ខេត្តស្វាយរៀង ៖ បុរសជាកសិករម្នាក់ ឈ្មោះអុក វុទ្ធី អាយុ៦១ឆ្នាំ ម្ចាស់កសិដ្ឋានចិញ្ចឹមត្រីនៅភូមិបន្លាស្អិត ឃុំច្រេស ស្រុកចន្ទ្រា បានចិញ្ចឹមត្រីចំនួន១២ស្រះទទួលបានជោគជ័យក្នុងមុខរបរធ្វើឲ្យគាត់រីករាយនិងមានមោទនៈភាព…
ខេត្តស្វាយរៀង ៖ បុរសជាកសិករម្នាក់ ឈ្មោះអុក វុទ្ធី អាយុ៦១ឆ្នាំ ម្ចាស់កសិដ្ឋានចិញ្ចឹមត្រីនៅភូមិបន្លាស្អិត ឃុំច្រេស ស្រុកចន្ទ្រា បានចិញ្ចឹមត្រីចំនួន១២ស្រះទទួលបានជោគជ័យក្នុងមុខរបរធ្វើឲ្យគាត់រីករាយនិងមានមោទនៈភាព ដោយការចិញ្ចឹមត្រីរបស់គាត់ទទួលបានជោគជ័យ គឺចិញ្ចឹមតាំងពី ស្រះតូច១ ត្រី៣ទៅ៤០០ក្បាល រហូតកើនដល់១២ស្រះ មានត្រីរហូត៥០ម៉ឺនក្បាល អាចចាប់លក់បានរាល់ថ្ងៃ រកប្រាក់ចំណូលផ្គត់ផ្គង់ជីវភាពគ្រួសារបានល្អប្រសើរ គឺអាចចាប់លក់បានរាល់ថ្ងៃ គឺក្នុង១ថ្ងៃអាចលក់បានត្រីប្រា ចាប់ពី៥០គីឡូទៅ១០០គីឡូក្រាម។
បើតាមម្ចាស់កសិដ្ឋាន ឈ្មោះអុក វុទ្ធី បានប្រាប់កោះសន្តិភាព នៅព្រឹកថ្ងៃទី០១ វិច្ឆិកា ២០២៤ នេះថា ដោយគ្រួសារគាត់រស់នៅជនបទ ក្នុងភូមិបន្លាស្អិតឃុំច្រេសស្រុកចន្ទ្រា មុខរបរធ្វើស្រែ មិនសូវជា មានជីវភាពធូធាទេ កន្លងមក ការធ្វើស្រែជួនទឹកលិចស្រូវមិនសូវទទួលបានទិន្និផល ក្រោយមកនៅក្នុងឆ្នាំ២០១០ ក៏បានចាប់ផ្តើម សាកល្បងជីកស្រះ០១ ដាក់ចិញ្ចឹមត្រីប្រានិងត្រីពោ ចំនួន៣០០ទៅ៤០០ក្បាល គឺរកកាកសំណល់ផ្ទះបាយនិងបរបរបន្លែ រួចលាយកន្ទក់ ធ្វើជាចំណី ឲ្យត្រីស៊ី លក់ចំណេញ ក៏ចាប់ផ្តើមជីកស្រះបន្ថែម១ទៀត ចិញ្ចឹមត្រីប្រា ត្រីពោនិងអណ្តែង ដាក់ឡើង១ពាន់ក្បាល កូនត្រីអណ្តែង ៥០គីឡូ ចិញ្ចឹមជោគជ័យទៀត ក៏ប៉ុន្តែក៏ធ្លាប់បរាជ័យចំនួន២ទៅ៣លើកដែរ ដោយខែវស្សា ទឹកភ្លៀងជន់ខ្លាំងលេចភ្លឺស្រះត្រីចេញអស់ខាតទុន៣លើក ។
ក្រោយមកទៀត ក៏ចាប់ផ្តើមរៀបចំស្រះ ចំនួន៥ស្រះ លើកភ្លឺស្រះខ្ពស់ ផុតទឹករដូវវស្សា បន្តដាក់ត្រីចិញ្ចឹម ជាកសិដ្ឋានខ្នាតតូចលក្ខណៈគ្រួសារ ដាក់ត្រី ប្រដេញគ្នា ទាំង៥ស្រះ គឺរៀបចំផលិតចំណី ដោយទៅយកកាកសំណល់ផ្ទះបាយនៅកាស៊ីណូ យកមកបរបរ ឲ្យឆ្អិនរួចដួសកូលាយជាមួយកន្ទក់ កូរចូលគ្នា ដាក់ជាចំណីឲ្យត្រី គឺជោគជ័យរហូត ។ក៏ពង្រីកស្រះបន្ថែមរាល់ឆ្នាំ រហូមកដល់ឆ្នាំ២០១៨ ក៏ពង្រីកស្រះបានរហូតដល់១២ស្រះដាក់ត្រីប្រដេញគ្នា តាមស្រះនីមួយៗ គឺចាប់ដាក់ត្រីពូជ ត្រីប្រា៣០ម៉ឺនក្បាលត្រីពោ ៤ម៉ឺនក្បាល ត្រីអណ្តែង២៥០គីឡូក្រាម ។
