- ភ្នំពេញ
បុរសខ្លាំងនៃកម្ពុជា សម្តេចតេជោ ហ៊ុន សែន ប្រធានព្រឹទ្ធសភាបានកំណត់ពេលវេលាចេញទៅទស្សនៈកិច្ចនៅមជ្ឈិមបូព៌ាដល់ទៅ៤ប្រទេស នៅក្នុងដំណើរមួយសប្តាហ៍រាប់ចាប់ពីថ្ងៃទី៨ រហូតដល់ថ្ងៃទី១៤ ខែធ្នូ ឆ្នាំ២០២៤ ។…
បុរសខ្លាំងនៃកម្ពុជា សម្តេចតេជោ ហ៊ុន សែន ប្រធានព្រឹទ្ធសភាបានកំណត់ពេលវេលាចេញទៅទស្សនៈកិច្ចនៅមជ្ឈិមបូព៌ាដល់ទៅ៤ប្រទេស នៅក្នុងដំណើរមួយសប្តាហ៍រាប់ចាប់ពីថ្ងៃទី៨ រហូតដល់ថ្ងៃទី១៤ ខែធ្នូ ឆ្នាំ២០២៤ ។ តើសម្តេចតេជោ ចំណាយពេលដ៏យូរធ្វើដំណើរទៅទីនោះ ដើម្បីអ្វីទៅ?
ដំណើរទស្សនកិច្ចផ្លូវរដ្ឋរបស់បុរសខ្លាំងនៃកម្ពុជាទៅកាន់អារ៉ាប៊ីសាអូឌីត រដ្ឋកាតា សាធារណរដ្ឋតួកគីយេ និងអេមីរ៉ាត អារ៉ាប់រួម នៅពេលនេះតំណាងឱ្យចំណុចសំខាន់មួយឆ្ពោះទៅរកការធ្វើពិពិធកម្ម ភាពជាដៃគូអន្តរជាតិរបស់កម្ពុជាស្របតាមគោលដៅដែលព្រឹទ្ធសភាបានប្រកាសថា ស្ថាប័នកំពូលរបស់ជាតិនេះនឹងប្រកាន់យកជំហរធ្វើនយោបាយការទូតសភា ដែលនឹងផ្តល់ផលទាំងសេដ្ឋកិច្ច សង្គម និងនយោបាយ ។
ម្យ៉ាងវិញទៀត ដំណើរជាផ្លូវការរបស់មេដឹកនាំដ៏មានឥទ្ធិពលរបស់កម្ពុជានៅពេលនេះក៏អាចបញ្ជាក់ពីមហិច្ឆតារបស់កម្ពុជា ក្នុងការពង្រឹងទំនាក់ទំនងជាមួយប្រទេសសំខាន់ៗនៅក្នុងតំបន់ដែលមានសារៈសំខាន់សម្រាប់សន្តិសុខថាមពលឱកាសវិនិយោគ និងឥទ្ធិពលភូមិសាស្ត្រនយោបាយរបស់ខ្លួន ។
នៅតំបន់មជ្ឈិមបូព៌ាដែលមាន១៧ប្រទេស ប្រទេសទាំងបួនដែលបុរសខ្លាំងនឹងអញ្ជើញធ្វើដំណើរទៅនោះ គឺសុទ្ធសឹងតែជាប្រទេសមហាអំណាយទាំងយោធា និងសេដ្ឋកិច្ចនៅក្នុងតំបន់ ដូចនេះវាពិតជាមានភាពចាំបាច់ណាស់ដែលត្រូវតែមានការត្រួសត្រាយផ្លូវ ដើម្បីធ្វើយ៉ាងណាលើកកម្ពស់ការធ្វើពិពិធកម្មការទូត របស់កម្ពុជា ។
អស់រយៈពេលជាច្រើនទស្សវត្សមកហើយ គោលនយោបាយការបរទេសរបស់កម្ពុជាបានផ្តោតសំខាន់លើទំនាក់ទំនងរបស់ខ្លួនជាមួយអាស៊ាន ចិន និងប្រទេសលោកខាងលិច ប៉ុណ្ណោះ ។ សម្រាប់តំបន់មជ្ឃិមបូព៌ា មិនមែនកម្ពុជាមិនមានទំនាក់ទំនងការទូតនោះទេ គ្រាន់តែទំនាក់ទំនងនោះបានធ្វើនៅក្នុងកម្រិតមួយ ។ ប៉ុន្តែនៅពេលបច្ចុប្បន្ននេះវាដល់ពេលដែលកម្ពុជាត្រូវតែលើកកម្ពស់ទំនាក់ទំនងការទូត និងភាពបុរេសកម្មរបស់ខ្លួនទៅក្នុងតំបន់នោះ ។
តាមរយៈដំណើរទស្សនកិច្ចទៅកាន់ប្រទេសអារ៉ាប៊ីសាអូឌីត រដ្ឋកាតា និងអេមីរ៉ាត អារ៉ាប់រួម ប្រទេសកម្ពុជាអាចនឹងពង្រឹងកិត្យានុភាពកាន់តែសកម្មនៅក្នុងបណ្តាញសេដ្ឋកិច្ច និងទីផ្សារនៃក្រុមប្រទេសដែលជាសមាជិកនៃក្រុមប្រឹក្សាសហប្រតិបត្តិការឈូងសមុទ្រដែលជាប្រទេសល្បីល្បាញខាងធនធានថាមពល និងមូលនិធិដ៏ច្រើនសន្ធឹកសន្ធាប់ ដោយសារប្រទេសទាំងនេះអាចចាត់ទុកជាបងធំមួយនៅក្នុងក្រុមប្រទេសនេះ ។ ចំណែកសាធារណរដ្ឋតួកគីយេ ត្រូវបានគេដឹងថា គឺជាបងធំនៅមជ្ឈិមបូព៌ា ដែលមានទាំងសេដ្ឋកិច្ច និង យោធាខ្លាំងក្លា ។ តើកម្ពុជាអាចមានអ្វីដែលអាចចាត់ទុកថា ជាសរសរស្តម្ភនៅក្នុងការជំរុញកិច្ចសហប្រតិបត្តិការកម្ពុជា-មជ្ឈិមបូព៌ា?
