រាជធានីភ្នំពេញ ៖ អគ្គិបានឆាបឆេះផ្ទះល្វែងមួយកន្លែង បណ្ដាលមកពីឆ្លងចរន្តអគ្គិសនី ហើយខណៈកំពុងមានផ្សែងហុយខ្លាំងនោះ គេឃើញមានស្ត្រីម្នាក់ឱបកូនតូចបានស្ថិតនៅផ្ទះនោះ និងបានស្រែកដង្ហើយហៅឲ្យអ្នកនៅខាងក្រោមជួយ ក្នុងស្ថានភាពភ័យស្លន់ស្លោ ហើយសំណាងល្អ ត្រូវបានអ្នកជិតខាង…
រាជធានីភ្នំពេញ ៖ អគ្គិបានឆាបឆេះផ្ទះល្វែងមួយកន្លែង បណ្ដាលមកពីឆ្លងចរន្តអគ្គិសនី ហើយខណៈកំពុងមានផ្សែងហុយខ្លាំងនោះ គេឃើញមានស្ត្រីម្នាក់ឱបកូនតូចបានស្ថិតនៅផ្ទះនោះ និងបានស្រែកដង្ហើយហៅឲ្យអ្នកនៅខាងក្រោមជួយ ក្នុងស្ថានភាពភ័យស្លន់ស្លោ ហើយសំណាងល្អ ត្រូវបានអ្នកជិតខាង ជួយជម្លៀសចេញទាន់ពេលដោយសុវត្ថិភាពទាំងម្ដាយ និងកូន ។
ហេតុការនោះបានកើតឡើងបង្កឲ្យមានការភ្ញាក់ផ្អើលកាលពីវេលាម៉ោង៣និង១៥នាទីរសៀល ថ្ងៃទី២៨ ខែមករា ឆ្នាំ២០២៥ នៅចំណុចផ្ទះល្វែងស្ថិតនៅតាមផ្លូវលេខ១៩បុរីពិភពថ្មីចំការដូង ភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ ។
នគរបាលបានប្រាប់ថា ផ្ទះល្វែងដែលរងការឆាបឆេះនោះ គឺជាប្រភេទសំណង់ថ្មបេតុងទំហំ៤,១ម៉ែត្រ x ១៦ម៉ែត្រ ហយរងការខូចខាតបន្ទប់ទំហំ ៤ម៉ែត្រ x ៤ម៉ែត្ររួមទាំងសម្ភារៈ ប្រើប្រាស់ក្នុងបន្ទប់អស់ទាំងស្រុង ហើយពុំបានឆេះរាលដាលដល់ផ្ទះអ្នកក្បែរខាងឡើយ ប៉ុន្តែផ្ទះអ្នកជិតខាងបានរងផលប៉ះពាល់ពីផ្សែងភ្លើងនោះ។ ដោយឡែកឧប្បត្តិហេតុនេះ គឺបង្កឡើងដោយការឆ្លងចរន្តអគ្គិសនី ហើយពុំបណ្ដាលឲ្យមានគ្រោះថ្នាក់ដល់មនុស្សនោះឡើយ ដោយក្រោយពេលមានការឆាបឆេះភ្លាម ត្រូវបានកម្លាំងសមត្ថកិច្ចជំនាញ នាំរថយន្តពន្លត់អគ្គិភ័យចេញអន្តរាគមន៍បាញពន្លត់ភ្លាមៗផងដែរ ។
នគរបាលបានបញ្ជាក់ថា រថយន្តពន្លត់អគ្គិភ័យ ដែលបើកប្រតិបត្តិការពន្លត់ភ្លើងនាពេលនោះមានចំនួន៣គ្រឿង ក្នុងនោះរួមមានរថយន្តការិយាល័យបង្កពន្លត់អគ្គិភ័យ និងសង្គ្រោះអគ្គិភ័យ នៃស្នងការដ្ឋាននគរបសលរាជធានីភ្នំពេញ ចំនួន០២គ្រឿង ប្រើប្រាស់ទឹកអស់ចំនួន០២ រថយន្ត ស្មើនឹង៨ម៉ែត្រគូប, រថយន្តពន្លត់អគ្គិភ័យស្រាបៀរកម្ពុជា ០១គ្រឿងប្រើប្រាស់ទឹក០១រថយន្ត ស្មើ០៦ម៉ែត្រគូប ហើយបានពន្លត់រលត់ទៅវិញទាំងស្រុង នៅវេលាម៉ោង៤និង១០នាទីរសៀលថ្ងៃទីខែឆ្នាំដដែល ។
ប្រជាពលរដ្ឋបាននិយាយថា នៅមុនពេលកើតហេតុ ខណៈអ្នកនៅតំបន់នោះ កំពុងធ្វើការងាររកស៊ីនៅតាមផ្ទះរៀងៗខ្លួន ស្រាប់តែធំក្លិនឈ្ងៀមយ៉ាងខ្លាំង លុះពេលចេញមើល ស្រាប់តែឃើញផ្សែងហុយចេញពីផ្ទះខាងលើយ៉ាងខ្មួលខ្មាញ់ទៅហើយ ។ មិនតែប៉ុណ្ណោះផ្សែងនោះ បានហោះហើរគ្របដណ្ដប់ទៅលើផ្ទះល្វែងអ្នកផ្សេង ដែលស្ថិតនៅជាប់ៗគ្នានោះថែមទៀតផង ហើយយអ្វី ដែលគួរឲ្យព្រួយបារម្ភនោះ គឺនៅក្នុងពេលកំពុងមានភ្លើងឆេះ និងផ្សែងហុយខ្លាំង គេឃើញមានស្ត្រីម្នាក់ កំពុងឱបកូនរត់ឆ្លេឆ្លា នៅលើផ្ទះ និងស្រែកឲ្យអ្នកកំពុងជ្រួលច្របល់នៅខាងក្រោម ជួយថៃមទៀតផង ។
ប្រជាពលរដ្ឋ បាននិយាយទៀតថា ពួកគាត់ពុំបានដឹងថា ស្ត្រីរូបនោះ និងកូនតូចរបស់នាង គឺជាម្ចាស់ផ្ទះដែលឆេះនោះ ឬជាម្ចាស់ផ្ទះផ្សេង ដែលស្ថិតនៅជាប់គ្នានោះទេ ប៉ុន្តែក្រោយមក ត្រូវបានអ្នករស់នៅផ្ទះជិតនោះ ជួយជម្លៀសចេញបានដោយសុវត្ថិភាពទាំងម្ដាយ និងកូន មិនមានគ្រោះថ្នាក់នោះឡើយ ៕
ចែករំលែកព័តមាននេះ