះផ្ទៃ ឬវត្ថុដែលមានមេរោគ រួចយកទៅប៉ះមាត់ ច្រមុះ ឬភ្នែក ។ ដើម្បីបង្ការ និងកាត់បន្ថយហានិភ័យនៃការឆ្លងមេរោគ HMPV ត្រូវអនុវត្តវិធានការមួយចំនួនដូចជា ៖ អនាម័យដៃ ៖ លាងដៃឱ្យបានញឹកញាប់ជាមួយសាប៊ូ និងទឹក ឬប្រើជេល និងអាកុលលាងដៃ ។ អនាម័យផ្លូវដង្ហើម ៖ ខ្ទប់មាត់ និងច្រមុះដោយកន្សែង ឬកែងដៃ ពេលក្អក ឬកណ្តាស់ ។
ជៀសវាងការទំនាក់ទំនងជិតស្និទ្ធ ៖ កាត់បន្ថយទំនាក់ទំនងជិតស្និទ្ធជាមួយបុគ្គលដែលឈឺ ។ ការចាក់វ៉ាក់សាំង ៖ ទោះបីជាមិនមានវ៉ាក់សាំងជាក់លាក់ណាមួយកំណត់គោលដៅ HMPV ក៏ដោយ ការចាក់ថ្នាំបង្ការប្រឆាំងនឹងជំងឺគ្រុនផ្តាសាយ និងវ៉ាក់សាំងការពារជំងឺរលាកសួត អាចកាត់បន្ថយហានិភ័យនៃផលវិបាកពីជំងឺផ្លូវដង្ហើមស្រួចស្រាវ ឬគ្រោះថ្នាក់ដល់ជីវិត ៕
ចែករំលែកព័តមាននេះ