រាជធានីភ្នំពេញ ៖ ភ្នំពេញ គឺជារាជធានី នៃព្រះរាជាណាចក្រកម្ពុជា ជាមជ្ឈមណ្ឌលនយោបាយ សេដ្ឋកិច្ច សង្គមកិច្ច ទេសចរណ៍ វប្បធម៌…
រាជធានីភ្នំពេញ ៖ ភ្នំពេញ គឺជារាជធានី នៃព្រះរាជាណាចក្រកម្ពុជា ជាមជ្ឈមណ្ឌលនយោបាយ សេដ្ឋកិច្ច សង្គមកិច្ច ទេសចរណ៍ វប្បធម៌ និងការទូត ដែលមានការអភិវឌ្ឍលើគ្រប់វិស័យ។ រាជធានីភ្នំពេញ មានផ្ទៃដីសរុប ៦៩៥,៤៦គីឡូមម៉ែត្រ មាន១៤ខណ្ឌ, ១០៥សង្កាត់ និង៩៥៣ភូមិ មានប្រជាពលរដ្ឋរស់នៅសរុប ១,៨៤១,៦៦៦ ស្រី ៩៥៤,៤៧២ ស្ថិតនៅភាគខាងត្បូង នៃប្រទេសកម្ពុជា ត្រង់ទន្លេចតុមុខ ជាចំណុចប្រសព្វរវាង ទន្លេមេគង្គលើ ទន្លេមេគង្គក្រោម ទន្លេសាប និងទន្លេបាសាក់ ដែលមានព្រំប្រទល់ខាងលិចទល់នឹងស្រុកអង្គស្នួល ខាងកើតទល់នឹងក្រុងអរិយក្សត្រ ស្រុកគៀនស្វាយ ខាងជើងទល់នឹងស្រុកមុខកំពូល ស្រុកពញាឮ ខាងត្បូងទល់នឹងស្រុកកណ្តាលស្ទឹង ក្រុងតាខ្មៅ ខេត្តកណ្តាល ។
យោងតាមរបាយការណ៏របស់រដ្ឋបាលរាជធានីភ្នំពេញ បានឱ្យដឹងថា សម្រាប់ឆ្នាំ២០២៤កន្លងមកនេះ មន្ទីរសុខាភិបាលរាជធានីភ្នំពេញ បានពិនិត្យ និងពិគ្រោះជំងឺជូនប្រជាពលរដ្ឋ បានចំនួន ៤៦២,០៣១នាក់ អ្នកជំងឺករណីថ្មី មានចំនួន ៣១០,០៦៣នាក់ អ្នកជំងឺសម្រាកពេទ្យ មានចំនួន ១១៣,១២៤នាក់ មនុស្សពេញវ័យ (១៥-៤៥ឆ្នាំ) បានមកទទួលសេវាធ្វើតេស្តឈាមរកមេរោគអេដស៍ដោយស្ម័គ្រចិត្ត និងរក្សាការសម្ងាត់ ចំនួន ៤១,១៥៨នាក់, តេស្តឈាមមានលទ្ធផលមេរោគអេដស៍(វិជ្ជមាន) ចំនួន ១,២៨១នាក់។ របាយការបន្តថា អ្នកជំងឺអេដស៍សកម្ម បានទទួលការព្យាបាលដោយឱសថប្រឆាំងមេរោគអេដស៍ ចំនួន ២៥,០៩៤នាក់ ក្នុងនោះស្រីមានចំនួន ៩,៩៨៦នាក់ ។
ចំពោះពិនិត្យផ្ទៃពោះស្ត្រី មុនពេលសម្រាលកូន បានចំនួន ១៦៤,៣៩៧នាក់, ចំនួនស្ត្រីសម្រាលកូនសរុប ៦,៩២២នាក់, ចំនួនស្ត្រីពន្យារកំណើតបន្តសរុប ៨,៥០៩នាក់។ បានផ្តល់ថ្នាំបង្ការជំងឺរបេងដល់កុមារអាយុក្រោម១ឆ្នាំ បានចំនួន១៧,២៦៦នាក់, ផ្តល់ថ្នាំបង្ការជំងឺតេតាណូស ដល់ស្ត្រីមានផ្ទៃពោះ បានចំនួន ៥៣,៣៦៤នាក់ និងបានផ្តល់ថ្នាំបង្ការជំងឺតេតាណូសដល់ ស្ត្រីវ័យបន្តពូជ អាយុពី ១៥-៤៤ឆ្នាំ បានចំនួន ៤០,៥៨៧នាក់ និងបានពិនិត្យ និងព្យាបាលជំងឺដល់ប្រជាពលរដ្ឋក្រីក្រ ដោយលើកលែងបង់ថ្លៃសេវា ចំនួន ៥២,៤៩៦នាក់ បានពិនិត្យ និងព្យាបាលជំងឺដល់ប្រជាពលរដ្ឋក្រីក្រក្រោមគម្រោងមូលនិធិសមធម៌ចំនួន ១០០,៩១៧នាក់ និងពិនិត្យ និងព្យាបាលជំងឺដល់ប្រជាពលរដ្ឋតាមរយៈគម្រោងបេឡាជាតិរបបសន្តិសុខសង្គម (ប.ស.ស) ចំនួន ១៩៧,៨៦២នាក់ ។
