រាជធានីភ្នំពេញ ៖ ក្រុមបាល់ទាត់ជម្រើសជាតិកម្ពុជាអាយុក្រោម១៧ឆ្នាំ នឹងត្រូវប៉ះក្រុមជម្រើសជាតិអាហ្វហ្គានីស្ថានអាយុក្រោម១៧ឆ្នាំ នៅវេលាម៉ោង ០៧:០០នាទីយប់នេះ នៅកីឡដ្ឋានព្រីនស៍ រាជធានីភ្នំពេញ សម្រាប់ជំនួបទី៣ ពូល B វគ្គជម្រុះពានរង្វាន់ AFC U17 Asian Cup 2025 Qualifiers ដែលកម្ពុជាទទួលបានសិទ្ធិធ្វើជាម្ចាស់ផ្ទះ។

ឆ្លងកាត់២ប្រកួតក្នុងពូលកន្លងមក ទាំងកម្ពុជា និងអាហ្វហ្គានីស្ថាន សុទ្ធតែឈ្នះទាំងអស់ដូចគ្នា ប៉ុន្តែបើក្រឡេកមើលស្ថិតិការប្រកួតវិញ អាហ្វហ្គានីស្ថានមានប្រៀបជាងកម្ពុជា។ បច្ចុប្បន្នអាហ្វហ្គានីស្ថានកំពុងឈរនៅកំពូលតារាង ជាមួយនឹងស្ថិតិដ៏ល្អដោយមានគ្រាប់ចំណេញដល់១៧គ្រាប់ និងបិទមិនឱ្យគូប្រកួតស៊ុតបញ្ចូលទីបាន ក្រោយបំបាក់ហ្វីលីពីន នៅក្នុងលទ្ធផល ៨-០ និងបន្តបំបាក់ម៉ាកាវ នៅក្នុងលទ្ធផល ៩-០។

ដោយឡែក កម្ពុជាដែលឈរនៅលេខ២បានយកឈ្នះបង់ក្លាដែស នៅក្នុងលទ្ធផល ១-០ និងបន្តយកឈ្នះម៉ាកាវ នៅក្នុងលទ្ធផល ១-០ បន្ថែមទៀតផងដែរ។ ដូច្នេះជំនួបនៅយប់នេះ នឹងក្លាយជាការប្រកួតដ៏ជក់ចិត្តដិតអារម្មណ៍ ព្រោះត្រូវប្រជែងចំណាត់ថ្នាក់លេខ១។

នៅក្នុងពូល B ហ្វីលីពីនឈរនៅលេខ៤ មាន៣ពិន្ទុ និងម៉ាកាវនៅបាតតារាងគ្មានពិន្ទុរាប់ បានធ្លាក់ចេញពីការប្រកួតរួចទៅហើយ ទោះបីជានៅសល់១ប្រកួតទៀតក្នុងដៃក៏ដោយ។ ដ្បិតបង់ក្លាដែសមាន៣ពិន្ទុឈរនៅលេខ៣ នៅមាន២ប្រកួតក្នុងដៃ ហើយនៅវេលាម៉ោង ០៤:០០នាទីរសៀលនេះ ពួកគេត្រូវប៉ះម៉ាកាវ នៅកីឡដ្ឋានព្រីនស៍ រាជធានីភ្នំពេញ។

សូមជម្រាបថា កម្ពុជាទទួលបានសិទ្ធិធ្វើជាម្ចាស់ផ្ទះការប្រកួតវគ្គជម្រុះ ពានរង្វាន់ AFC U17 Asian Cup 2025 Qualifiers សម្រាប់ពូល B ដែលដំណើរការចាប់ពីថ្ងៃទី១៩ ខែតុលា រហូតដល់ថ្ងៃទី ២៧ ខែតុលា ឆាំ្ន ២០២៤ ដោយប្រើប្រាស់ពហុកីឡដ្ឋានជាតិអូឡាំពិក និងកីឡដ្ឋានព្រីនស៍ ស្ថិតនៅរាជធានីភ្នំពេញ ដើម្បីរៀបចំការប្រកួត។ ក្រុមលេខ១ប្រចាំពូល នឹងបានសិទ្ធិស្វ័យប្រវត្តិទៅកាន់ការប្រកួតជុំផ្តាច់ព្រ័ត្រពានរង្វាន់ AFC U17 Asian Cup ឆ្នាំ ២០២៥ ដែលប្រទេសអារ៉ាប៊ីសាអូឌីតទទួលធ្វើម្ចាស់ផ្ទះ ខណៈដែលក្រុមលេខ២ត្រូវអ៊ុតចំណាត់ថ្នាក់ក្រុមលេខ២ល្អ៕ (រូបភាព ៖ សហព័ន្ធកីឡាបាល់ទាត់កម្ពុជា និង AFC Asian Cup)