រាជធានីភ្នំពេញ ៖ លោកលី សាម៉េត ហៅគ្រូមា ត្រូវបានកម្លាំងនគរបាលឃាត់ខ្លួន នៅខេត្តកំពង់សោម ខណៈពេលដែលលោកចូលសារភាព រួចបញ្ជូនមកកាន់ស្នងការនគរបាលរាជធានីភ្នំពេញ ដើម្បីចាត់ការតាមច្បាប់ទាំងយប់…
រាជធានីភ្នំពេញ ៖ លោកលី សាម៉េត ហៅគ្រូមា ត្រូវបានកម្លាំងនគរបាលឃាត់ខ្លួន នៅខេត្តកំពង់សោម ខណៈពេលដែលលោកចូលសារភាព រួចបញ្ជូនមកកាន់ស្នងការនគរបាលរាជធានីភ្នំពេញ ដើម្បីចាត់ការតាមច្បាប់ទាំងយប់ ។
ការឃាត់ខ្លួន លោកលី សាម៉េត ធ្វើឡើងកាលពីល្ងាចថ្ងៃទី៤ ខែវិច្ឆិកាឆ្នាំ២០២៤នេះ បន្ទាប់ពីលោកបានឡាយវីដេអូសុំទោស សម្ដេចតេជោហ៊ុនសែន ជាសាធារណៈ ហើយសម្ដេចតេជោ បានមានប្រតិកម្មឆ្លើយតបវិញភ្លាមៗ ។
តាមផេកផ្លូវការរបស់សម្ដេចតេជោ បានបង្ហោះសារឲ្យដឹងថា« ខ្ញុំសូមបញ្ជាក់ជូនថា មិនមែនដោយសារតែវីដេអូសារភាពកំហុស និងសូមទោសមួយនេះលី សាម៉េត ត្រូវបានរួចខ្លួននោះឡើយ ។ ជំនួយការខ្ញុំម្នាក់ឈ្មោះ ដួង តារា ត្រូវបានឃាត់ខ្លួន រង់ចាំការកាត់ទោស ដោយសារជាប់ពាក់ព័ន្ធឆបោកជាមួយ លី សាម៉េត នេះ ។ ពេលនេះ លី សាម៉េត ក្រោយពីរត់គេចខ្លួនបានបង្ហាញខ្លួន ហើយសូមសមត្ថកិច្ចដែលជានគរបាល ឬកងរាជអាវុធហត្ថទៅនាំខ្លួន លី សាម៉េត បញ្ជូនទៅតុលាការ ដើម្បីកាត់ទោសតាមច្បាប់ ។ លី សាម៉េត បានសុំពេលព្យាបាលខ្លួននៅផ្ទះ មុនពេលចូលខ្លួនឱ្យតុលាការកាត់ទោស ។ មិនអាចធ្វើបែបនេះបានឡើយ នគរបាលយុត្តិធម៌ត្រូវតែនាំខ្លួនលី សាម៉េត បញ្ជូនទៅតុលាការតាមនីតិវិធី ។ ខ្ញុំសង្ឃឹមថា សមត្ថកិច្ចមិនបន្តឱ្យលី សាម៉េត បានស្ថិតនៅក្រៅសំណាញ់ច្បាប់ទៀតទេ» ។
បន្ទាប់ពីសម្ដេចឆ្លើយតបទៅនឹងការសុំទោស របស់លោកលី សាម៉េតត្រូវបានសមត្ថកិច្ចឃាត់ខ្លួនបញ្ជូនមកកាន់ស្នងការនគរបាលរាជធានីភ្នំពេញ ដើម្បីកិច្ចការតាមច្បាប់ ៕
ចែករំលែកព័តមាននេះ