រាជធានីភ្នំពេញ ៖ មន្ដ្រីជាន់ខ្ពស់ក្រសួងសុខាភិបាល បានលើកទឹកចិត្ដដល់មន្ទីរពេទ្យ រ៉ូយ៉ាល់ ភ្នំពេញ សូមប្រកាន់យកនូវស្មារតីភាពជាដៃគូល្អបន្ដទៀតជាមួយរាជរដ្ឋាភិបាល ដើម្បីរួមចំណែកដល់ការអភិវឌ្ឍសង្គម-សេដ្ឋកិច្ចនៅកម្ពុជា ។ នេះគឺជាការថ្លែងរបស់ឯកឧត្ដម…
រាជធានីភ្នំពេញ ៖ មន្ដ្រីជាន់ខ្ពស់ក្រសួងសុខាភិបាល បានលើកទឹកចិត្ដដល់មន្ទីរពេទ្យ រ៉ូយ៉ាល់ ភ្នំពេញ សូមប្រកាន់យកនូវស្មារតីភាពជាដៃគូល្អបន្ដទៀតជាមួយរាជរដ្ឋាភិបាល ដើម្បីរួមចំណែកដល់ការអភិវឌ្ឍសង្គម-សេដ្ឋកិច្ចនៅកម្ពុជា ។ នេះគឺជាការថ្លែងរបស់ឯកឧត្ដម វេជ្ជបណ្ឌិត ស៊ិក ប៊ុណ្ណា រដ្ឋលេខាធិការក្រសួងសុខាភិបាល ក្នុងពិធីជប់លៀងអបអរសាទរគម្រប់ខួប ១០ ឆ្នាំ របស់មន្ទីរពេទ្យ រ៉ូយ៉ាល់ ភ្នំពេញ កាលពីយប់ថ្ងៃទី ១៨ ខែវិច្ឆិកា ឆ្នាំ ២០២៤ នៅសណ្ឋាគារ ហ្គាធិន ស៊ីធី ស្ថិតនៅក្នុងខណ្ឌជ្រោយចង្វារ រាជធានីភ្នំពេញ ។
ឯកឧត្ដម វេជ្ជបណ្ឌិត ស៊ិក ប៊ុណ្ណា បានមានប្រសាសន៍ថា ការរៀបចំអបអរសាទរខួប ១០ ឆ្នាំ របស់មន្ទីរពេទ្យ រ៉ូយ៉ាល់ ភ្នំពេញ នាពេលនេះបានបង្ហាញពីសក្ខីភាពនៃការយកចិត្ដទុកដាក់ និងផ្ដល់តម្លៃជាវិជ្ជមាន និងឆន្ទៈដ៏មុតស្រួចរបស់រាជរដ្ឋាភិបាលក្នុងការពង្រឹងភាពជាដៃគូរឹងមាំរវាងរដ្ឋ និងវិស័យឯកជនប្រកបដោយភាពជឿជាក់ និងស្មោះត្រង់ ដើម្បីអភិវឌ្ឍន៍សង្គម និងសេដ្ឋកិច្ចកម្ពុជា ។ ឯកឧត្ដមបានលើកឡើងថា រាជរដ្ឋាភិបាលនីតិកាលទី ៧ នៃរដ្ឋសភា ដែលដឹកនាំដោយសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ដ្រី បានដាក់ចេញនូវយុទ្ធសាស្ដ្របញ្ចកោណដំណាក់កាលទី ១ ដើម្បី «កំណើនការងារ សមធម៌ ប្រសិទ្ធភាព និងចីរភាព» ក្នុងការកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជា ឆ្នាំ ២០៥០ ។
ឯកឧត្ដមរដ្ឋលេខាធិការបន្ដថា ការគិតគូររៀបចំយុទ្ធសាស្ដ្រនេះ បានផ្ដោតលើអាទិភាពគន្លឹះចំនួន៥ ក្នុងទម្រង់យុទ្ធសាស្ដ្របញ្ចកោណមុំទី ៣ នៃបញ្ចកោណទី ១ ស្ដីពីការភិវឌ្ឍវិស័យឯកជន និងការងារ ដែលបានរំលេចយ៉ាងច្បាស់ពីភាពចាំបាច់ក្នុងការពង្រឹងភាពជាដៃគូក្នុងវិស័យសាធារណៈ និងឯកជន ដែលជាគោលដៅយុទ្ធសាស្ដ្រ គឺការបន្ដពង្រឹងភាពជាដៃគូរវាងរដ្ឋ និងឯកជន ដែលជាយន្ដការមិនអាចខ្វះបាន និងមានប្រសិទ្ធភាពក្នុងការគាំទ្រពិពិធកម្ម និងកំណើន ។
