រាជធានីភ្នំពេញ ៖ ក្រសួងការពារជាតិបានប្រកាសហាមយកយានយន្តដែលពាក់ផ្លាកលេខចរាចរណ៍ខេមរភូមិន្ទទៅធ្វើការជួលបន្តឱ្យបណ្តាក្រុមហ៊ុន ស្ថាប័ន រូបវន្តបុគ្គលនានា ប្រើប្រាស់ឡើយ ។
យោងតាមសេចក្តីជូនដំណឹងរបស់ក្រសួងការពារជាតិ នៅថ្ងៃទី២១ ខែតុលា ឆ្នាំ២០២៤ ស្តីពីការប្រើប្រាស់យានយន្តពាក់ផ្លាកលេខចរាចរណ៍ខេមរភូមិន្ទ បានលើកឡើងថា យោងតាមបទបញ្ជាដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ថ្ងៃទី១៥ ខែតុលា ឆ្នាំ២០២៤ ក្នុងពិធីខួបអនុស្សាវរីយ៍ ៣០ឆ្នាំ ថ្ងៃបង្កើតកងពលតូចលេខ៧០ (១៥ តុលា ១៩៩៤ – ១៥ តុលា ២០២៤) និងយោងតាមបទបញ្ជាឯកឧត្តម នាយឧត្តមសេនីយ៍ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ថ្ងៃទី១៨ ខែតុលា ឆ្នាំ២០២៤ ។
អគ្គនាយកដ្ឋានសម្ភារៈបច្ចេកទេស ក្រសួងការពារជាតិ សូមជូនដំណឹងដល់បណ្តាស្ថាប័ន កងឯកភាពចំណុះក្រសួងការពារជាតិ អគ្គបញ្ជាការដ្ឋាន គ្រប់បណ្តាប្រភេទទ័ព និងទ័ពជំនាញទាំងអស់ឱ្យបានជ្រាបថា ដើម្បីធានាឱ្យបានកាន់តែល្អប្រសើរនូវវិន័យសណ្តាប់ធ្នាប់ ការគារព ច្បាប់ស្តីពីចរាចរណ៍ផ្លូវគោក ពង្រឹងទប់ស្កាត់ការប្រើប្រាស់ផ្លាកលេខចរាចរណ៍ខេមរភូមិន្ទ ដែលបណ្តាលឱ្យប៉ះពាល់ដល់សង្គមសាធារណៈដូចជា បញ្ហាគ្រោះថ្នាក់ចរាចរណ៍ បុគ្គលអ្នកប្រើប្រាស់មួយចំនួនមានភាពក្រអឺតក្រទមមិនសក្តិសមជាមន្ត្រីយោធា ធ្វើឱ្យមានការវាយតម្លៃ និងទទួលការរិះគន់ពីសាធារណជន ជាពិសេសប៉ះពាល់ដល់កិត្តិយស និងសេចក្តីថ្លៃថ្នូររបស់កងយោធពលខេមរភូមិន្ទ ។
អគ្គនាយកដ្ឋាន សម្ភារៈបច្ចេកទេស ក្រសួងការពារជាតិ សូមដាក់ចេញនូវវិធានការកំណត់ក្នុងការប្រើប្រាស់ផ្លាកលេខចរាចរណ៍ខេមរភូមិន្ទសម្រាប់កងយោធពលខេមរភូមិន្ទដូចជាយានយន្តដែលអាចបំពាក់ផ្លាកលេខចរាចរណ៍ខេមរភូមិន្ទ រួមមាន យានយន្តដែលរដ្ឋបំពាក់ ។
យានយន្តជាជំនួយពីបណ្តាប្រទេសនានាសម្រាប់អង្គភាពកងទ័ពយានយន្តជាអំណោយពីសប្បុរសជននានា សម្រាប់អង្គភាពកងទ័ព ។ យានយន្តជាកម្មសិទ្ធិរបស់រដ្ឋដែលអស់ប្រសិទ្ធភាពប្រើប្រាស់ ហើយត្រូវកែច្នៃរៀបដំឡើងសារជាថ្មី ។ យានយន្តដែលទទួលបានពីការសម្រេចរបស់តុលាការ ។ យានយន្តដែលបានបំពេញកាតព្វកិច្ចបង់ពន្ធនាំចូល និងអាករផ្សេងៗរួចរាល់ ។
