រាជធានីភ្នំពេញ ៖ ភ្នំពេញ គឺជារាជធានី នៃព្រះរាជាណាចក្រកម្ពុជា ជាមជ្ឈមណ្ឌលនយោបាយ សេដ្ឋកិច្ច សង្គមកិច្ច ទេសចរណ៍ វប្បធម៌…
រាជធានីភ្នំពេញ ៖ ភ្នំពេញ គឺជារាជធានី នៃព្រះរាជាណាចក្រកម្ពុជា ជាមជ្ឈមណ្ឌលនយោបាយ សេដ្ឋកិច្ច សង្គមកិច្ច ទេសចរណ៍ វប្បធម៌ និងការទូត ដែលមានការអភិវឌ្ឍលើគ្រប់វិស័យ។ រាជធានីភ្នំពេញ មានផ្ទៃដីសរុប ៦៩៥,៤៦គីឡូម៉ែត្រ មាន១៤ខណ្ឌ, ១០៥សង្កាត់ និង៩៥៣ភូមិ មានប្រជាពលរដ្ឋរស់នៅសរុប ១,៨៤១,៦៦៦ ស្រី ៩៥៤,៤៧២ ស្ថិតនៅភាគខាងត្បូង នៃប្រទេសកម្ពុជា ត្រង់ទន្លេចតុមុខ ជាចំណុចប្រសព្វរវាង ទន្លេមេគង្គលើ ទន្លេមេគង្គក្រោម ទន្លេសាប និងទន្លេបាសាក់ ដែលមានព្រំប្រទល់ខាងលិចទល់នឹងស្រុកអង្គស្នួល ខាងកើតទល់នឹងក្រុងអរិយក្សត្រ ស្រុកគៀនស្វាយ ខាងជើងទល់នឹងស្រុកមុខកំពូល ស្រុកពញាឮ ខាងត្បូងទល់នឹងស្រុកកណ្តាលស្ទឹង ក្រុងតាខ្មៅ ខេត្តកណ្តាល ។
យោងតាមរបាយការណ៍របស់រដ្ឋបាលរាជធានីភ្នំពេញ បានឱ្យដឹងថា មន្ត្រីជំនាញបានចុះតាមដាន និងអង្កេតតម្លៃប្រេងឥន្ធនៈនៅតាមស្ថានីយ៍ដេប៉ូ ចែកចាយប្រេងក្នុងរាជធានីភ្នំពេញ បានចំនួន ៣៧៦ទីតាំង រួមមាន ៖ ស្ថានីយ៍ដេប៉ូលក់ត្រឹមត្រូវមាន ៣២០ទីតាំង, ស្ថានីយ៍ដេប៉ូ លក់ទាបជាង មាន៥៦ទីតាំង ។
របាយការណ៍ដដែល បានឱ្យដឹងទៀតថា យោងតាមទិន្នន័យ ដែលទទួលបានពីសាខា ក.ប.ប រាជធានីភ្នំពេញ ស្ថានីយ៍ និងដេប៉ូលក់ប្រេងសរុបមានចំនួន ៥២៧ទីតាំង ក្នុងនោះខណ្ឌច្បារអំពៅ ចំនួន៦២ទីតាំង ខណ្ឌចំការមនចំនួន៣៦ទីតាំង ខណ្ឌបឹងកេងកង ១៣ទីតាំង ខណ្ឌ៧មករា ០៩ទីតាំង ខណ្ឌដូនពេញ ១៥ទីតាំង ខណ្ឌមានជ័យ ៥៧ទីតាំង ខណ្ឌដង្កោ ៤៩ទីតាំង ខណ្ឌពោធិ៍សែនជ័យ ៧១ទីតាំង ខណ្ឌសែនសុខ ៨១ទីតាំង ខណ្ឌទួលគោក ២១ទីតាំង ខណ្ឌកំបូល ២៦ទីតាំង ខណ្ឌជ្រោយចង្វារ ២៦ទីតាំង ខណ្ឌឫស្សីកែវ ១៨ទីតាំង និងខណ្ឌព្រែកព្នៅ មានចំនួន៤៣ទីតាំង ។
របាយការណ៍ដដែល បានឱ្យដឹងទៀតថា ក្នុងរាជធានីភ្នំពេញ មានរោងចក្រ និងសហគ្រាសផលិត ចំនួន ២៤,៦៣៧ទីតាំង ក្នុងនោះ ៧១០ជារោងចក្រ វាយនភណ្ឌសំលៀកបំពាក់ និងមានកម្មករសរុប ៧២៩,៩៩០នាក់ (ទិន្នន័យសរុបគិតត្រឹម ថ្ងៃ១៨ ខែតុលាឆ្នាំ២០២៤ ទទួលបានពីមន្ទីរការងារ និងបណ្តុះបណ្តាលវិជ្ជាជីវៈ)។ ចំណែកតំបន់សេដ្ឋកិច្ចពិសេស មាន២ទីតាំង គឺតំបន់សេដ្ឋកិច្ចពិសេសភ្នំពេញ មានទំហំផ្ទៃដី ៣៦០(ហិកតា) ក្នុងសង្កាត់កន្ទោក, សង្កាត់ភ្លើងឆេះរទេះ និងសង្កាត់បឹងធំ ខណ្ឌកំបូល រាជធានីភ្នំពេញ និងតំបន់សេដ្ឋកិច្ចពិសេស ឃែរី វើលប្រ៊ីដ ឡូជីស្ទិក មានទំហំផ្ទៃដី ៦៣(ហិកតា) ក្នុងសង្កាត់ព្រែកកំពឹស ខណ្ឌដង្កោ រាជធានីភ្នំពេញ ។
សូមបញ្ជាក់ថា បើមិនប្រែប្រួលទេនោះ រដ្ឋបាលរាជធានីភ្នំពេញ គ្រោងនឹងធ្វើពិធីសន្និបាតបូកសរុបលទ្ធផលការងារប្រចាំឆ្នាំរបស់ខ្លួនសម្រាប់ឆ្នាំ២០២៤ និងលើកទិសដៅបន្ត ឆ្នាំ២០២៥ មានរយៈពេលពីរថ្ងៃ គីថ្ងៃទី២១ និងថ្ងៃទី២២ ខែមករា នៅសណ្ឋាគារសុខាភ្នំពេញ ដែលពិធីបើកស្ថិតក្នុងអធបតីភាពលោក ឃួង ស្រេង អភិបាលរាជធានីភ្នំពេញ និងលោក ម៉ប់ សារិន ប្រធានក្រុមប្រឹក្សារាជធានីភ្នំពេញ ចំណែកពិធីបិទសន្និបាត ស្ថិតក្នុងអធបតីភាព ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ៕
ចែករំលែកព័តមាននេះ