ប្រទេសអេស្ប៉ាញ ៖ តាមប្រភពពីគេហទំព័រ Bleacher Report Football និង Sports Unplugged កាលពីថ្មីៗនេះបានឱ្យដឹងថា កីឡាករបាល់ទាត់ Vinicius Junior ត្រូវបានរាយការណ៍ថាបានបដិសេធសំណើដ៏ភ្ញាក់ផ្អើលបំផុតមួយពីក្លិប Al Ahli នៅលីគកំពូលរបស់ប្រទេសអារ៉ាប៊ីសាអូឌីត Saudi Pro League។

ប្រភពដដែលបានបន្តថា ក្លិប Al Ahli នឹងដាក់សំណើទឹកប្រាក់ ៤០០លានអឺរ៉ូ ដើម្បីផ្តាច់កុងត្រាកីឡាករ Vinicius Jr. ជាមួយក្លិបស្តេចស Real Madrid។ ទោះជាយ៉ាងណាក៏ដោយ ខ្សែបម្រើប្រយុទ្ធស្លាបឆ្វេងសញ្ជាតិប្រេស៊ីលវ័យ២៤ឆ្នាំរូបនេះ បញ្ជាក់យ៉ាងច្បាស់ហើយថា រូបគេចង់បន្តស្នាក់នៅជាមួយ Real Madrid និងបង្កើតកំណត់ត្រាផ្ទាល់ខ្លួនជាប្រវត្តិសាស្ត្រ សម្រាប់ក្លិបយក្សនៅអេស្ប៉ាញមួយនេះ។

ក្រៅពីការចំណាយប្រាក់ដ៏ច្រើនបង់ផ្តាច់កុងត្រា Vinicius Jr. នៅ Real Madrid ហើយនោះ ក្លិប Al Ahli ក៏បានផ្តល់ជូនសំណើពិសេសដ៏ភ្ញាក់ផ្អើលដល់ខ្សែបម្រើប្រយុទ្ធស្លាបឆ្វេងក្រុមសាំបាប្រេស៊ីលរូបនេះ ដែលរួមមាន ប្រាក់បៀវត្សរ៍សរុបចំនួន១ពាន់លានអឺរ៉ូ ដែលស្មើនឹង ២០០លានអឺរ៉ូក្នុងមួយឆ្នាំសម្រាប់កិច្ចសន្យារយៈពេល៥ឆ្នាំ មានន័យថា Vinicius Jr. នឹងក្លាយជាកីឡាករគ្មានតម្លៃខ្លួន ឬ Free Agent បន្ទាប់ផុតកុងត្រាជាមួយ Al Ahli នៅឆ្នាំ ២០២៩ ជាមួយឱកាសត្រឡប់ទៅប្រកបអាជីពនៅអឺរ៉ុបវិញ មុនពេលរូបគេអាយុ៣០ឆ្នាំ។

ក្លិប Al Ahli ក៏នឹងផ្តល់ជូនការងារពិសេសពាក់ព័ន្ធនឹងបាល់ទាត់នៅអារ៉ាប៊ីសាអូឌីតបន្ទាប់ពី Vinicius Jr. ចូលនិវត្តន៍ពីអាជីព ហើយក៏នឹងត្រូវតែងតាំងជាឯកអគ្គរដ្ឋទូតសម្រាប់ការប្រកួតព្រឹត្តិការណ៍បាល់ទាត់ពិភពលោក FIFA World Cup ឆ្នាំ ២០៣៤ ដែលអារ៉ាប៊ីសាអូឌីតទទួលបានសិទ្ធិធ្វើជាម្ចាស់ផ្ទះផងដែរ។

បច្ចុប្បន្នមូលនិធិវិនិយោគសាធារណៈអារ៉ាប៊ីសាអូឌីត PIF ឬម្យ៉ាងទៀតថា មូលនិធិទ្រព្យសម្បត្តិអធិបតេយ្យរបស់អារ៉ាប៊ីសាអូឌីតជាមួយទ្រព្យសម្បត្តិរហូតដល់ ៩៣០ពាន់លានដុល្លារអាមេរិកនោះ កំពុងតែកាន់កាប់ភាគហ៊ុន ៧៥% លើក្លិបធំៗចំនួន ៤ នៅ Saudi Pro League រួមមានក្លិប Al Ahli, Al Ittihad, Al Hilal និងក្លិប Al Nassr ដែលកំពូលខ្សែប្រយុទ្ធព័រទុយហ្គាល់ Cristiano Ronaldo កំពុងប្រកបអាជីពនៅទីនោះ។

គួរបញ្ជាក់ថា ខ្សែបម្រើប្រយុទ្ធស្លាបឆ្វេង Vinicius Jr. បានផ្លាស់ពីក្លិប Flamengo នៅប្រេស៊ីលមកចូលរួមជាមួយ Real Madrid នៅឆ្នាំ២០១៨ ក្នុងតម្លៃ៤៦លានអឺរ៉ូ ហើយបច្ចុប្បន្នកំពុងក្លាយជាកីឡាកដ៏រសំខាន់មួយរូបរបស់ក្រុម ដោយស៊ុតបញ្ចូលទី៩១គ្រាប់ពីការបង្ហាញខ្លួនសរុប ២៧៩ប្រកួតនៅគ្រប់កម្មវិធី។ កីឡាកររូបនេះរួមចំណែកជួយក្រុមឈ្នះពានរង្វាន់ជាច្រើនរួមទាំង La Liga ៣ដង UEFA Champions League ២ដង Copa del Rey ១ដង UEFA Super Cup និង FIFA Club World Cup ២ដង។ កុងត្រាបច្ចុប្បន្នរបស់ Vinicius Jr. ជាមួយ Real Madrid មានសុពលភាពរហូតដល់ចុងខែមិថុនា ឆ្នាំ២០២៧៕