ទីក្រុងប៉ារីស៖ នៅទីបំផុត រដ្ឋាភិបាលបារំាងក្រោមការដឹកនាំរបស់លោកប្រធានាធិបតីម៉ាក្រុងបានដួលរលំបះជើងបាត់ទៅហើយបន្ទាប់ពីនាយករដ្ឋមន្ត្រីបារាំង លោកបានីញ៉េ (Barnier) ត្រូវតែបង្ខំចិត្តចុះចេញពីតំណែងកាលពីយប់មិញក្រោមទម្ងន់ដៃនៃការបោះឆ្នោតដកសេចក្ដីទុកចិត្តពីក្រុមអ្នកតំណាងរាស្ត្រ។ ជាបន្តទៅទៀតនេះ លោកម៉ាក្រុងត្រូវកាច់ចង្កូតជោគវាសនារបស់ប្រទេសជាតិដោយខ្លួនឯងម្ដងហើយ។
បន្ទាប់ពីការជជែកដេញដោលគ្នាយ៉ាងតឹងសរសៃកនៅក្នុងវិមានរដ្ឋសភាបារាំងរួមមក អ្នកតំណាងរាស្ត្រ៣៣១រូបនៅក្នុងចំណោម៥៧៧រូបបានបោះឆ្នោតដកសេចក្ដីទុកចិត្តពីលោកមីសែល បានីញ៉េ (Michel Barnier)។ ការបោះឆ្នោតទម្លាក់លោកបានីញ៉េនេះធ្វើឡើងបន្ទាប់ពីលោកនៅតែជម្នះចិត្តប្រើប្រាស់ថវិកាជាតិដើម្បីដោះស្រាយបញ្ហាឱនភាពសេដ្ឋកិច្ចជាតិ។
បញ្ហាមិនទាន់បញ្ចប់ត្រឹមហ្នឹងទេ។ នៅពេលសភាពការណ៍នយោបាយកំពុងតែក្រឡាប់ចាក់យ៉ាងដូច្នេះ អ្នកតំណាងរាស្ត្រកាន់តែច្រើនឡើងៗទាមទារឱ្យលោកម៉ាក្រុងក៏ត្រូវតែចុះចេញពីតំណែងផងដែរ។ លោកនៅសល់ពេលរហូតដល់ឆ្នាំ២០២៧ទើបចប់អាណត្តិ។ តាមគម្រោង លោកម៉ាក្រុងនឹងថ្លែងសុន្ទរកថាទៅកាន់ជនរួមជាតិនៅម៉ោង៨យប់ថ្ងៃព្រហស្បតិ៍។
មុនពេលបោះឆ្នោតដកសេចក្ដីទុកចិត្តពីលោកបានីញ៉េ លោកស្រីម៉ារីន ឡឺពេន (Marine Le Pen) ដែលជាអ្នកនយោបាយស្ដាំនិយមជ្រុលបាននិយាយពន្លះលោកម៉ាក្រុងមួយរយៗ។ លោកស្រីនិយាយទុកមុនថាបើលោកម៉ាក្រុងនៅតែមិនព្រមចុះចេញពីតំណែងទេមានន័យថាគាត់សុខចិត្តធ្វើពលិកម្មផលប្រយោជន៍ជាតិដើម្បីផលប្រយោជន៍ផ្ទាល់ខ្លួន។ ចំណែកក្រុមឆ្វេងនិយមជ្រុលនៅបារំាងថ្លែងថាការបោះឆ្នោតដកសេចក្ដីទុកចិត្តនេះគឺជាបរាជ័យគ្រប់យ៉ាងរបស់នយោបាយលោកម៉ាក្រុង។
ដូច្នេះ ដើម្បីទម្លុះទម្លាយភាពទ័លច្រកនេះចេញ យើងសូមទាមទារឱ្យលោកម៉ាក្រុងប្រញាប់ចុះចេញពីតំណែងជាបន្ទាន់។ គេគិតថាវិបត្តិសេដ្ឋកិច្ច និងហិរញ្ញវត្ថុនេះដោយសារតែលោកម៉ាក្រុងប្រញាប់រៀបចំការបោះឆ្នោតជ្រើសរើសអ្នកតំណាងរាស្ត្រមុនអាណត្តិពេក។ ហេតុនេះធ្វើឱ្យគណបក្សរបស់លោកមិនអាចទទួលបានសំឡេងភាគច្រើនដាច់ខាតនៅក្នុងសភា។
លោកម៉ាក្រុងទើបតែត្រឡប់ពីបំពេញទស្សនកិច្ចនៅអារ៉ាប៊ីសាអូឌីត និងបន្តដំណើរទៅវិមានអេលីហ្សេ (Élysée) មិនទាន់បានប៉ុន្មានផង លោកទទួលដំណឹងថាសភាបានបោះឆ្នោតដកតំណែងនាយករដ្ឋមន្ត្រីបាត់ទៅហើយ។ លោកត្រូវជ្រើសរើសបេក្ខជននាយករដ្ឋមន្ត្រីថ្មីដើម្បីធានាថាប្រទេសបារាំងត្រូវតែមានរដ្ឋាភិបាលសម្រាប់គ្រប់គ្រង។ លោកបានីញ៉េដែលត្រូវគេដកតំណែងនោះបានស្ដីបន្ទោសក្រុមអ្នកតំណាងរាស្ត្រថាមិនគួរនៅសុខៗបញ្ចប់ជីវិតរដ្ឋាភិបាលរបស់គាត់ទាំងកណ្ដាលទីបែបនេះទេ៕
ចែករំលែកព័តមាននេះ