រាជធានីភ្នំពេញ៖ ឯកឧត្តម ឃួង ស្រេង អភិបាលរាជធានីភ្នំពេញបានណែនាំដល់កងកម្លាំងប្រដាបអាវុធ គ្រប់ប្រភេទ ត្រូវបង្កើនការយកចិត្តទុកដាក់ ចំពោះបញ្ហាសុវត្ថិភាព និងការធានាសណ្តាប់ធ្នាប់របៀប រៀបរយជូនប្រជាពលរដ្ឋដែលមកលេងកម្សាន្តក្នុងព្រះរាជពិធីបុណ្យអុំទូកបណ្ដែតប្រទីប…
រាជធានីភ្នំពេញ៖ ឯកឧត្តម ឃួង ស្រេង អភិបាលរាជធានីភ្នំពេញបានណែនាំដល់កងកម្លាំងប្រដាបអាវុធ គ្រប់ប្រភេទ ត្រូវបង្កើនការយកចិត្តទុកដាក់ ចំពោះបញ្ហាសុវត្ថិភាព និងការធានាសណ្តាប់ធ្នាប់របៀប រៀបរយជូនប្រជាពលរដ្ឋដែលមកលេងកម្សាន្តក្នុងព្រះរាជពិធីបុណ្យអុំទូកបណ្ដែតប្រទីប និងសំពៈព្រះខែ អកអំបុកឆ្នាំ២០២៤នេះ ប្រកបដោយភាពកក់ក្តៅនិងសប្បាយរីករាយ។
ក្នុងពេលជួបសំណេះសំណាល និងផ្ដល់អំណោយលេីកទឹកចិត្ត ជាមួយកងកម្លាំង ដែលឈរជើង ការពារ និងរក្សាសន្តិសុខ សណ្តាប់ ក្នុងព្រះរាជពិធីបុណ្យអុំទូក នៅព្រឹកថ្ងៃទី ១៤ វិច្ឆិកា ឆ្នាំ២០២៤នេះ ឯកឧត្តម ឃួង ស្រេង គណៈអភិបាលរាជធានីភ្នំពេញ បានជំរុញដល់កងកម្លាំងប្រដាប់គ្រប់ជាន់ថ្នាក់ និងអាជ្ញាធរដែនដី ពិសេសមេបញ្ជាការទាំងអស់ត្រូវរក្សាឱ្យបាននូវប្រពៃណីការពារសុខសណ្តាប់ធ្នាប់ និងសុខសុវត្ថិភាពជូនប្រជាជន ដើម្បីបង្កើនជំនឿចិត្តលើកងកម្លាំងប្រដាប់អាវុធបន្ថែមទៀត។
ឯកឧត្តម ឃួង ស្រេង មានប្រសាសន៏ថា ប្រជាពលរដ្ឋលោកមានជំនឿទុកចិត្តទៅលើកងកម្លាំងប្រដាប់អាវុធគ្រប់ប្រភេទ អាជ្ញាធរដែនដី ដែលបានរក្សាការពារសន្តិសុខ សណ្តាប់ធ្នាប់ ពិសេសទ្រព្យសម្បត្តិរបស់ប្រជាពលរដ្ឋ នៅខណៈពេលមានពិធីបុណ្យទានសំខាន់ៗនៅក្នុងប្រទេសកម្ពុជា។
កងកម្លាំងយើងបានធ្វើបានល្អលើបញ្ហានេះហើយសូមឱ្យកងកម្លាំងក៏ដូចមេបញ្ជាការទាំងអស់រក្សាបាននូវប្រពៃណីដ៏ល្អនេះសម្រាប់ប្រជាជនខ្មែរដែលកំពុងមានជំនឿលើកងកម្លាំងប្រដាប់អាវុធរបស់យើងក្នុងកិច្ចការការពារក៏ដូចជាអាជ្ញាធរដែនដីគ្រប់លំដាប់ថ្នាក់ដែលបានខិតខំប្រឹងប្រែងធ្វើកិច្ចការងារតាមដែនសមត្ថកិច្ចរបស់ខ្លួនដើម្បីការពារប្រជាពលរដ្ឋឱ្យរស់នៅក្រោមម្លប់សន្តិភាពនេះទទួលបាននូវសុវត្ថិភាពល្អប្រសើរពីមួយថ្ងៃទៅមួយថ្ងៃហើយមានជីវភាពកាន់តែរីកចម្រើនក្រោមការដឹកនាំរបស់សម្តេចមហាបវរធិបតីហ៊ុន ម៉ាណែត ជាអ្នកបន្តវេនដឹកនាំនាវាកម្ពុជាឈានឆ្ពោះទៅរកភាពសំបូរសប្បាយរុងរឿងនៅឆ្នាំ២០៥០យ៉ាងពិតប្រាកដ។
