រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឲ្យដឹងថា កន្លងមកមានក្រុម Youtuber និង…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឲ្យដឹងថា កន្លងមកមានក្រុម Youtuber និង Tiktoker ចង់បានល្បីខ្លួនឯងហោះមកកម្ពុជា បន្លំធ្វើជាខ្លួនត្រូវបានចាប់ជំរិត នាំឱ្យគេយល់ថា នៅកម្ពុជាមានការចាប់ជំរិត និងការជួញដូរមនុស្ស ខូចដល់កេរ្តិ៍ឈ្មោះរបស់កម្ពុជា តែករណីនេះអាជ្ញាធរបានចាត់វិធានការបានភ្លាមៗ ។
សម្តេចមហាបវរធិបតី ហ៊ុន ម៉ាណែត បានថ្លែងក្នុងឱកាសអញ្ជើញជាអធិបតីប្រារព្ធទិវាជាតិប្រឆាំងអំពើជួញដូរមនុស្ស ១២ ធ្នូ ឆ្នាំ២០២៤ លើកទី១៨ ក្រោមប្រធានបទ «កម្ពុជាប្រឆាំងដាច់ខាតអំពើជួញដូរមនុស្សគ្រប់ទម្រង់ និងគ្រប់មធ្យោបាយក្នុងយុគសម័យឌីជីថល» នៅព្រឹកថ្ងៃទី១២ ខែធ្នូ ឆ្នាំ២០២៤ នៅសាលមហោស្របកោះពេជ្រ យ៉ាងដូច្នេះថា ៖«អ្នក Youtuber និង Tiktoker ចង់បានល្បីខ្លួនឯងមកកម្ពុជា ធ្វើជាបន្លំថា គេចាប់ជំរិតគាត់ គេធ្វើបាបគាត់ថា នៅកម្ពុជាមានការចាប់ជំរិត ជួញដូរមនុស្ស ។ល។ គាត់ទៅទិញខោអាវនៅទឹកថ្លា ធ្វើទាហានឱ្យគ្នាគាត់តែ២នាក់នឹង គាត់ធ្វើដើម្បីបាន Views (អ្នកទស្សនា) រាប់លាននាក់ ទីបំផុត Fan របស់គាត់ដែលមើលនោះច្រឡំថា កម្ពុជានេះអាក្រក់ណាស់ ចុះមកមិនទាន់បានចាប់ទៅហើយ ទីបំផុតគាត់អត់ទេ គាត់ទៅទិញខោអាវដល់គេសួរទៅ ឯកឧត្តម គួច ចំរើន ហៅសួរធ្វើម៉េច គាត់ចង់បានឱ្យ View គាត់ល្បី ដើម្បីគាត់ទៅលក់ផលិតផលរបស់គាត់ តែគាត់យកកម្ពុជាធ្វើជាអាជីវកម្មរបស់គាត់តាមការបំផ្លាញ» ។
សម្តេចមហាបវរធិបតី ក៏បានបង្ហើប អំពីការព្រមានទៅកាន់អ្នកដែលបានអន្តរាគមន៍ មកលើបុគ្គលជា Youtuber ក៏ដូចជា Tiktoker មកពីកោះតៃវ៉ាន់ខាងលើ ក្រោមលេសថា ម្តាយឈឺដេកលើកន្ទេល ។
ទាក់ទិននឹងករណីនេះ សម្តេចមហាបវរធិបតី ក៏បានតបទៅវិញថា «ខ្ញុំប្រាប់ថា អត់ទេ គាត់ឱ្យគេ១លាន់នាក់រាប់លាននាក់មើលគាត់ ហើយយល់ខុសពីកម្ពុជា តើយើងឱ្យស្ងាត់ៗកើតទេ? អត់ទេ ចឹងពេលនោះដាក់ឱ្យ Maximum ដូចប៉ុន្មានឆ្នាំ ២ឆ្នាំ ឬ៤ឆ្នាំ» ។
សម្តេចមហាបវរធិបតី ហ៊ុន ម៉ាណែត បានបន្ថែមថា «បើសិនយកហេតុផលថា ម្តាយឈឺ លែង ខ្ញុំថា គួរដាក់ឱ្យខ្លាំងជាងនឹងទៀតតាមផ្លូវច្បាប់ ព្រោះបើម្តាយឈឺ កូនកត្តញ្ញូ គេមិនដែលដើរមកបំផ្លាញប្រទេសផ្សេងធ្វើចឹងទេ គឺនៅមើលឪពុកម្តាយដេកកន្ទេល នៅមើលថែទាំ ឯងម្តាយដេកកន្ទេល ចេញមកដើរផែនការរបស់គាត់មកធ្វើកំពង់សោមហើយ ប្រុងមកថតនៅភ្នំពេញ ហើយសៀមរាប ហើយហោះទៅប្រទេសផ្សេងទៀតធ្វើដូចគ្នា»។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា រាជរដ្ឋាភិបាលកម្ពុជា សង្ឃឹមថា ប្រទេសជាមិត្តទាំងឡាយ និងអនុវត្តដូចគ្នាដើម្បីជាឆន្ទៈនៅក្នុងការគោរព និងការរក្សាកិត្តិយសគ្នាទៅវិញទៅមក និងដើម្បីជាកម្លាំងរួម ដើម្បីប្រយុទ្ធប្រឆាំងនឹងសត្រូវរួម គឺឧក្រិ.ដ្ឋកម្មឆ្លងដែន ដោយត្រូវបន្តកិច្ចសហការ និងមិនធ្វើការសន្និដ្ឋានចោទប្រកាន់ ដោយខ្វះការសិក្សាស្វែងយល់ អំពីសភាពការពិតដែលនាំឱ្យប៉ះពាល់ដល់ចំណងមិត្តភាព ។
សម្តេចមហាបវរធិបតីបានថា «រាជរដ្ឋាភិបាលកម្ពុជា សង្ឃឹមថា ប្រទេសជាមិត្តទាំងឡាយ និងអនុវត្តដូចគ្នា ដើម្បីជាឆន្ទៈនៅក្នុងការគោរព និងការរក្សាកិត្តិយសគ្នាទៅវិញទៅមក និងដើម្បីជាកម្លាំងរួម ដើម្បីប្រយុទ្ធប្រឆាំងនឹងសត្រូវរួម គឺឧក្រិ.ដ្ឋកម្មឆ្លងដែន ដែលបាន និងកំពុងបំផ្លាញសេចក្តីសុខប្រជាពលរដ្ឋយើងទាំងអស់គ្នា» ។
សម្តេចមហាបវរធិបតី បានបញ្ជាក់បន្ថែមថា «ក្នុងនាមជាប្រទេសជិតខាងល្អ និងជាប្រទេសក្នុងតំបន់កម្ពុជាជឿជាក់ថា យើងនឹងបន្តកិច្ចសហប្រតិបត្តិការល្អ ដោយមិនធ្វើការសន្និដ្ឋានចោទប្រកាន់ ដោយខ្វះការសិក្សាស្វែងយល់ អំពីសភាពការពិត ដែលនាំឱ្យប៉ះពាល់ដល់ចំណងមិត្តភាព និងកិច្ចសហការល្អនោះឡើយ មានតែកិច្ចសហការទេ ទើបអាចដោះស្រាយបញ្ហារួមបាន»៕
ចែករំលែកព័តមាននេះ