ក្រសួងការពារជាតិបានឲ្យនាយទាហានដែលត្រូវបានអនុវត្តឲ្យប្រើប្រាស់ផ្លាកលេខខេមរភូមិន្ទត្រូវគោរពតាមច្បាប់ស្តីពីចរាចរណ៍ផ្លូវគោកជាកំណត់ ។ ក្នុងករណីរំលោ.ភបំពាន ការប្រើប្រាស់ផ្លាកលេខចរាចរណ៍ខេមរភូមិន្ទត្រូវបានដកហូតមករក្សាទុកនៅអគ្គនាយកដ្ឋានសម្ភារៈបច្ចេកទេស ក្រសួងការពារជាតិវិញ ។
នាយទាហានដែលបានចូលនិវត្តន៍ ពលី មរណៈ និងពិការត្រូវអស់កាតព្វកិច្ចប្រើប្រាស់ផ្លាក លេខចរាចរណ៍ខេមរភូមិន្ទ និងត្រូវបានដកហូតមករក្សាទុកនៅអគ្គនាយកដ្ឋានសម្ភារៈបច្ចេកទេសក្រសួងការពារជាតិវិញ ។
ជាមួយគ្នានោះដែរ ក្រសួងការពារជាតិ ក៏បានគូសបញ្ជាក់ថា ចំពោះនាយទាហាននាយទាហាន ដែលបានប្រើប្រាស់ផ្លាកលេខចរាចរណ៍ខេមរភូមិន្ទ ត្រូវអនុវត្តឱ្យបានខ្ជាប់ខ្ជួននូវបំរាមកំណត់ដូចខាងក្រោម ៖ ហាមយកយានយន្តដែលពាក់ផ្លាកលេខចរាចរណ៍ខេមរភូមិន្ទ ទៅធ្វើការជួលបន្តឱ្យបណ្តាក្រុមហ៊ុន ស្ថាប័ន រូបវន្តបុគ្គលនានាប្រើប្រាស់ឡើយ ។ ហាមយកផ្លាកលេខចរាចរណ៍ខេមរភូមិន្ទទៅបំពាក់លើយានយន្តផ្សេងទៀតដែលខុសពីប្រភេទយានយន្តដែលបានស្នើសុំ ។
អ្នកប្រើប្រាស់យានយន្តពាក់ផ្លាកលេខចរាចរណ៍ខេមរភូមិន្ទ ត្រូវតែជានាយ ទាហាន ជាយោធិន -នៃកងយោធពលខេមរភូមិន្ទ និងអាស្រ័យមេបញ្ជាការអង្គភាពបញ្ជាក់ស្នើសុំបំពេញបែបបទតាមឋានានុក្រម ដោយមិនអនុញ្ញាតឱ្យជនស៊ីវិល ឬជនបរទេសប្រើប្រាស់បានឡើយ ។ ចំពោះក្រុមហ៊ុនសហការវិនិយោគជាមួយវិស័យការពារជាតិក៏ត្រូវបានអនុវត្តដូចគ្នា ។
ក្រសួងការពារជាតិក៏បានជួយបញ្ជាក់បន្ថែមថា ក្នុងករណីដែលអនុវត្តខុសពីបំរាមកំណត់ខាងលើអគ្គនាយកដ្ឋានសម្ភារៈបច្ចេកទេស ក្រសួងការពារជាតិនឹងចាត់វិធានការច្បាប់ជាធរមាន ។ ក្នុងសេចក្តីជូនដំណឹងនោះដែរ ក្រសួងកម្ពុជាជាតិបានលើកឡើងទៀតថា ខ្លឹមសារខាងលើត្រូវបានអនុវត្តចាប់ពីថ្ងៃជូនដំណឹងនេះតទៅ អាស្រ័យហេតុនេះ សូមបណ្តា ស្ថាប័ន កងឯកភាពចំណុះក្រសួងការពារជាតិ អគ្គបញ្ជាការដ្ឋាន គ្រប់បណ្តាប្រភេទទ័ព និងទ័ពជំនាញ ទាំងអស់ដែលប្រើប្រាស់ផ្លាកលេខចរាចរណ៍ខេមរភូមិន្ទ មេត្តាជ្រាប និងអនុវត្តឱ្យបានម៉ឺងម៉ាត់បំផុត ៕
ចែករំលែកព័តមាននេះ