កម្ពុជាស្វាគមន៍អត្រាកំណើតកូនផ្សោតច្រើនបំផុតមិនធ្លាប់មាន ចាប់តាំងពីឆ្នាំ២០២១ មក ដែលមានចំនួនរហូតដល់ទៅ៩ក្បាល ។ ក្រសួងកសិកម្ម រុក្ខាប្រមាញ់ និងនេសាទ បានប្រកាសថា កូនផ្សោតទើបកើតថ្មីមួយក្បាលត្រូវបានប្រទះឃើញ…
កម្ពុជាស្វាគមន៍អត្រាកំណើតកូនផ្សោតច្រើនបំផុតមិនធ្លាប់មាន ចាប់តាំងពីឆ្នាំ២០២១ មក ដែលមានចំនួនរហូតដល់ទៅ៩ក្បាល ។ ក្រសួងកសិកម្ម រុក្ខាប្រមាញ់ និងនេសាទ បានប្រកាសថា កូនផ្សោតទើបកើតថ្មីមួយក្បាលត្រូវបានប្រទះឃើញ ដោយក្រុមការងារស្រាវជ្រាវនៃរដ្ឋបាលជលផល និងអង្គការ WWF នាថ្ងៃទី៨ ខែវិច្ឆិកា ឆ្នាំ២០២៤ នៅអន្លង់កាំពី ភូមិជ្រោយបន្ទាយ ឃុំសំបុក ស្រុកចិត្របុរី ខេត្តក្រចេះ ។
ក្រសួងកសិកម្ម រុក្ខាប្រមាញ់ និងនេសាទ បញ្ជាក់ថា កូនផ្សោតនេះ មានសុខភាពល្អប្រសើរ និងស្ថិតក្នុងហ្វូងផ្សោតធំៗចំនួន២ទៀត និងជាកូនផ្សោតទី៩ ដែលបានកើតនៅក្នុងឆ្នាំ ២០២៤ ជាអត្រាកំណើតច្រើនពុំធ្លាប់មានទេ បើគិតចាប់តាំងពីឆ្នាំ២០២១មក ។
យោងតាមរបាយការណ៍ពីក្រសួងកសិកម្ម រុក្ខាប្រមាញ់ និងនេសាទ អាចអោយយើងប្រៀបធៀបដូចខាងក្រោម ៖ ឆ្នាំ២០២១ កម្ពុជាមានកូនផ្សោតកើតថ្មីចំនួន៦ក្បាល និងផ្សោតស្លាប់ចំនួន៩ក្បាល ។ -ឆ្នាំ២០២២ ផ្សោតកើតថ្មីមានចំនួន ៦ក្បាល និងស្លា.ប់ទៅវិញចំនួន១១ក្បាល ។ -ឆ្នាំ២០២៣ មានផ្សោតកើតចំនួន៨ក្បាល និងស្លា.ប់ចំនួន៥ក្បាល -ឆ្នាំ២០២៤ គិតត្រឹមដើមខែវិច្ឆិកា ផ្សោតកើតមានចំនួន៩ក្បាល និងស្លា.ប់ទៅវិញចំនួន៣ក្បាលប៉ុណ្ណោះ។
ជុំវិញដំណឹងដ៏ល្អនេះ ក្រសួងកសិកម្ម រុក្ខាប្រមាញ់ និងនេសាទ សូមអរគុណចំពោះបងប្អូនឆ្នាំទន្លេ អាជ្ញាធរមូលដ្ឋាន និងប្រជាពលរដ្ឋ ដែលបានចូលរួមថែរក្សា និងការពារធនធានជលផល ដែលជារតនាសម្បត្តិរបស់ជាតិដ៏មានតម្លៃ ។ បន្ថែមលើនេះ នៅថ្ងៃទី០៨ ខែវិច្ឆិកា ឆ្នាំ២០២៤ សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រី បានបង្ហោះសារអបអរសាទរ ចំពោះកូនផ្សោតទី៩ ដែលបានកើតនៅក្នុងឆ្នាំ២០២៤ ដែលធ្វើអោយចំនួននៃអត្រាកំណើតកូនផ្សោត ច្រើនពុំធ្លាប់មានទេ បើគិតចាប់តាំងពីឆ្នាំ ២០២១មក ។
