ខណៈដែលរដ្ឋមន្ត្រីការបរទេសថ្មីចូលកាន់តំណែង ស្របពេលឆ្នាំ២០២៥ កំពុងជិតមកដល់ អ្នកវិភាគទំនាក់ទំនងអន្តរជាតិកម្ពុជាមួយរូបបានព្យាករណ៍ពីគោលនយោបាយការបរទេសរបស់កម្ពុជាថា កម្ពុជានឹងដើរតួនាទីកាន់តែខ្លាំងលើសមរភូមិការទូតរបស់ខ្លួន ។ ការវិលត្រឡប់របស់លោកប្រាក់ សុខុន អ្នកការទូតជើងចាស់ មកកាន់តំណែងរដ្ឋមន្ត្រីការបរទេស…
ខណៈដែលរដ្ឋមន្ត្រីការបរទេសថ្មីចូលកាន់តំណែង ស្របពេលឆ្នាំ២០២៥ កំពុងជិតមកដល់ អ្នកវិភាគទំនាក់ទំនងអន្តរជាតិកម្ពុជាមួយរូបបានព្យាករណ៍ពីគោលនយោបាយការបរទេសរបស់កម្ពុជាថា កម្ពុជានឹងដើរតួនាទីកាន់តែខ្លាំងលើសមរភូមិការទូតរបស់ខ្លួន ។
ការវិលត្រឡប់របស់លោកប្រាក់ សុខុន អ្នកការទូតជើងចាស់ មកកាន់តំណែងរដ្ឋមន្ត្រីការបរទេស គឺជាសញ្ញាដ៏ច្បាស់លាស់ដែលកម្ពុជាយល់ឃើញពីភាពចាំបាច់ខ្លាំង ក្នុងការប្រើប្រាស់នយោបាយការទូតរបស់ខ្លួនអោយក្លាយជាប្រយោជន៍នយោបាយ សេដ្ឋកិច្ច និងសង្គម ក្នុងពិភពលោកដ៏រំជើបរំជួល និងមានភាពមិនប្រាកដប្រជា ។
លោក បណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជ្យបណ្ឌិតសភាកម្ពុជា បានអោយដឹងថា កម្ពុជានៅតែបន្តគោលនយោបាយការបរទេសរបស់កម្ពុជា ដែលមានកំណត់នៅក្នុងរដ្ឋធម្មនុញ្ញ គឺគោលនយោបាយការបរទេស អព្យាក្រិត្យ អចិន្ត្រៃយ៍ មិនចូលបក្សសម្ព័ន្ធ។ លោកបណ្ឌិត គិន ភា បានអោយកម្មវិធីលុយ នៃសារព័ត៌មានកោះសន្តិភាព ដឹងថា «ចំណុចសំខាន់នៃ គោលនយោបាយការបរទេសដែលដាក់ចេញ ដោយគណបក្សប្រជាជនកម្ពុជា ដែលជាគណបក្សកាន់អំណាច ដោយឈរលើមូលដ្ឋានរដ្ឋធម្មនុញ្ញ គឺគោលនយោបាយការបរទេសឯករាជ្យពឹងផ្អែកលើច្បាប់អន្តរជាតិ និងយន្តការពហុភាគីនិយម» ។
លោកបណ្ឌិត គិន ភា បន្ថែមថា កម្ពុជានៅតែបន្តធ្វើពិពិធកម្មការទូតរបស់កម្ពុជាសំដៅធ្វើយ៉ាងណា អោយកម្ពុជាអាចកាន់តែមានទំនាក់ទំនង និងកិច្ចសហការល្អជាមួយបណ្តាប្រទេសនានាជាច្រើនទាំងនៅក្នុងតំបន់ និងពិភពលោក ។ លោកបណ្ឌិត គិន ភា បន្តថា «តាមរយៈនេះកម្ពុជាអាចធ្វើពិពិធកម្មទីផ្សាររបស់យើងពិពិធកម្មដៃគូរបស់យើងជាមួយបណ្តាប្រទេសជាមិត្ត ហើយនៅពេលដែលយើងធ្វើទាំងអស់នេះបាននឹងរួមចំណែកជាវិជ្ជមានសម្រាប់អភិវឌ្ឍប្រទេស» ។
ក្នុងនាមជាសមាជិកនៃសមាគមប្រជាជាតិអាស៊ីអាគ្នេយ៍ កម្ពុជា គឺជាផ្នែកមួយនៃប្លុកតំបន់ដែលបានសង្កត់ធ្ងន់ពីការមិនចូលបក្សសម្ព័ន្ធ និងតុល្យភាពការទូតជាយូរមកហើយ ។ តាមរយៈការគាំទ្រដល់មជ្ឈភាពរបស់អាស៊ាន កម្ពុជាអាចទាញយកផលប្រយោជន៍រួមរបស់ប្លុក និងជំរុញឱ្យមានវិធីសាស្ត្របង្រួបបង្រួម និងមានតុល្យភាពចំពោះបញ្ហាក្នុងតំបន់ ។ អាស៊ានរួបរួមអាចដើរតួជាកម្លាំងរក្សាស្ថិរភាព ដោយអនុញ្ញាតឱ្យកម្ពុជាសម្រុះសម្រួលទំនាក់ទំនងអាស៊ាន-អាមេរិក ដោយមិនប្រកាន់ចិន ឬអាមេរិកពេកនោះទេ ។
ការពង្រឹងពាណិជ្ជកម្មក្នុងតំបន់អាស៊ានក៏អាចផ្តល់ឱ្យកម្ពុជានូវជម្រើសល្អផងដែរ ។ តាមរយៈកិច្ចព្រមព្រៀងពាណិជ្ជកម្មដូចជា ភាពជាដៃគូសេដ្ឋកិច្ចទូលំទូលាយក្នុងតំបន់ (RCEP) កម្ពុជា និងប្រទេសជិតខាងអាស៊ានអាចកសាងមូលដ្ឋានសេដ្ឋកិច្ចរឹងមាំជាងមុន ដោយកាត់បន្ថយឥទ្ធិពលនៃសម្ពាធខាងក្រៅពីជម្លោះពាណិជ្ជកម្មរវាងសហរដ្ឋអាមេរិក និងចិន ។ បណ្តាញពាណិជ្ជកម្មអាស៊ានដ៏រឹងមាំអាចកាត់បន្ថយការពឹងផ្អែករបស់កម្ពុជាលើការវិនិយោគ និងទេសចរណ៍របស់ចិន ដែលធ្វើឱ្យវាកាន់តែមានភាពធន់នឹងការប្រែប្រួលនៃសេដ្ឋកិច្ចចិន ៕
ចែករំលែកព័តមាននេះ