អ្នកប្រើប្រាស់បណ្តាញសង្គមនៅកម្ពុជាសព្វថ្ងៃនេះ មួយចំនួនបានកំពុងតែប្រើប្រាស់វេទិកានៃការផ្សព្វផ្សាយទាំងនេះលើសពីដែនសមត្ថកិច្ច ហើយតាំងខ្លួនធ្វើដូចជា តុលាការដើរកាត់ក្តី និងអារកាត់បញ្ហានានា ដែលកើតមានឡើងដោយផ្អែកតែលើមូលដ្ឋានព័ត៌មានដែលខ្លួនយល់ប៉ុណ្ណោះ ។ មកដល់ពេលនេះ មិនថា រឿងផិតក្បត់…
អ្នកប្រើប្រាស់បណ្តាញសង្គមនៅកម្ពុជាសព្វថ្ងៃនេះ មួយចំនួនបានកំពុងតែប្រើប្រាស់វេទិកានៃការផ្សព្វផ្សាយទាំងនេះលើសពីដែនសមត្ថកិច្ច ហើយតាំងខ្លួនធ្វើដូចជា តុលាការដើរកាត់ក្តី និងអារកាត់បញ្ហានានា ដែលកើតមានឡើងដោយផ្អែកតែលើមូលដ្ឋានព័ត៌មានដែលខ្លួនយល់ប៉ុណ្ណោះ ។
មកដល់ពេលនេះ មិនថា រឿងផិតក្បត់ រឿងជម្លោះក្នុងគ្រួសារ រឿងវិវាទដីធ្លី រឿងគ្រោះថ្នាក់ចរាចរណ៍ ក៏ដូចជា រឿងរ៉ាវផ្សេងៗ រហូតដល់នយោបាយ បុគ្គល ឬអ្នកបង្កើតមាតិការមួយចំនួននៅលើបណ្តាញសង្គមកំពុងតាំងខ្លួនធ្វើហួសដែនកំណត់ ។ ពួកគេមួយចំនួននោះ បានកំពុងតាំងខ្លួនគ្រប់យ៉ាងតាំងពីសមត្ថកិច្ចរហូតដល់តុលាការ ហើយវិនិច្ឆ័យរឿងវិវាទដែលខ្លួនមានផ្តេសផ្តាស់ ពេលខ្លះអាចមានរហូតដល់ប្រែក្លាយរឿងខ្មៅទៅជាស ហើយសទៅជាខ្មៅក៏មានដែរ ។
សូមប្រុងប្រយ័ត្ន និងលើកកម្ពស់ការយល់ដឹងអំពីគោលបំណងនៃការប្រើប្រាស់បណ្តាញសង្គម ។ នៅក្នុងពិភពឌីជីថលនាពេលបច្ចុប្បន្ននេះ ប្រព័ន្ធផ្សព្វផ្សាយសង្គមបានក្លាយទៅជាឧបករណ៍ដ៏មានឥទ្ធិពលដែលភ្ជាប់មនុស្ស និងគំនិត ។ សម្រាប់ប្រជាជនកម្ពុជា ដូចជាអ្នកផ្សេងទៀតនៅទូទាំងពិភពលោក វេទិកាដូចជា Facebook TikTok និង Telegram ជាដើម បានផ្តល់ច្រកសម្រាប់ចែករំលែកមតិពិភាក្សាព្រឹត្តិការណ៍ និងចូលរួមជាមួយអ្នកដទៃ ។ ទោះបីជាយ៉ាងណាក៏ដោយ ខណៈពេលដែលប្រព័ន្ធផ្សព្វផ្សាយសង្គមអនុញ្ញាតឱ្យមនុស្សគ្រប់គ្នាបញ្ចេញសំឡេងវាក៏បានធ្វើឱ្យមានការប្រញាប់ប្រញាល់ក្នុងការវិនិច្ឆ័យផងដែរ ដែលមនុស្សអាចបង្កើត និងចែករំលែកយោបល់អំពីអ្នកដទៃ និងសកម្មភាពរបស់ពួកគេបានយ៉ាងឆាប់រហ័សជួនកាលដោយមិនយល់ពីបរិបទពេញលេញ ។
បាតុភាពអសកម្មបែបនេះ អាចប៉ះពាល់ដល់បុគ្គល សហគមន៍ និងសូម្បីតែការផ្សព្វផ្សាយព័ត៌មានពិត ។ ទិដ្ឋភាពសំខាន់មួយ ដែលត្រូវពិចារណា គឺការមានសំឡេងមិនមែនមានន័យថា មានការពិតទាំងស្រុងនោះទេ ។ យើងម្នាក់ៗមានទស្សនវិស័យដែលបង្កើតដោយប្រវត្តិ បទពិសោធន៍ និងជំនឿផ្ទាល់ខ្លួនរបស់យើង ។
ប្រព័ន្ធផ្សព្វផ្សាយសង្គមអាចពង្រីកការគិតរបស់យើងម្នាក់ៗ ប៉ុន្តែអ្នកប្រើប្រាស់បណ្តាញសង្គមមិនគួរដើរតួជាចៅក្រម ឬជាសមត្ថកិច្ចចេញសេចក្តីសន្និដ្ឋាន ឬកាត់សេចក្តីលើជីវិតរបស់អ្នកដទៃបានឡើយ ។ តាមផ្លូវច្បាប់ បុគ្គលម្នាក់ៗមានច្បាប់ជាដែនកំណត់ ប្រសិនបើយើងចេះតែបញ្ចេញមតិកាត់ក្តីជំនួសស្ថាប័នស្របច្បាប់វាអាចបង្កើតបរិយាកាសខ្វះភាពយុត្តិធម៌នៅក្នុងសង្គម ។
