ទីក្រុងព្យុងយ៉ាង៖ កូរ៉េខាងជើងប្ដេជ្ញាថាខ្លួននឹងជួយជ្រោមជ្រែងរុស្ស៊ីរហូតដល់ទទួលជ័យជម្នះនៅក្នុងសង្គ្រាមអ៊ុយក្រែន។ ការប្ដេជ្ញាចិត្តនេះធ្វើឡើងតាមរយៈរដ្ឋមន្ត្រីការបរទេសរបស់ខ្លួនដែលបំពេញទស្សនកិច្ចនៅទីក្រុងម៉ូស្គូ និងធ្វើឡើងចំពេលអាមេរិកទទួលស្គាល់ថាទាហានកូរ៉េខាងជើងរាប់ពាន់នាក់បានដាក់ពង្រាយនៅតាមព្រំដែនប្រទេសអ៊ុយក្រែនពិតមែន។
ពួកគេត្រៀមបញ្ជូនទៅសមរភូមិមុខនៅក្នុងពេលឆាប់ៗនេះ។ នៅក្នុងកិច្ចជំនួបទ្វេភាគីជាមួយប្រមុខការទូតរុស្ស៊ីនៅទីក្រុងម៉ូស្គូ លោកស្រីរដ្ឋមន្ត្រីការបរទេសកូរ៉េខាងជើង ឆូសុនហួយ (Choe Son Hui) បានចោទប្រកាន់ប្រទេសអាមេរិក និងកូរ៉េខាងត្បូងពីបទរៀបចំផែនការសម្ងាត់ដើម្បីវាយប្រហារដោយអាវុធនុយក្លេអ៊ែរទៅលើប្រទេសរបស់លោកស្រីនាពេលអនាគត។
ទំនាក់ទំនងជាប្រពៃណី ជាប្រវត្តិសាស្ត្រ និងជាមិត្តភាពរវាងប្រទេសយើងទាំង២ (រុស្ស៊ី និងកូរ៉េខាងជើង) បានធ្វើដំណើរហែលឆ្លងជីវិតបត់បែនគ្រប់រសជាតិទម្រាំមានថ្ងៃនេះ។ នាពេលបច្ចុប្បន្ន ទំនាក់ទំនងនេះបានអភិវឌ្ឍដល់ដំណាក់កាលថ្មី១នៃភាពជាយុទ្ធមិត្តនៅលើសមរភូមិយោធាដែលមិនអាចទទួលបរាជ័យជាដាច់ខាត។ លោកស្រីបានកោតសរសើរមិនដាច់ពីមាត់ថានេះជាផ្លែផ្កាដែលសម្រេចបានក្រោមស្នាដៃរបស់ប្រមុខដឹកនាំប្រទេសទាំង២ គឺលោកគីមជុងអ៊ុន និងលោកពូទីន។
លោកស្រីរដ្ឋមន្ត្រីរូបនេះថ្លែងថាកូរ៉េខាងជើងគ្មានអ្វីសង្ស័យទេថាការដឹកនាំដ៏ឈ្លាសវៃរបស់លោកពូទីននៅក្នុងវិស័យយោធា និងស៊ីវិលនឹងមានជោគជ័យនៅក្នុងការការពារអធិបតេយ្យភាពជាតិ និងផលប្រយោជន៍ជាតិរបស់ខ្លួន។ កូរ៉េខាងជើងសូមធានាច្បាស់ៗថាយើងនឹងបន្តឈរប្រកៀកស្មាគ្នាយ៉ាងរឹងមាំជាមួយយុទ្ធមិត្តរុស្ស៊ីរបស់យើងរហូតដល់ទទួលបានជ័យជម្នះ។
នៅក្នុងព្រឹត្តិការណ៍ដាច់ដោយឡែក១ទៀត។ អាមេរិកបានស្នើសុំឱ្យរដ្ឋាភិបាលចិនជួយឈឺឆ្អាលនៅក្នុងករណីដែលរបបក្រុងព្យុងយ៉ាងបញ្ជូនកងទ័ពយ៉ាងច្រើនសន្ធឹកសន្ធាប់ទៅធ្វើសង្គ្រាមនៅអ៊ុយក្រែន។ ទាហានកូរ៉េខាងជើង៨ពាន់នាក់ត្រៀមចុះទៅសមរភូមិ។ ដូច្នេះ អាមេរិកកំពុងទាក់ទងទៅប្រទេសចិនដើម្បីឱ្យចិនជួយទប់ស្កាត់ការហូរចូលនៃកងទ័ពកូរ៉េខាងជើង។
អាមេរិកបានសន្ទនាគ្នាជាមួយភាគីចិននៅសប្ដាហ៍នេះពាក់ព័ន្ធនឹងករណីដែលទាហានកូរ៉េខាងជើងទៅធ្វើសង្គ្រាមនៅរុស្ស៊ី។ ខាងលើនេះជាការអះអាងរបស់រដ្ឋមន្ត្រីការបរទេសអាមេរិក លោកប្លីងខិន ដោយមានរដ្ឋមន្ត្រីការពារជាតិអាមេរិក និងរដ្ឋមន្ត្រីការពារជាតិកូរ៉េខាងត្បូងនៅក្បែរនោះផងដែរ។ លោកប្លីងខិនយល់ថាចិនយល់ច្បាស់អំពីកង្វល់របស់អាមេរិក ហើយក៏យល់ច្បាស់នូវអ្វីដែលយើងបាន (ទាំងការសន្យា និងការអនុវត្តជាក់ស្ដែង)។ នោះគឺការប្រើប្រាស់ឥទ្ធិពលរបស់ចិនទៅលើកូរ៉េខាងជើង។
កាសែតញូយ៉កថាមស៍ចុះផ្សាយថាអនុរដ្ឋមន្ត្រីការបរទេសអាមេរិក រួមជាមួយមន្ត្រីជាន់ខ្ពស់ទទួលបន្ទុកខាងកិច្ចការអាស៊ី និងអឺរ៉ុបបានជួបមន្ត្រីរដ្ឋាភិបាលចិនកាលពីថ្ងៃព្រហស្បតិ៍។ លោកប្លីងខិនថ្លែងថាទាហានកូរ៉េខាងជើង៨ពាន់នាក់បានបញ្ជូនទៅដល់តំបន់ខឺសហើយបន្ទាប់ពីពួកគេទទួលការហ្វឹកហាត់ពីយោធាចារ្យរុស្ស៊ីលើវិញ្ញាសាបាញ់កាំភ្លើងធំ, បញ្ជាយន្តហោះដ្រូន និងចម្បាំងតាមលេណដ្ឋាន។ រដ្ឋមន្ត្រីការពារជាតិអាមេរិកថ្លែងបន្ថែមថាទាហានទាំងនោះស្លៀកពាក់ឯកសណ្ឋានរុស្ស៊ី និងបំពាក់អាវុធរុស្ស៊ី៕
ចែករំលែកព័តមាននេះ