បានផ្តល់សេវាពិនិត្យមុនពេលសម្រាល សម្រាលកូន និងពិនិត្យក្រោយសម្រាល ព្រមទាំងការតាមដាន សុខភាពកុមារ ជូនដល់ស្ត្រីមានផ្ទៃពោះ និងកុមារអាយុក្រោម២ឆ្នាំ នៃគ្រួសារក្រីក្រ ដែលទទួលការបង់ថ្លៃ ជំនួសដោយមូលនិធិសមធម៌ និងទទួលថវិកាឧបត្ថម្ភតាមគោលនយោបាយរាជរដ្ឋាភិបាល មានចំនួន ១២.៦៩៦នាក់។ ការងារប្រយុទ្ធនឹងជំងឺរបេង៖ ជំងឺរបេងBK(+) ៦៤០ករណី, របេងBK(-)/Clinic ៥៨៣ករណី និងរបេង ក្រៅសួត ៥០៧ករណី។ បានចុះពិនិត្យសាកសព និងចេញលិខិតអនុញាតឱ្យបូជាឬបញ្ចុះសព សរុបចំនួន ១.៤៧០នាក់។ សពដែល ត្រូវបានបូជា មានចំនួន ១.១៤១នាក់ និង បញ្ចុះ មានចំនួន ៣២៩នាក់ ។
របាយការណ៏ដដែលបានបញ្ជាក់ថា បានសហការជាមួយកងកម្លាំងសង្គ្រោះចំណុះកងពលតូចលេខ៧០ចំនួន៦៧នាក់ នៃកងទ័ពជើងគោក ចុះ ធ្វើយុទ្ធនាការបាញ់ថ្នាំសម្លាប់មូសក្នុងឆ្នាំ២០២៤នេះ ចំនួន០២លើក នៅតាមមូលដ្ឋានខណ្ឌ សង្កាត់ ភូមិ សហគមន៍ សាលារៀន វត្ត លូ និងប្រឡាយនានាក្នុងរាជធានីភ្នំពេញ ដោយប្រើប្រាស់រថយន្តចំនួន ១៨ គ្រឿង ម៉ាស៊ីនបាញ់ថ្នាំសម្លាប់មូសខ្នាតតូចចំនួន ៣៤គ្រឿង និងមន្ត្រីនៃមន្ទីរសុខាភិបាលនៃរដ្ឋបាលរាជធានី ភ្នំពេញចំនួន ០៣រូប ដោយប្រើរថយន្ត១គ្រឿង ម៉ាស៊ីនធំ១គ្រឿង និងម៉ាស៊ីនតូច១គ្រឿង និងការិយាល័យ សុខាភិបាល ស្រុកប្រតិបត្តិទាំង៧ ដោយមានការសម្របម្រួលពីអាជ្ញាធរខណ្ឌ សង្កាត់ ភូមិ សហគមន៍ និង គណៈគ្រប់គ្រងសាលារៀនផងដែរ។ យុទ្ធនាការទាំងពីរលើកនេះប្រើរយៈពេល២៩ថ្ងៃ ក្រុមការងារបានបាញ់ ថ្នាំសម្លាប់មូសនៅតាមសង្កាត់ទាំង១០៥ ក្នុងរាជធានីភ្នំពេញ ដោយប្រើប្រាស់អស់ប្រេងម៉ាស៊ូតចំនួន ១០.៦០០លីត្រ ប្រេងសាំងចំនួន ២.១៣០លីត្រ និងថ្នាំបាញ់សម្លាប់មូស (Insecticide for Spraying 1000ml ដែលបើកមកពីឃ្លាំងឱសថកណ្តាលរបស់ក្រសួងសុខាភិបាល) ចំនួន ១.២០៩លីត្រ ។
សូមបញ្ជាក់ថា រដ្ឋបាលរាជធានីភ្នំពេញ គ្រោងនឹងធ្វើពិធីសន្និបាតបូកសរុបលទ្ធផលការងារប្រចាំឆ្នាំរបស់ខ្លួនសម្រាប់ឆ្នាំ២០២៤ និងលើកទិសដៅបន្តឆ្នាំ២០២៥ មានរយៈពេលពីរថ្ងៃ គីថ្ងៃទី២១ និងថ្ងៃទី២២ ខែមករា នៅសណ្ឋាគារសុខាភ្នំពេញ ដែលពិធីបើកស្ថិតក្នុងអធបតីភាព លោក ឃួង ស្រេង អភិបាលរាជធានីភ្នំពេញ និងលោក ម៉ប់ សារិន ប្រធានក្រុមប្រឹក្សារាជធានីភ្នំពេញ ចំណែកពិធីបិទសន្និបាត ស្ថិតក្នុងអធបតីភាព ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ៕
ចែករំលែកព័តមាននេះ