ទន្ទឹមនឹងភាពរីករាយខាងលើ ក្រសួងកសិកម្ម រុក្ខាប្រមាញ់ និងនេសាទ សូមអំពាវនាវដល់បងប្អូនប្រជានេសាទ ត្រូវបញ្ឈប់ការប្រើឧបករណ៍នេសាទមង ក្នុងតំបន់ផ្សោតរស់នៅ និងឧបករណ៍ឆក់ជាបន្ទាន់ និងសូមផ្តល់ព័ត៌មានដល់សមត្ថកិច្ច នៅពេលឃើញមានអ្នកប្រើឧបករណ៍ឆក់ត្រី និងមងក្នុងតំបន់ផ្សោតរស់នៅ តាមរយៈលេខទូរស័ព្ទ ៖ ០៩៧ ៦៦៦ ៤៩៩៩ / ០១១ ៣៥៥ ៨៨៣ / ០៨៨ ៨៣៥៥ ៨៨៣ /០១២ ៨៩៧ ៩៤៣។
ការអំពាវនាវធ្វើឡើងដោយសារតែការប្រើឧបករណ៍នេសាទមង និងឧបករណ៍ឆក់ ក្នុងតំបន់ផ្សោតរស់នៅបានធ្វើអោយកម្ពុជាបាត់បង់សត្វផ្សោត ដែលត្រូវបានគេចាត់ទុកថា ជារតនសម្បត្តិធម្មជាតិដ៏មានតម្លៃរបស់កម្ពុជា និងពិភពលោកជាបន្តបន្ទាប់ ។ ជាក់ស្តែង កាលពីថ្ងៃទី១៦ ខែសីហា ឆ្នាំ២០២៤ កន្លងទៅមានសត្វផ្សោតញីជំទង់១ក្បាល ប្រវែង២,១០ម៉ែត្រ ទម្ងន់១០៨គីឡូក្រាម អាយុប្រមាណពី៨ទៅ១០ឆ្នាំ បានងាប់ត្រង់ចំណុចក្បាលកោះព្រហ្មចារី ក្បែរអន្លង់កាំពី ក្នុងភូមិជ្រោយបន្ទាយ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ បន្ទាប់ពីបានហែលទៅជាប់នឹងមងនេសាទក្រឡា១៥សង់ទីម៉ែត្រដែលដាក់ដោយអ្នកនេសាទ។
សូមជម្រាបថា សត្វផ្សោត ទន្លេមេគង្គ នៅកម្ពុជា នាឆ្នាំ២០២៤ មានការកើនឡើងគួរអោយ្ត់សម្គាល់ ពោលគឺពី ៩០ក្បាល នៅឆ្នាំ២០២២ ដល់ ១០៤ក្បាល គិតត្រឹមខែតុលាឆ្នាំ២០២៤។ តែបើយើងងាកទៅមើលស្ថានភាពផ្សោតទឹកសាបនៅទូទាំងសកលលោកវិញ ឃើញថា ក្នុងរយៈពេលត្រឹមតែ ៣៨ឆ្នាំចុងក្រោយ ចំនួនសត្វផ្សោតទឹកសាបទូទាំងពិភពលោកបានថយចុះជាមធ្យម ៧៣% ។
ទោះបីជាមានការខិតខំប្រឹងប្រែងអភិរក្ស ដូចជា តំបន់ការពារ ការផ្លាស់ប្តូរទីតាំង និងការគាំទ្រសម្រាប់សហគមន៍មូលដ្ឋានតាមដងទន្លេក៏ដោយ ប៉ុន្តែសកម្មភាពរបស់មនុស្ស ដូចជា នេសាទខុសច្បាប់ ការបំផ្លិចបំផ្លាញជម្រក ការសាងសង់ទំនប់វារី និងការបំពុលទឹក បានធ្វើអោយចំនួនសត្វផ្សោតដ៏កម្រទាំងនេះកំពុងប្រឈមនឹងការធ្លាក់ចុះយ៉ាងធ្ងន់ធ្ងរជំរុញឆ្ពោះទៅរកការផុតពូជ ។ សត្វផ្សោតទាំងអស់ ត្រូវបានគេចាត់ថ្នាក់ថាជាប្រភេទជិតផុតពូជ នៅក្នុងបញ្ជីក្រហមរបស់អង្គការ IUCN ៕
ចែករំលែកព័តមាននេះ