សូមយកចិត្តទុកដាក់ និងពង្រីកការយល់ដឹងពីព្រោះថា ការចែករំលែកយោបល់ ឬមតិជាពិសេសការរិះគន់អាចមានលទ្ធផលអវិជ្ជមានដល់អ្នកដទៃ ។ ការវាយតម្លៃមិនត្រឹមត្រូវដែលផ្សព្វផ្សាយនៅលើប្រព័ន្ធផ្សព្វផ្សាយសង្គម អាចធ្វើឱ្យគេខូចកេរ្តិ៍ឈ្មោះប៉ះពាល់ដល់ជីវភាពរស់នៅ និងនាំឱ្យមានការយល់ច្រឡំយូរអង្វែង ។ ឥទ្ធិពលនេះ មិនត្រឹមតែមានកម្រិតចំពោះបុគ្គលប៉ុណ្ណោះទេ ប៉ុន្តែក៏អាចមានឥទ្ធិពលលើសហគមន៍ផងដែរ ។ នៅពេលដែលមនុស្សចូលរួមក្នុងរលកនៃការវិនិច្ឆ័យរហ័ស ដោយគ្មានទស្សនៈសមតុល្យ ពាក្យចចាមអារ៉ាម និងព័ត៌មានមិនពិត អាចជំនួសការយល់ដឹង និងការពិត ។ ឥទ្ធិពលនៃសកម្មភាពទាំងនេះអាចមានភាពស៊ីជម្រៅ និងយូរអង្វែង ហើយវាឆ្លុះបញ្ចាំងយ៉ាងលំបាកទៅលើវប្បធម៌នៃការគោរព និងការគាំទ្រគ្នាទៅវិញទៅមករបស់យើង ។
ដូច្នេះ ការទទួលខុសត្រូវ គឺស្ថិតនៅលើយើងម្នាក់ៗដើម្បីចូលទៅប្រើប្រាស់បណ្ដាញសង្គមដោយភាពត្រឹមត្រូវ ។ យើងត្រូវតែចងចាំថា ប្រព័ន្ធផ្សព្វផ្សាយសង្គមមិនមែនជា តុលាការទេ ហើយយើងក៏មិនមែនជាចៅក្រមដែរ ។ ការចំណាយពេលបន្តិច ដើម្បីពិចារណា មុនពេលចែករំលែកវាអាចការពារគ្រោះថ្នាក់ដែលមិនចាំបាច់ ។ តើព័ត៌មានត្រូវបានផ្ទៀងផ្ទាត់ទេ? តើយើងបើកចំហចំពោះទស្សនៈផ្សេងទៀតទេ?តើមតិរបស់យើងអាចបំផ្លាញកេរ្តិ៍ឈ្មោះ ឬសុខុមាលភាពរបស់នរណាម្នាក់បានទេ?
នៅក្នុងប្រទេសកម្ពុជានាពេលបច្ចុប្បន្ននេះ វាចាំបាច់ណាស់ក្នុងការលើកកម្ពស់វប្បធម៌ដែលប្រព័ន្ធផ្សព្វផ្សាយសង្គមត្រូវបានប្រើប្រាស់សម្រាប់ការផ្លាស់ប្តូរប្រកបដោយភាពវិជ្ជមាន និងស្ថាបនា ។ ការបង្ហាញគំនិតរបស់យើងប្រកបដោយការទទួលខុសត្រូវ មិនមែនមានន័យថា យើងមិនអាចរិះគន់ ឬសួរសំណួរនោះទេ ។
សូមប្រើប្រាស់ប្រព័ន្ធផ្សព្វផ្សាយសង្គមជាឧបករណ៍ផ្សព្វផ្សាយដែលមានគុណតម្លៃ និងគុណប្រយោជន៍ ជាជាងជាវេទិកាសម្រាប់ការវិនិច្ឆ័យលើបញ្ហាណាមួយ ។ សូមចាំថា ការយល់ដឹង និងយុត្តិធម៌ពិតប្រាកដបានមកពីការស្តាប់ ការរៀន និងការរក្សានូវភាពរាបសារ ដើម្បីដឹងថា ពេលខ្លះយើងអាចខុស ។ សូមលើកកម្ពស់ការផ្ទៀងផ្ទាត់ ហើយប្រុងប្រយ័ត្នខ្ពស់លើការបញ្ចេញមតិ និងចែករំលែករឿងរ៉ាវផ្សេងៗ ។ នៅក្នុងករណីយើងនៅតែបន្តតាំងខ្លួនជាចៅក្រម ហើយប្រើប្រាស់បណ្តាញសង្គមខុសនិតិវិធីបែបនេះអាចឲ្យសង្គមអនាធិបតេយ្យ ដូច្នេះយើងគួរយល់ និងចូលរួមប្រុងប្រយ័ត្ន ៕
ចែករំលែកព័តមាននេះ