​ខេត្តកំពត ៖ ក្រោយមានការភ្ញាក់ផ្អើល​ថា ផ្ការាំទឹករាំដុះក្នុងល្អាងភ្នំ អាជ្ញាធរស្រុកទឹកឈូ​បានចុះទៅពិនិត្យ ​ដែល​ដឹកនាំដោយលោកអុឹម ចន្ទ័សោធន អភិបាលស្រុកទឹកឈូ រួមដំណើរលោកអភិបាលរងស្រុក មន្ត្រីសាលាស្រុក និង​នគរបាលប៉ុស្តិ៍ កាលពីវេលាម៉ោង៤រសៀលថ្ងៃទី2 ធ្នូ ឆ្នាំ2024 បានចុះទៅក្នុងល្អាងភ្នំសេដាអោន ឬភ្នំក្បាលរមាស ឃុំត្រពាំងព្រីង ស្រុកទឹកឈូ ដើម្បីចូលទៅទៅពិនិត្យមើលរុក្ខជាតិមួយប្រភេទ​ដែលគេភ្ញាក់ផ្អើលថាជា​ផ្ការាំទឹករាំដុះក្នុងរូងភ្នំ ។

លោកអុឹម ចន្ទ័សោធន អភិបាលស្រុកទឹកឈូ បាននិយាយប្រាប់អោយដឹងថាការចុះទៅពិនិត្យមើល​រុក្ខជាតិ​ផ្ការាំទឹករាំនៅក្នុងរូងភ្នំនោះ ពិតជា​បាន​ឃើញជាក់ស្ដែងមែន ។

លោក​អភិបាលស្រុកទឹកឈូ បានចាត់ទុកថានេះជាដើមរុក្ខជាតិមួយដ៍កម្រ ហើយក៏មិន​ដែលជួបប្រទះដែរ ។ លោក​​​បានបន្តថា ផ្ការាំទឹករាំដុះក្នុងរូងភ្នំនេះ នា​ខែត្រជាក់ទើបវាដុះចេញតែក្នុងរយៈពេល10ថ្ងៃទៅ15ថ្ងៃ រុក្ខជាតិដ៏កម្រមួយនេះអាចនឹងក្រៀមស្វិតទៅវិញ ។

លោកអភិបាលស្រុកទឹកឈូ ក៏បានណែនាំ​អោយអ្នកនាំភ្ញៀវ រក្សានិងការពារកន្លែងផ្ការាំទឹករាំនេះទុក​គ្រាន់មាន​បងប្អូនប្រជាពលរដ្ឋ ឬភ្ញៀវទេសចរ ​មកលេងកម្សាន្ត​ក្នុងល្អាងភ្នំ ចង់​ទស្សនាអោយ​បាន​ឃើញទាំងអស់គ្នា ៕​