ដើម្បីឱ្យព្រះរាជពិធីបុណ្យ បណ្តែតប្រទីប និងសំពះព្រះខែអកអំបុកឆ្នាំ២០២៤នេះទទួលបាននូវសុវត្ថិភាពសណ្តាប់ធ្នាប់សាធារណល្អប្រសើរ ឯកឧត្តមបានណែនាំដល់កងកម្លាំងទាំងអស់ ត្រូវបន្តការពារសុវត្ថិភាពប្រជាពលរដ្ឋឱ្យបានល្អប្រសើរក្នុងពិធីបុណ្យនេះ។
ក្នុងនាមម្ចាស់ទីតាំងក្នុងនាមអាជ្ញាធរដែនដីនឹងក្នុងនាមកងកម្លាំងប្រដាប់អាវុធគ្រប់ប្រភេទយើងត្រូវមានស្មារតីទទួលខុសត្រូវជុំវិញបញ្ហាការពារសន្តិសុខសុវត្ថិភាពនិងសណ្តាប់ធ្នាប់សាធារណៈទៅដល់ភ្ញៀវជាតិនិងអន្តរជាតិដែលចូលរួមនៅក្នុងពិធីបុណ្យសប្បាយរីករាយនេះ។ ឆ្នាំកន្លងទៅនេះ អាជ្ញាធរពាក់ព័ន្ធនឹងកងកម្លាំងប្រដាប់អាវុធគ្រប់ជាន់ថ្នាក់ បានអនុវត្តនូវកិច្ចការពារសន្តិសុខសណ្តាប់ធ្នាប់បានយ៉ាងល្អប្រសើរជូនពលរដ្ឋ ក៏ដូចជាបញ្ហាអនាម័យផងដែរ រហូតឈានដល់ការទទួលបាននូវការកោតសរសើរពីថ្នាក់ដឹកនាំ ក៏ដូចជាប្រជាពលរដ្ឋ និងភ្ញៀវជាតិនិងអន្តរជាតិជាដើម។
សូមបញ្ជាក់ថា ការអនុវត្តលើកិច្ចការពារសន្តិសុខ សណ្តាប់ធ្នាប់អាជ្ញាធរ និងកងកម្លាំងសមត្ថបានអនុវត្តកិច្ចការងារនេះបានយ៉ាងល្អប្រសើរ តាមរយៈការពារសុវត្ថិភាពទៅតាមផ្ទះ ដែលស្ថិតនៅក្នុងដែនសមត្ថកិច្ចរបស់អាជ្ញាធររាជធានីភ្នំពេញ ដោយកងកម្លាំងប្រដាប់អាវុធគ្រប់ប្រភេទ គឺជាអ្នកបំរើឱ្យប្រជាពលរដ្ឋបានធ្វើកិច្ចការងារល្អប្រសើរ ក្នុងការការពារផ្ទះសម្បែងរបស់ប្រជាពលរដ្ឋបានយ៉ាងគត់មុត ដើម្បីឱ្យប្រជាពលរដ្ឋអាចធ្វើដំណើរកម្សាន្តក្នុងប្រទេសកម្ពុជាក៏ដូចជាក្រៅប្រទេស ដោយមិនមានការខ្វាយខ្វល់ជុំវិញបញ្ហាទ្រព្យសម្បត្តិនៅក្នុងផ្ទះឡើយ ដែលនេះបង្ហាញពីគំរូវីរភាពមួយរបស់កងកម្លាំងប្រដាប់អាវុធ ក្នុងការខិតខំប្រឹងប្រែងលះបង់ជូនជាតិមាតុភូមិ៕
ចែករំលែកព័តមាននេះ