ហើយការដាក់ត្រីគឺចាប់ផ្តើមដាក់ចាប់ពីថ្ងៃ១០ ខែមេសា ដល់ខែតុលា ត្រីប្រាត្រីពោ គឺធំក្នុង១ក្បាល ៨ខាំទៅ១គីឡូ អាចចាប់លក់បាន គឺជោគជ័យខ្លាំងនៅឆ្នាំ២០១៩ មានផ្ទុះជម្ងឺកូវីដ-១៩ ត្រីលក់បានតម្លៃថ្លៃគួសម រហូតដល់ឆ្នាំ២០២២ ជោគជ័យខ្លាំងគួរជាទីមោទនៈ ។ហើយការចិញ្ចឹមត្រីបន្តឆ្នាំ២០២៣ -២០២៤នេះ ដាក់កូនត្រីចាប់ពីថ្ងៃទី១០ខែមេសា ២០២៤ កូនត្រីប្រា ដាក់៣០ម៉ឺនក្បាល ត្រីពោ ដាក់៤ម៉ឺនក្បាល កូនត្រីអណ្តែងទន់ដាក់ ២៥០គីឡូក្រាម។
ការប្រើប្រាស់ចំណី ច្រើន មានកាកសំណល់ផ្ទះបាយកាស៊ីណូយកមកបរបរ ហើយកន្ទក់ប្រើក្នុង១ថ្ងៃ០៨បាវ (១បាវ៥០គីឡូ)។លោកអុកវុទ្ធី បានបញ្ជាក់ថា នៅខែតុលាឆ្នាំ២០២៤នេះ ត្រីប្រា គឺធំហើយក្នុង១ក្បាលទម្ងន់០៦ខាំទៅ១គីឡូ គឺចាប់លក់បោះឲ្យម៉ូយទៅទទូលទិញដល់កសិដ្ឋាន ទិញត្រឹម១០គីឡូ លក់ជូន១គីឡូ៦,០០០រៀល បើទិញ៥០គីឡូឡើង ១គីឡូ៥,៥០០រៀល ហើយមួយចំនួនគឺដឹកយកទៅលក់បោះឲ្យម៉ូយនៅផ្សារប្រសូតិ ឃុំប្រសូតិ ស្រុកស្វាយទាប។
បើអ្នកភូមិទិញហូបលក់នៅខាងមុខកសិដ្ឋាន លក់១គីឡូតម្លៃ៨,០០០រៀល។ ហើយក្នុង១ថ្ងៃជាមធម្យមត្រីប្រា លក់បាន៥០គីឡូទៅ១០០គីឡូក្រាមចំណែកត្រីពោ ខែធ្នូទើបចាប់លក់ ហើយត្រីអណ្តែងទន់ ដល់ខែកុម្ភៈ២០២៥ទើបចាប់លក់។លោកអុកវទ្ធី បានបញ្ជាក់ថា ចាប់ពីខែមករា ដល់ខែកក្កដា ត្រីលក់បានច្រើន ហើយត្រីបានធំៗទៀត១ក្បាលអាចបាន១គីឡូ កន្លះទៅ២គីឡូក្រាម។
ទាក់ទិនការចិញ្ចឹមត្រីនេះដែរលោក អ៊ុងសំអឿន មេភូមិបន្លាស្អិត បានប្រាប់កោះសន្តិភាពថា នៅក្នុងភូមិបន្លាស្អិតនេះ មានចិញ្ចឹមត្រី០២គ្រួសារ គត់ ក៏ប៉ុន្តែ មានតែឈ្មោះ អុក វុទ្ធី ទេដែលចិញ្ចឹមជាលក្ខណៈកសិដ្ឋានខ្នាតតូច មានស្រះចំនួន១២ស្រះ ហើយគាត់តស៊ូចិញ្ចឹមតាំងពីមានតែ១ស្រះ រហូតពង្រីកបាន១២ស្រះ ចំណែកមួយគ្រួសារទៀតគឺមានតែ២ស្រះចិញ្ចឹមមិនទាន់ទទួលបានជោគជ័យទេ ហើយឆ្នាំនេះដាក់កូនត្រីបួន៥០០ក្បាលប៉ុណ្ណោះ។
លោកមេភូមិបានបញ្ជាក់ថាកន្លងមកក៏មានឯកឧត្តមតំណាងរាស្ត្រមណ្ឌលស្វាយរៀងចុះមកជាមួយអាជ្ញាធរឃុំ ច្រេស និងលោកអភិបាលស្រុកចន្ទ្រា មកសួរសុខទុក្ខនិងលើកទឹកចិត្តដល់ម្ចាស់កសិដ្ឋានចិញ្ចឹមត្រី លោកអុក វុទ្ធី ឲ្យ ចិញ្ចឹមកង្កែប និងមាន់ ទា បន្ថែម ធ្វើជាកសិករគំរូ ដើម្បី ជម្រុញឲ្យប្រជាពលរដ្ឋក្នុងភូមិ នាំគ្នា មកចិញ្ចឹមត្រី និងចិញ្ចឹមសត្វជាលក្ខណៈគ្រួសារឲ្យបានច្រើនគ្រួសារដើម្បីផ្គត់ផ្គង់ទីផ្សារ ក្នុងស្រុក និងតាមទីប្រជុំជនឲ្យមាននីរន្តរភាព ។
បើតាមអ្នកលក់ត្រី នៅផ្សារក្រុងស្វាយរៀង បានលើកឡើងថា ត្រីប្រា ត្រីពោ នាំចូលពីប្រទេសវៀតណាមគឺលក់ចេញក្នុង១គីឡូក្រាមតម្លៃ១២,០០០រៀល បើត្រី ខ្មែរយើងចិញ្ចឹមលក្ខៈគ្រួសារ១គីឡូូតម្លៃ១៥,០០០រៀលនិងត្រី អណ្តែង១គីឡូតម្លៃ២ម៉ឺនរៀល(ត្រីចិញ្ចឹម)៕
ចែករំលែកព័តមាននេះ