ទីក្រុងហាណូយ៖ នៅទីបំផុត ហាងលក់នំប៉័ងសាច់ដ៏សែនស្មោគគ្រោក គ្មានអនាម័យ ទាំងសាច់ ទាំងបន្លែ និងអ្នករៀបចំនំប៉័ងជូនភ្ញៀវគ្មានពាក់ស្រោមដៃទេត្រូវអាជ្ញាធរចុះបិទទ្វារហើយ។ ហាងលក់នំប៉័ងសាច់ និងនំប៉័ងប៉ាតេ១កន្លែងនេះធ្វើឱ្យអ្នកបរិភោគចុះក្អួតស្ទើរស្លាប់ស្ទើររស់រាប់រយនាក់។ អាជ្ញាធរប្រាប់ថាខ្លួនបានបិទទ្វារនៅទីក្រុងវង់តូ១កន្លែងនេះ…
ទីក្រុងហាណូយ៖ នៅទីបំផុត ហាងលក់នំប៉័ងសាច់ដ៏សែនស្មោគគ្រោក គ្មានអនាម័យ ទាំងសាច់ ទាំងបន្លែ និងអ្នករៀបចំនំប៉័ងជូនភ្ញៀវគ្មានពាក់ស្រោមដៃទេត្រូវអាជ្ញាធរចុះបិទទ្វារហើយ។ ហាងលក់នំប៉័ងសាច់ និងនំប៉័ងប៉ាតេ១កន្លែងនេះធ្វើឱ្យអ្នកបរិភោគចុះក្អួតស្ទើរស្លាប់ស្ទើររស់រាប់រយនាក់។ អាជ្ញាធរប្រាប់ថាខ្លួនបានបិទទ្វារនៅទីក្រុងវង់តូ១កន្លែងនេះ (Vung Tau) និងពិន័យជាប្រាក់១២៥លានដុង ឬស្មើនឹង៤៩១០ដុល្លារក្រោយពេលមនុស្ស៣៤២នាក់ដែលបរិភោគអាហារនៅហាងនេះធ្លាក់ខ្លួនឈឺជាទម្ងន់។
អ្នកខ្លះបន្តោកសេរ៉ូមជាច្រើនកំប្លោក និងចាក់ថ្នាំអស់ជាច្រើនម្ជុលទម្រាំបានស្រួលខ្លួនឡើងវិញ។ អាជ្ញាធរសម្រេចបិទហាងនេះរយៈពេល៥ខែដើម្បីទុកជាការព្រមាន។ ហាងនេះមានយីហោ «គោបា» (Co Ba) ស្ថិតនៅតាមដងវិថីង្វៀនអាននិញ (Nguyen An Ninh) ជាប់នឹងមាត់សមុទ្រ។ អាជ្ញាធររកឃើញថាហាងនេះបានប្រព្រឹត្តកំហុស៤យ៉ាង៖ ទី១-លក់ចំណីអាហារធ្វើឱ្យពុលមនុស្ស, ទី២-បើកហាងលក់ដូរគ្មានស្នើសុំលិខិតទទួលស្គាល់សុវត្ថិភាពចំណីអាហារ, ទី៣-អ្នកចាប់អាហារជូនភ្ញៀវប្រើដៃទទេ គ្មានពាក់ស្រោម ធ្វើឱ្យគគ្រេចទៅលើចំណីអាហារ និងទី៤-បំពានគោលការណ៍ណែនាំស្ដីពីសុវត្ថិភាពចំណីអាហារ។
ម្ចាស់ហាងត្រូវរ៉ាប់រងចំណាយលើថ្នាំពេទ្យ និងសេវាព្យាបាលជនរងគ្រោះ។ សូមរំលឹកថាករណីពុលចំណីអាហារនៅហាងខាងលើនេះកើតឡើងកាលពីថ្ងៃទី២៦ ខែវិច្ឆិកា ឆ្នាំ២០២៤។ គេឃើញអតិថិជនកុម្ម៉ង់នំប៉័ងសាច់ច្រើនប្រភេទដូចជា៖ នំប៉័ងដាក់សាច់ជ្រូក, នំប៉័ងប៉ាតេ និងនំប៉័ងសាច់ក្រក លាយជាមួយបន្លែឆៅ (ហេងស៊យបន្លែទាំងនោះមិនបានលាងទឹកទេព្រោះប្រញាប់ដោយសារលក់ដាច់ពេក)។ ញ៉ាំមិនទាន់បានប៉ុន្មានផង ពួកគេចាប់ផ្ដើមមានអការៈធ្វើទុក្ខ១រំពេចដូចជាចុកពោះ, ក្ដៅខ្លួន និងរាករូស។
ត្រឹមតែ១ប៉ប្រិចភ្នែកប៉ុណ្ណោះ អតិថិជនដែលញ៉ាំនំប៉័ងសាច់នៅហាងនេះចាប់ផ្ដើមធ្លាក់ខ្លួនឈឺកាន់តែច្រើនឡើងៗមិនថាក្មេងតូចៗ, មនុស្សចាស់, ស្ត្រីមានគភ៌ និងជនមានពិការភាពនោះទេ។ មានករណីបុរសម្នាក់អាយុ៧១ឆ្នាំធ្លាក់ខ្លួនឈឺធ្ងន់ទៅៗរហូតដល់គ្រូពេទ្យជួយសង្គ្រោះលែងបាន។ គាត់ក៏ស្លាប់ទៅ។ មុនពេលស្លាប់ គាត់បានបរិភោគនំប៉័ងសាច់នៅក្នុងហាងនេះ។
អាជ្ញាធរបានចុះត្រួតពិនិត្យរួចហើយ ហើយរកឃើញថាករណីពុលចំណីអាហារនេះបណ្ដាលមកពីបាក់តេរីសាម៉ូណេឡា និងអ៊ីខូឡាយ (Salmonella & E. Coli)។ មេរោគនេះនៅពេលគេប្រើមីក្រូទស្សន៍ឆ្លុះមើលទៅឃើញថាពួកវារាតត្បាតពាសពេញសាច់ជ្រូក, សាច់ប៉ាតេ និងបន្លែឆៅ។ មេរោគទាំង២ប្រភេទនេះរស់នៅក្នុងពោះវៀនធំរបស់មនុស្ស។ វាជួយដល់ការរំលាយអាហារ។ ប៉ុន្តែបើមនុស្សបរិភោគអាហារមានមេរោគនេះ វានឹងធ្វើឱ្យធ្លាក់ខ្លួនឈឺធ្ងន់រហូតដល់ស្លាប់ក៏មានដែរ៕
ចែករំលែកព័តមាននេះ