ខេត្តពោធិសាត់ ៖ ថ្ងៃទី១០ ខែមករា ឆ្នាំ២០២៥ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំគណៈប្រតិភូក្រសួង…
ខេត្តពោធិសាត់ ៖ ថ្ងៃទី១០ ខែមករា ឆ្នាំ២០២៥ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំគណៈប្រតិភូក្រសួង អញ្ជើញចុះត្រួតពិនិត្យវឌ្ឍនភាពការងារសាងសង់ហេដ្ឋារចនាសម្ព័ន្ធជនបទ មានផ្លូវ និងសំណង់សិល្បការ្យនៅភូមិប៊ុនរ៉ានីសែនជ័យ ដំណាក់តទ្រយឹង ដែលជាទីតាំងដីសម្បទានសង្គមកិច្ចសម្រាប់អតីតយុទ្ធជន ស្ថិតនៅឃុំព្រងិល ស្រុកភ្នំក្រវាញ ខេត្តពោធិ៍សាត់ ។
សូមបញ្ជាក់ថា ក្រសួងអភិវឌ្ឍន៍ជនបទ បាននិងកំពុងចូលរួមកសាងហេដ្ឋារចនាសម្ព័ន្ធគមនាគមន៍ជនបទនៅក្នុងភូមិប៊ុនរ៉ានីសែនជ័យដំណាក់តទ្រយឹង មានប្រវែងសរុប ៥៩,៥០គីឡូម៉ែត្រ ដោយប្រើប្រាស់ថវិការបស់រាជរដ្ឋាភិបាលកម្ពុជា ក្នុងនោះ ផ្លូវមេចំនួន ១ខ្សែ ប្រវែងសរុប ៨,១០ គីឡូម៉ែត្រ ជាប្រភេទផ្លូវក្រាលល្បាយក្រួស (បានកសាងចប់ជាស្ថាពរនៅឆ្នាំ២០២១) និងផ្លូវក្នុងតំបន់ ចំនួន ១៣ខ្សែ ជាប្រភេទផ្លូវក្រាលល្បាយក្រួស ប្រវែងសរុប ៥១,៤០ គីឡូម៉ែត្រ ។ ជាលទ្ធផល ក្នុងឆ្នាំ២០២៤ កន្លងទៅ ក្រសួងបានស្ថាបនាផ្លូវកាត់បណ្តោយ បានចំនួន ២ខ្សែបន្ថែមទៀត ប្រវែងសរុប ១០,២០គីឡូម៉ែត្រ ហើយក្នុងផែនការឆ្នាំ២០២៥ ក្រសួងគ្រោងនឹងស្ថាបនាកំណាត់ផ្លូវកាត់បណ្តោយ ចំនួន ១កំណាត់ មានប្រវែង ៤គីឡូម៉ែត្រ។ ដោយឡែកនៅសល់ផ្លូវចំនួន ៧កំណាត់ ទៀត ប្រវែងសរុប ២៧,៤០គីឡូម៉ែត្រ នឹងត្រូវស្ថាបនានៅក្នុងផែនការឆ្នាំបន្តបន្ទាប់ ។
ក្នុងឱកាសនោះ ឯកឧត្តមរដ្ឋមន្ដ្រី និងគណៈប្រតិភូ បានអញ្ជើញជួបសំណេះសំណាល ដោយបានពាំនាំនូវប្រសាសន៍ផ្ដាំផ្ញើសួរសុខទុក្ខពីសំណាក់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា, និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ព្រមទាំងបាននាំយកអំណោយដ៏ថ្លៃថ្លារបស់សម្ដេច ជូនចំពោះគ្រួសារអតីតយុទ្ធជនដែលរស់នៅទីនោះផងដែរ ។
សូមរំលឹកជូនផងដែរថា ភូមិប៊ុនរ៉ានីសែនជ័យដំណាក់តទ្រយឹង គឺជាភូមិថ្មីមួយ ដែលត្រូវបានរាជរដ្ឋាភិបាលក្នុងអាណត្តិមុន បង្កើតឡើងក្នុងឆ្នាំ២០២១ ដើម្បីចែកដី និងលំនៅដ្ឋានជូនអតីតយុទ្ធជន និងគ្រួសារអតីតយុទ្ធជនសរុបចំនួន ៦២៨គ្រួសារ ហើយរាជរដ្ឋាភិបាលក្នុងពេលបច្ចុប្បន្ននៅតែបន្តកិច្ចការងារអភិវឌ្ឍន៍ហេដ្ឋារចនាសម្ព័ន្ធនានា ដើម្បីបម្រើជូននូវសេវាសាធារណៈចាំបាច់ដូចជា សាលារៀន មន្ទីរពេទ្យ វត្តអារ៉ាម ទឹកស្អាត តបណ្តាញអគ្គីសនី ដើម្បីឱ្យការរស់នៅរបស់បងប្អូនប្រជាពលរដ្ឋប្រកបដោយវិបុលភាព ៕
ចែករំលែកព័តមាននេះ