ឯកឧត្ដមរដ្ឋលេខាធិការបានអះអាងថា រាជរដ្ឋាភិបាលអាណត្ដិទី ៧ នៃរដ្ឋសភា ក៏ដូចជារាជរដ្ឋាភិបាលអាណត្ដិមុនៗដែរ បានយកចិត្ដទុកដាក់ និងផ្ដល់អាទិភាពខ្ពស់លើវិស័យសុខាភិបាល ដែលក្នុងនោះការលើកកម្ពស់សុខភាព និងសុខុមាលភាពប្រជាជន ត្រូវបានរំលេចយ៉ាងច្បាស់ក្នុងមុំទី ៣ នៃបញ្ចកោណទី ១ គឺការលើកកម្ពស់សុខភាព និងសុខុមាលភាពប្រជាជនដែលមានគោលដៅជាយុទ្ធសាស្ដ្រក្នុងការកាត់បន្ថយអត្រាស្លា.ប់ និងអត្រាឈឺ បណ្ដាលមកពីជំងឺមិនឆ្លងបម្បងៗ ការបន្ដលើកកម្ពស់សុខភាពបន្ដពូជ សុខភាពទារក កុមារ និងមាតា ការពង្រឹងសមត្ថភាពស្ថាប័នក្នុងការដឹកនាំបរិវត្ដកម្ម និងអភិបាលកិច្ចក្នុងវិស័យសុខាភិបាល ការបន្ដលើកកម្ពស់គុណភាព និងសមត្ថភាពធ្វើរោគវិនិច្ឆ័យ ការព្យាបាល និងថែទាំជំងឺ ការបន្ដពង្រឹងគុណភាពនៃការបណ្ដុះបណ្ដាលវិជ្ជាជីវៈសុខាភិបាល ការលើកកម្ពស់សមត្ថភាពជំនាញ ការលើកកម្ពស់កិច្ចសហការរវាងក្រសួង ស្ថាប័ន ដៃគូពាក់ព័ន្ធ និងការចូលរួមរបស់ប្រជាជនតាមសហគមន៍ ។
ឯកឧត្ដម វេជ្ជបណ្ឌិត រដ្ឋលេខាធិការ ក៏បានសម្ដែងនូវការកោតសរសើរចំពោះមន្ទីរពេទ្យ រ៉ូយ៉ាល់ភ្នំពេញ ដែលបានរួមចំណែកជួយការពារសង្គមជាច្រើន ដូចជាការប្រយុទ្ធប្រឆាំងនឹងជំងឺឆ្លងដែលកាចសាហា.វ ជាពិសេសក្នុងអំឡុងពេលនៃការរាតត្បាតជំងឺកូវីដ ១៩ ការចូលរួមបរិច្ចាគឈាមដោយស្ម័គ្រចិត្ដជារៀងរាល់ឆ្នាំ បរិច្ចាគថវិកាជូនកាកបាទក្រហមកម្ពុជា ការអប់រំសុខភាព ពិសេសស្ដ្រីដែលមានគភ៌នៅត្រឹមត្រីមាសទី ១ និងទី ២ តាមរយៈការរៀបចំសិក្ខាសាលា ដើម្បីទទួលបានចំណេះដឹងបែបថ្មីស្ដីពីរបៀបថែទាំសុខភាពរបស់មាតា និងទារក ការត្រៀមសម្រាលរបស់មាតា និងការចូលរួមចំណែករំលែកបទពិសោធន៍ដោយវេជ្ជបណ្ឌិតជំនាញប្រចាំនៅមន្ទីរពេទ្យ រ៉ូយ៉ាល់ភ្នំពេញ ។ បន្ថែមលើនេះទៀត មន្ទីរពេទ្យ ក៏បានចូលរួមសហការជាមួយក្រុមគ្រូពេទ្យស្ម័គ្រចិត្ដ TYDA ផ្ដល់ការវះកាត់បេះដូងជូនអ្នកជំងឺដោយមិនគិតថ្លៃផងដែរ ។
ជាមួយគ្នានេះដែរ តាងនាមក្រសួងសុខាភិបាល ឯកឧត្ដម ស៊ិក ប៊ុណ្ណា ក៏បានកោតសរសើរដល់ថ្នាក់ដឹកនាំ បុគ្គលិកគ្រប់លំដាប់ថ្នាក់ នៃមន្ទីរពេទ្យ រ៉ូយ៉ាល់ ភ្នំពេញ ក៏ដូចជាមន្ទីរពេទ្យឯកជនដទៃទៀត ព្រមទាំងតួអង្គពាក់ព័ន្ធទាំងអស់ ដែលបានខិតខំចូលរួមវិនិយោគលើវិស័យសុខាភិបាលនៅកម្ពុជា ហើយដែលបានគោរព និងអនុវត្ដន៍យ៉ាងម៉ឺងម៉ាត់នូវច្បាប់ គោលនយោបាយអាទិភាព និងកំណែទម្រង់នានា របស់រាជរដ្ឋាភិបាលប្រកបដោយស្មារតី ក្រមសីលធម៌វិជ្ជាជីវៈ មានមនសិការវិជ្ជាជីវៈ ក្នុងការចូលរួមចំណែកបម្រើសេវាសុខភាពជូនប្រជាជនប្រកបដោយគុណភាព ប្រសិទ្ធភាព និងគណនេយ្យភាព ។
