រាជធានីភ្នំពេញ ៖ នៅថ្ងៃទី២៨ ខែមករា ឆ្នាំ២០២៥នេះ ដែលជាថ្ងៃសែនចូលឆ្នាំចិន និងវៀតណាម នៅរាជធានីភ្នំពេញ យ៉ាងហោចណាស់មានអគ្គិភ័យកើតឡើងជាបន្តបន្ទាប់ចំនួន៤លើកហើយ គិតត្រឹមវេលាល្ងាចថ្ងៃដដែលនេះ…
រាជធានីភ្នំពេញ ៖ នៅថ្ងៃទី២៨ ខែមករា ឆ្នាំ២០២៥នេះ ដែលជាថ្ងៃសែនចូលឆ្នាំចិន និងវៀតណាម នៅរាជធានីភ្នំពេញ យ៉ាងហោចណាស់មានអគ្គិភ័យកើតឡើងជាបន្តបន្ទាប់ចំនួន៤លើកហើយ គិតត្រឹមវេលាល្ងាចថ្ងៃដដែលនេះ បណ្ដាលឲ្យផ្ទះ និងសម្ភារៈមួយចំនួនបានរងការខូចខាត នេះបើតាមរបាយការណ៍ពីនគរបាលការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ ។
ករណីទី១ ៖ នៅវេលាម៉ោងម៉ោង០៩និង៣០នាទីព្រឹកថ្ងៃទី២៨ ខែមករា ឆ្នាំ២០២៥ មានករណីអគ្គិភ័យមួយកន្លែងកើតឡើងនៅចំណុចភូមិសេរីដីដុះ សង្កាត់ព្រៃវែង ខណ្ឌដង្កោ ។
ហេតុការណ៍អគ្គិភ័យឆាបឆេះនេះ បណ្តាលមកពីឆ្លងចរន្តអគ្គិសនី បង្កជាអគ្គិភ័យ។ អគ្គិភ័យនេះ ធ្វើឱ្យឆេះខូចខាតផ្ទះស័ង្កសីចំនួន ០១ខ្នង រួមទាំងសម្ភារៈអស់ទាំងស្រុង ហើយបណ្តាលឲ្យឆេះរាលដាលដល់ផ្ទះអ្នកក្បែរខាងចំនួន ០១ខ្នងខូចខាតជញ្ជាំងអស់មួយចំហៀង ។
នគរបាលឲ្យដឹងទៀតថា នៅវេលាម៉ោង១០និង៣៦នាទីព្រឹក ថ្ងៃទីខែឆ្នាំដដែល អគ្គិភ័យនេះ ត្រូវបានពន្លត់បានទាំងស្រុង ដោយប្រើប្រាស់រថយន្តការិយាល័យអគ្គិភ័យរាជធានីភ្នំពេញ ចំនួន០១គ្រឿង ប្រើប្រាស់ទឹកអស់ចំនួន០១ឡាន ស្មើនឹង០៦ម៉ែត្រគូប, រថយន្តអគ្គិភ័យក្រុមហ៊ុនស្រាបៀរកម្ពុជាចំនួន០១គ្រឿង ប្រើប្រាស់អស់ចំនួន ០១ឡាន ស្មើនឹង០៦ម៉ែត្រគូប ។
ករណីទី២ ៖ អគ្គិភ័យឆាប់ឆេះផ្ទះជួលលោកគ្រូបង្រៀនមួយកន្លែង នៅក្រោយមន្ទីរពេទ្យលោកសង្ឃ ។ អគ្គិភ័យនេះបង្កឲ្យមានការភ្ញាក់ផ្អើលកាលពីវេលាម៉ោង ១០និង៥០នាទីព្រឹកថ្ងៃទី២៨ ខែមករា ឆ្នាំ២០២៥ នៅចំណុចផ្ទះជួលមួយកន្លែង លេខ៣០០ ផ្លូវលេខ១៥៦Z ភូមិ១២ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ។ ម្ចាស់ផ្ទះ ដែលត្រូវភ្លើងឆេះឈ្មោះ ឃឹម សារិត ភេទប្រុស អាយុ៦០ឆ្នាំ មុខរបរជាគ្រូបង្រៀនស្នាក់នៅកន្លែងកើតហេតុខាងលើ ។
តាមព័ត៌មានបានឲ្យដឹងថា នៅមុនពេលកើតហេតុ ដែលជាថ្ងៃសែនចូលឆ្នាំចិន ម្ចាស់បន្ទប់ បានដុតធូប សែនរួចក៏ចាកចេញទៅក្រៅផ្ទះ ស្រាប់តែភ្លើងបានឆាប់ឆេះផ្សែងហុយបង្កឲ្យមានការភ្ញាក់ផ្អើលដល់អ្នកជិតខាង និងប្រជាពលរដ្ឋនាំគ្នាជួយពន្លត់ និងទាក់ទងហៅរថយន្តពន្លត់អគ្គិភ័យជាច្រើនគ្រឿង ទៅអន្តរាគមន៍បាញ់ពន្លត់ ។
តាមនគរបាលការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ បានឲ្យដឹងថា ផ្ទះដែលត្រូវភ្លើងឆេះជាផ្ទះជួល ធ្វើពីបេតុងមានទំហំ១២ម៉ែត្រ គុណ១២ម៉ែត្រ។ នៅក្នុងហេតុការណ៍នេះ រថយន្តពន្លត់អគ្គិភ័យចំនួន៦គ្រឿង ទៅអន្តរាគមន៍បាញ់ពន្លត់ ហើយភ្លើងបានរលត់ទៅវិញ នៅវេលាម៉ោង១១ និង៣០នាទីថ្ងៃដដែល ។
អគ្គិភ័យនេះ បណ្ដាឱ្យខូចខាតសម្ភារៈក្នុងបន្ទប់ជួលទំហំ ០៤ម៉ែត្រ គុណ០៤ម៉ែត្ររងការខូចខាតអស់ទាំងស្រុង ហើយពុំបណ្តាលឲ្យឆេះរាលដាលដល់អ្នកក្បែរខាងឡើយ។ អគ្គិភ័យនេះបណ្ដាលមកពីដុតទៀនធូបសែនចូលឆ្នាំចិនទុកចោល ។
ករណីទី៣ ៖ បានកើតឡើងនៅវេលាម៉ោង០៣និង១០នាទីរសៀល ថ្ងៃទី២៨ ខែមករា ឆ្នាំ២០២៥នៅចំណុចផ្ទះលេខ១៦៧ ផ្លូវ១៩ភូមិប្រការ សង្កាត់ព្រៃស ខណ្ឌដង្កោ ។
ហេតុការណ៍អគ្គិភ័យឆាបឆេះនេះ បណ្តាលមកពីឆ្លងចរន្តអគ្គិសនី បង្កជាអគ្គិភ័យ។ បណ្តាលឱ្យឆេះខូចខាតបន្ទប់ទំហំ ០៤ម៉ែត្រ X០៤ម៉ែត្រ ចំនួន ០១បន្ទប់ រួមទាំងសម្ភារៈប្រើប្រាស់ក្នុងបន្ទប់អស់មួយចំនួន ហើយពុំបណ្តាលឲ្យឆេះរាលដាលដល់អ្នកក្បែរខាងឡើយ ។
នៅក្នុងហេតុការណ៍នេះ រថយន្តពន្លត់អគ្គិភ័យ ចំនួន៣គ្រឿង បានទៅអន្តរាគមន៍បាញ់ពន្លត់ ហើយភ្លើងបានរលត់ទៅវិញ នៅវេលាម៉ោង៤ និង១០នាទីរសៀលថ្ងៃទីខែឆ្នាំដដែល ។ នៅក្នុងនោះ រថយន្តការិយាល័យអគ្គិភ័យរាជធានីភ្នំពេញ ចំនួន០២គ្រឿង ប្រើប្រាស់ទឹកអស់ចំនួន០២ឡាន ស្មើនឹង០៨ម៉ែត្រគូប, រថយន្តពន្លត់អគ្គិភ័យស្រាបៀរកម្ពុជា ចំនួន០១គ្រឿង ប្រើប្រាស់ទឹក០១ឡាន ស្មើ០៦ម៉ែត្រគូប ។
ករណីអគ្គិភ័យទី៤ ៖ បើតាមនាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ បានអោយដឹងជាបឋមថា ខណៈពេលនេះមានករណីអគ្គិភ័យកំពុងតែឆាបឆេះផ្ទះបងប្អូនប្រជាពលរដ្ឋមួយកន្លែង ដែលស្ថិតនៅ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ វេលាម៉ោង ១៨:០០នាទីរសៀល ថ្ងៃទី២៨ ខែមករា ឆ្នាំ២០២៥នេះ ។
គិតត្រឹមវេលាម៉ោង០៦និង៣០នាទីល្ងាចនេះ ពុំមានរបាយការណ៍ណាបញ្ជាក់ថា មានអគ្គិភ័យកើតឡើងទៀតឡើយ នៅរាជធានីភ្នំពេញ ។ អគ្គិភ័យទាំង៤ករណីនេះ ដោយពុំគិតពីការឆាប់ឆេះស្មៅ នៅក្នុងមូលដ្ឋានខណ្ឌឬស្សីកែវឡើយ។ ទោះបីជាយ៉ាងណា គេពុំទាន់ដឹងថា នៅក្នុងនៅថ្ងៃសែនចូលឆ្នាំនេះ នៅទូទាំងប្រទេសកម្ពុជា មានអគ្គិភ័យកើតឡើងប៉ុន្មានលើកឡើយ ៕
ចែករំលែកព័តមាននេះ