រាជធានីភ្នំពេញ ៖ ជ្រូកខ្វៃស្ថិតនៅជាតម្រូវការរបស់ប្រជាពលរដ្ឋខ្មែរជាប់សែស្រឡាយចិនសម្រាប់យកទៅសែនក្នុងពិធីបុណ្យចូលឆ្នាំប្រពៃណីចិន វៀតណាម នៅទី២៨ ខែមករា ឆ្នាំ២០២៥ ឆ្នាំនេះជ្រូកខ្វៃ គឺលក់ដាច់ខ្លាំង ដាច់ស្ទើរកជ្រូកលក់មិនបាន…
រាជធានីភ្នំពេញ ៖ ជ្រូកខ្វៃស្ថិតនៅជាតម្រូវការរបស់ប្រជាពលរដ្ឋខ្មែរជាប់សែស្រឡាយចិនសម្រាប់យកទៅសែនក្នុងពិធីបុណ្យចូលឆ្នាំប្រពៃណីចិន វៀតណាម នៅទី២៨ ខែមករា ឆ្នាំ២០២៥ ឆ្នាំនេះជ្រូកខ្វៃ គឺលក់ដាច់ខ្លាំង ដាច់ស្ទើរកជ្រូកលក់មិនបាន ហើយតម្លៃក៏ឡើងថ្លៃតាមហ្នឹងដែរ ។
តាមប្រសាសន៍លោក ឡយ ស៊ាងអាង ប្រធានគណៈកម្មការផ្សារអូរឬស្សី បានថ្លែងឲ្យដឹងទៀតថា មិននឹកស្មានទាល់តែសោះជ្រូកខ្វៃឆ្នាំនេះប្រសើរណាស់ លក់ដាច់ខ្លាំងមែនទែន លក់ដាច់ស្ទើរតែអ្នកលក់រកជ្រូកលក់មិនបាន ខុសប្លែកពីឆ្នាំកន្លងទៅ១គុណនឹង៣ ។
លោក ឡយ ស៊ាងអាង បន្តថា ពាក់ពន្ធក្នុងការលក់ដូរជ្រូកខ្វៃ នៅផ្សារអូរឬស្សីឆ្នាំនេះ បើយើងសង្កេតជារួមទៅឃើញថា ការលក់ដូររបស់អាជីវករលក់ជ្រូកខ្វៃលក់ដាច់ខ្លាំង ខ្ញុំឃើញសកម្មភាពពួកគាត់វេចខ្ចប់តាំងពីម៉ោង៨ ,៩យប់ ទុកឲ្យម៉ូយសម្រាប់យកទៅសែន ហើយព្រលឹមឡើងត្រឹមម៉ោង៧ព្រឹក ខ្ញុំសួរទីតាំងមួយចំនួនគាត់លក់បាន២ ទៅ៣រយជ្រូកបាត់ទៅហើយ មានន័យថា ការកម្ម៉ង់មានការកើនឡើងច្រើនឆ្នាំនេះ ។
ខ្ញុំពិបាកនឹងគណនាថា វាមានចំនួនប៉ុន្មានពិតប្រាកដ តែដោយសារឃើញទីតាំងគាត់លក់នៅខាងក្រៅ មួយជ្រុងផ្សារមាន១០ទៅ១២ទីតាំង មួយទីតាំងគិតថា ២០០ទៅ៣០០ក្បាល វាស្មើ២ទៅ៣ពាន់បាត់ទៅហើយ ចុះនៅបរិវេណជុំវិញផ្សារ ឃើញអាជីវករដាក់ដែកទ្រុងលក់ជ្រូកខ្វៃហ្នឹងក៏សកម្មភាពរបស់ពួកគាត់ក៏ប្រសើរដែរ ។
នៅខាងចំណតបេនឡានជាង១០ទីតាំងទៀតក៏គាត់លក់ដែរ ហើយស្មើនេះម៉ោង៩ ម៉ោង១០ព្រឹក លក់ចង់អស់នៅសល់តិចតួចៗ ហើយគាត់កំពុងធ្វើបន្តថែមទៀត ។ តែខ្ញុំគិតថា បើមើលតាមទូរលេខដែលគាត់លក់ហ្នឹងប្រហែលជាមិនក្រោមពី៥០០០ ក្បាលនោះទេ នេះគណនាត្រួសៗតែបើយើងសរុបជារួម ការលក់ជ្រូកខ្វៃឆ្នាំនេះ គឺមានភាពប្រសើរច្រើនមានន័យថា លក់ដាច់ច្រើនចំពោះតម្លៃក៏ឃើញមិនមានការប្រែប្រួលប៉ុន្មានទេ គ្រាន់តែខុសគ្នាតិចតួច ឬពេលដែលគាត់ខ្លះលក់នៅចុងក្រោយឃើញភ្ញៀវមកទិញច្រើន ក៏ឡើងថ្លៃតិចតួចតាមហ្នឹងអាហ្នឹងវាជាក់ស្តែងនៃអ្នកលក់ធម្មតាវាអញ្ចឹង តែសកម្មភាពលក់ដូរប្រសើរច្រើន ។
ប្រធានផ្សារអូឬស្សីបន្តទៀតថា គិតជាទូរលេខជ្រូកខ្វៃលក់ដាច់នៅថ្ងៃទី២៨ ខែមករា សម្រាប់ភ្ញៀវយកទៅសែនចូលឆ្នាំប្រពៃណីចិន វៀតណាម សរុបជិត១ម៉ឺនក្បាល បើប្រៀបធៀបឆ្នាំកន្លងទៅខុសគ្នា ១គុណនឹង៣ បើទោះជាតម្លៃមានការកើនឡើងតិចតួចយ៉ាងណាក៏ដោយ ។
ចំណែកអ្នកលក់ជ្រូកខ្វៃសប្បាយចិត្តខ្លាំងណាស់ ខណៈពេលឆ្នាំនេះនឹកស្មានមិនដល់ជ្រូកខ្វៃលក់ដាច់ហួសពីការគិតទុកជាមុន អាជីវករលក់ជ្រូកខ្វៃនៅផ្សារអូរឬស្សីទាំងអស់ សម្តែងនូវក្តីរីករាយដែលឆ្នាំនេះ ប្រមូលបានលុយកាក់ច្រើនប្រសើរជាងរាល់ឆ្នាំ បើទោះហត់នឿយយ៉ាងណាក៏ដោយ ។
អាជីវករលក់ជ្រូកខ្វៃម្នាក់ៗនិយាយថា ឆ្នាំនេះរកជ្រូកខ្វៃលក់មិនចង់ទាន់ឲ្យម៉ូយៗទេ ហើយមិននឹកស្មានថា ជ្រូកខ្វៃឆ្នាំនេះលក់ដាច់យ៉ាងដូច្នេះសោះ ព្រោះថ្ងៃដំបូងស្ងាត់ឈឹងអង្គុយអស់សង្ឃឹមគ្រប់គ្នា ៕
ចែករំលែកព័តមាននេះ