សេដ្ឋកិច្ចរបស់កម្ពុជាកំពុងតែពឹងផ្អែកយ៉ាងខ្លាំងលើវិស័យកសិកម្ម វាយនភ័ណ្ឌ និងទេសចរណ៍ ។ ដូច្នេះការពង្រឹងការទូតជាមួយនឹងប្រទេសទាំងនេះអាចជាច្រកមួយដែលកម្ពុជាអាចនឹងទទួលបានអត្ថប្រយោជន៍យ៉ាងច្រើនពីការវិនិយោគ និងជំនាញនៅមជ្ឈិមបូព៌ាលើវិស័យទាំងនេះ ប្រសិនបើបណ្តាប្រទេសទាំងនោះចាប់អារម្មណ៍ ។
គោលដៅនេះអាចនឹងទៅរួចពីព្រោះនៅពេលនេះបណ្តាប្រទេសនៅមជ្ឈិមបូព៌ាកំពុងតែដាក់ចេញគោលការពិពិធកម្មសេដ្ឋកិច្ចក្រៅពីប្រេងតាមរយៈការជំរុញការវិនិយោគដែលអាចធានាសន្តិសុខស្បៀង និងនិរន្តភាពនៃសេដ្ឋកិច្ចរបស់ខ្លួនក្រៅពីធនធានប្រេងដែលខ្លួនមាន ។ ដោយឡែ កប្រទេសកម្ពុជា និងមជ្ឈិមបូព៌ាក៏មានធ្នាក់រកគ្នាស្រាប់ តាមរយៈសហគមន៍នៃជនមូស្លីមនៅកម្ពុជាដែលនៅពេលនេះទំនាក់ទំនងរវាងប្រជាជន និងប្រជាជនរបស់កម្ពុជានិងមជ្ឈិមបូព៌ា គឺត្រូវបានផ្សារភ្ជាប់គ្នាខ្លះៗរួចទៅហើយ ជាពិសេសតាមរយៈកម្មវិធីអប់រំ និងកិច្ចសហប្រតិបត្តិការខាងសាសនា ។ អាហារូបករណ៍ ការផ្លាស់ប្តូរវប្បធម៌ និងការសន្ទនាអន្តរជំនឿអាចធ្វើឲ្យការយល់ដឹងគ្នាទៅវិញទៅមកកាន់តែស៊ីជម្រៅ និងលើកកម្ពស់សុច្ឆន្ទៈទ្វេភាគី ។
ទេសចរណ៍ក៏ជាច្រកសំខាន់ដែរ ប្រសិនបើកម្ពុជាអាចធ្វើ និងទាក់ទាញចំណាប់អារម្មណ៍ប្រជាពលរដ្ឋនៅមជ្ឈិមបូព៌ាឲ្យពួកគេចាប់អារម្មណ៍ស្វែងរកទិសដៅថ្មី និងសម្បូរបែបខាងវប្បធម៌ដូចដែលកម្ពុជាមាន ប្រាសាទអង្គរវត្ត និងកន្លែងប្រវត្តិសាស្ត្រផ្សេងៗទៀត ។
សរុបទៅដំណើរទស្សនៈកិច្ចរយៈពេលមួយសប្តាហ៍ទៅកាន់ប្រទេស៤នៅមជ្ឈិមបូព៌ារបស់បុរសខ្លាំងនៃកម្ពុជា គឺជាការឆ្លុះបញ្ចាំងពីភាពចាំបាច់នៃការធ្វើពិពិធកម្មការទូតរបស់កម្ពុជានៅពេលដែលចរន្តពហុភាគី និងពហុប៉ូលកំពុងតែផុលផុស ស្របពេលដែលសណ្តាប់ធ្នាប់ពិភពលោកហាក់រង្គោះរង្គឺ ។ នៅក្នុងដំណាក់កាលនេះ ការកសាងទំនុកចិត្តពីមិត្តចាស់ និង ការបង្កើនការយល់ដឹងគ្នាទៅវិញទៅមកជាមួយនឹងមិត្តថ្មីក៏មានសារៈសំខាន់សម្រាប់ធានានិងជាយ័នការពារភាពជាដៃគូ និងការអភិវឌ្ឍរួមគ្នាប្រកបដោយនិរន្តរភាព ។
បេសកកម្មការទូតទៅកាន់មជ្ឈិមបូព៌ានេះ ឆ្លុះបញ្ចាំងពីមហិច្ឆតាដែលកំពុងកើនឡើងរបស់កម្ពុជា ក្នុងការធានាបានការឈរជើងនៅក្នុងតំបន់ដែលមានសេដ្ឋកិច្ចរស់រវើក ហើយវាក៏ស្របតាមចក្ខុវិស័យទូលំទូលាយនៃការធ្វើពិពិធកម្មភាពជាដៃគូជាសកលរបស់ខ្លួន និងកាត់បន្ថយការពឹងផ្អែកខ្លាំងលើសម្ព័ន្ធមិត្តជាប្រពៃណី ៕
ចែករំលែកព័តមាននេះ