ក្នុងឱកាសនោះដែរ លោកសាស្ត្រាចារ្យ Attapoom Susupaus នាយកមន្ទីរពេទ្យ រ៉ូយ៉ាល់ ភ្នំពេញ បានបញ្ជាក់ថា ក្រោមចក្ខុវិស័យរួមរបស់យើង និងដោយឆ្លុះបញ្ចាំងពីដំណើរការរបស់មន្ទីរពេទ្យបានចាប់ផ្តើមនៅក្នុងឆ្នាំ ២០១៤ ជាមួយនឹងបុគ្គលិកតិចជាង ១០០ នាក់ ហើយបានចូលរួមជាមួយអ្នកជំងឺតិចជាង ៤០ ០០០ នាក់ក្នុងមួយឆ្នាំ ។ លោកសាស្ដ្រាចារ្យគូសបញ្ជាក់ថា សព្វថ្ងៃនេះ យើងអាចនិយាយដោយមោទនភាពថា ឥឡូវនេះយើងរីកចម្រើនដោយមានបុគ្គលិកសរុបជាង ៣៨៦ នាក់ ហើយបានព្យាបាលអ្នកជំងឺជាង ៨០ ០០០ នាក់ រៀងរាល់ឆ្នាំ ហើយនេះជាសក្ខីភាពមួយចំពោះការប្តេជ្ញាចិត្តឥតងាករេរបស់យើងចំពោះឧត្តមភាពនៃការថែទាំសុខភាព ។
លោកសាស្ដ្រាចារ្យ បានថ្លែងផងដែរថា ការប្តេជ្ញាចិត្តរបស់យើងចំពោះគុណភាព ត្រូវបានបង្ហាញបន្ថែមទៀតដោយការអបអរសាទរបស់យើង ហើយមន្ទីរពេទ្យ រ៉ូយ៉ាល់ ភ្នំពេញ ទទួលបាននូវការទទួលស្តង់ដារអាម៉េរិក (JCI) ជាលើកដំបូងក្នុងឆ្នាំ ២០១៧ បន្ទាប់មកទៀតនៅឆ្នាំ ២០២០ និងចុងក្រោយបំផុតនៅឆ្នាំ ២០២៣ ។ លើសពីនេះ យើងបានទទួលពានរង្វាន់គិលានុបដ្ឋាយិកាល្អពី BDMS ក្នុងឆ្នាំ២០១៧ ហើយនៅឆ្នាំ ២០២១ យើងមានមោទនភាពក្នុងការទទួលបានពានរង្វាន់ជាមន្ទីរពេទ្យឆ្នើមនៅកម្ពុជា (The Best Hospital in Cambodia) ទទួលស្គាល់ដោយពានរង្វាន់ដោយសុខភាពពិភពលោកអាស៊ីប៉ាស៊ីហ្វិក (Global Health Asia Pacific Awards) ។ បន្ថែមពីនេះទៀត មន្ទីរពេទ្យទទួលបានពានរង្វាន់ផ្នែការព្យាបាលការប៉ះទង្គិចខួរក្បាលដោយឧបទ្ទវហេតុ (TBI) ក្នុងឆ្នាំ ២០១៩ និងលើកទី ២ នៅឆ្នាំ ២០២២ ។
លោកសាស្ដ្រាចារ្យ បានថ្លែងបញ្ជាក់ថា ៖ «សមិទ្ធផលទាំងនេះ គឺជាកម្លាំងចិត្ត និងតំណាងឱ្យការប្តេជ្ញាចិត្តរបស់យើងចំពោះឧត្តមភាព និងការជឿទុកចិត្តរបស់អ្នកជំងឺមកលើយើង និងសហគមន៍ថែទាំសុខភាពរបស់យើង» ។ លោកសាស្ដ្រាចារ្យបានអះអាងផងដែរថា យើងប្តេជ្ញាចិត្តក្នុងការផ្តល់នូវការថែទាំប្រកបដោយគុណភាព ដោយធានាបាននូវសុវត្ថិភាព និងតម្លៃសមរម្យសម្រាប់អ្នកជំងឺ ។
លោកសាស្ដ្រាចារ្យ បានបន្ថែមថា ៖ «យើងផ្តល់ការសន្យាដ៏សាមញ្ញ ប៉ុន្តែមានអត្ថន័យយ៉ាងជ្រាលជ្រៅមួយ ដើម្បីឱ្យអ្នកជំងឺមានទំនុកចិត្តជាមុនសិន និងធានាថាបុគ្គលគ្រប់រូបដែលចូលមកព្យាបាលនៅក្នុងមន្ទីរពេទ្យរបស់យើងទទួលបានការថែទាំយ៉ាងយកចិត្តទុកដាក់ ។ យប់នេះយើងអបអរសមិទ្ធិផលរបស់យើង ជាមួយនឹងការលះបង់ និងការសហការគ្នា យើងនឹងបន្តកសាងសុខភាពសម្រាប់ប្រជាជនកម្ពុជា» ៕ អត្ថបទសហការ
ចែករំលែកព័តមាននេះ