រាជធានីភ្នំពេញ ៖ ក្នុងរយៈពេល៩ខែ ឆ្នាំ២០២៤មកនេះក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់ប្រជាពលរដ្ឋក្នុងទំព័រហ្វេសប៊ុករបស់សម្តេចក្រឡា ហោម ស ខេង ឧត្តមប្រឹក្សាផ្ទាល់ព្រះមហាក្សត្រ និងឯកឧត្តមឧបនាយករដ្ឋមន្ដ្រី ស សុខា រដ្ឋមន្ដ្រីក្រសួងមហាផ្ទៃ ក្នុងសមត្ថកិច្ចក្រសួងមហាផ្ទៃបានដោះស្រាយ និងឆ្លើយតបទៅម្ចាស់គណនីចំនួន២៧៤គណនី និង១២៤គណនីទៀតកំពុងស្ថិតក្នុងដំណាក់កាលដោះស្រាយ ។
តាមរយៈបណ្ដាញសង្គម ហ្វេសប៊ុក នាថ្ងៃទី២១ ខែតុលានេះ អភិសន្តិបណ្ឌិត ស សុខា បានបញ្ជាក់ថា«ក្នុងរយៈពេល៩ខែ នៃឆ្នាំ២០២៤នេះ ក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់បងប្អូនប្រជាពលរដ្ឋក្នុងទំព័រហ្វេសប៊ុករបស់ខ្ញុំ និងទំព័រហ្វេសប៊ុក សម្តេចក្រឡាហោម ស ខេង ក្នុងសមត្ថកិច្ចក្រសួងមហាផ្ទៃបានទទួលសំណូមពរ និងសំណួររបស់ប្រជាពលរដ្ឋចំនួន៥៨២គណនី ដែលក្នុងនោះមតិយោបល់របស់ប្រជាពលរដ្ឋ ចំនួន១៨៤គណនីបានលើកឡើងជាធាតុចូលជូនថ្នាក់ដឹកនាំ និងអង្គភាពជំនាញផ្សេងៗ ដើម្បីជ្រាបក៏ដូចជា ការកែលំអរក្នុងការងារប្រចាំថ្ងៃ ក្នុងដែនសមត្ថកិច្ចក្រសួងមហាផ្ទៃ ។
ទន្ទឹមនឹងនេះដែរ ក្រុមការងារ ក៏បានទទួលបានការដោះស្រាយ និងបានឆ្លើយតបទៅម្ចាស់គណនីចំនួន២៧៤គណនី និង១២៤គណនីទៀតកំពុងស្ថិតក្នុងដំណាក់កាលដោះស្រាយ» ។
ឆ្លៀតក្នុងឱកាសនេះ អភិសន្តិបណ្ឌិតឧបនាយករដ្ឋមន្ដ្រី បានលើកទឹកចិត្ត និងសូមឲ្យថ្នាក់ដឹកនាំ និងមន្ត្រីស្ថិតក្នុងដែនសមត្ថកិច្ចក្រសួងមហាផ្ទៃ ទាំងថ្នាក់ជាតិ និងថ្នាក់ក្រោមជាតិ និងក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់បងប្អូនប្រជាពលរដ្ឋនៅក្នុងទំព័រហ្វេសប៊ុក ខិតខំប្រឹងប្រែង និងការសហការគ្នាបំពេញភារកិច្ចជូនប្រជាពលរដ្ឋ និងឧត្តមប្រយោជន៍ជាតិ ឱ្យបានកាន់តែល្អប្រសើ ។
ជាមួយគ្នានេះ លោកអភិសន្តិបណ្ឌិត ក៏សុំការយល់យោគអធ្យាស្រ័យពីបងប្អូនជនរួមជាតិ ចំពោះករណីមួយចំនួនទៀតដែលក្រុមការងារ និងភាគីពាក់ព័ន្ធនៅមិនទាន់បានដោះស្រាយចប់សព្វគ្រប់ ដោយសារតែករណីខ្លះមានភាពស្មុគស្មាញត្រូវទាមទារពេលវេលាក្នុងការដោះស្រាយ ។
ឯកឧត្តម ស សុខា ក៏បានថ្លែងអំណរគុណជនរួមជាតិ ដែលបានលើកជាមតិយោបល់ និងសំណូមពរនានាមកកាន់ទំព័រហ្វេសប៊ុករបស់លោក និងទំព័រហ្វេសប៊ុក សម្តេចក្រឡាហោម ស ខេង ដើម្បីរួមគ្នាដោះស្រាយបញ្ហានានាក្រៅប្រព័ន្ធតុលាការ ដែលជាផ្នែកដ៏សំខាន់ជួយសម្រួលជីវភាពរស់នៅរបស់បងប្អូន និងរួមគ្នាអភិវឌ្ឍន៍សង្គមជាតិ ៕
ចែករំលែកព័តមាននេះ