ខេត្តកណ្ដាល ៖ ជនសង្ស័យម្នាក់ គ្រាន់តែជាប់ពន្ធនាគារក្នុងអំពើលួច ត្រឹមតែរយៈពេល២ឆ្នាំប៉ុណ្ណោះ ចំនួន៣ដងទៅហើយ ប៉ុន្តែមិនព្រមរាងចាល កែខ្លួនទាល់តែសោះ ក្រោយពេលចេញមកវិញបាននាំបក្ខពួកម្នាក់ទៀត ចេញប្រព្រឹត្តអំពើលួច ឆក់បន្តទៀត។ ចុងក្រោយបានធ្វើសកម្មភាពឆក់ទូរសព្ទពីស្ត្រីម្នាក់បានសម្រេច ហើយយកទៅលក់បានប្រាក់ត្រឹមតែ៤ម៉ឺនរៀលប៉ុណ្ណោះ យកមកចែកគ្នាចាយ ក្រោយមក ត្រូវបាននគរបាលស្រាវជ្រាវឃាត់ខ្លួន បានអាចជាប់គុកជាលើកទី៤ទៀត ។
សកម្មភាពឆក់នោះបានកើតឡើងនៅវេលាម៉ោង១២និង៣០នាទីយប់រំលងអធ្រាត្រឈានចូលថ្ងៃទី១០ ខែតុលា ឆ្នាំ២០២៤ ស្ថិតនៅត្រង់ចំណុចហាងម៉ាស្សាយីហោ «៦៦៦៦» នៅក្នុងភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល ។
ជនសង្ស័យជំនាញខាងលួច និងឆក់ខាងលើនោះ មានឈ្មោះ សាំង សុផាត ហៅស៊ីមពីរ ឫអាញ៉ា អាយុ១៩ឆ្នាំ ជនជាតិខ្មែរ មានទីលំនៅភូមិត្រពាំងពើក ឃុំពើក ស្រុកអង្គស្នួល ខេត្ដកណ្ដាល ។ ជននេះ ពិតជាមិនធម្មតានោះទេ ត្រឹមតែរយៈពេល២ឆ្នាំប៉ុណ្ណោះ ធ្លាប់ជាប់ពន្ធនាគារខេត្ដកណ្ដាល រហូតដល់ទៅចំនួន០៣លើឯណោះ ។ ក្នុងនោះរួមមានលើកទី១ នៅក្នុងឆ្នាំ២០២១ ជាប់ក្នុងបទអំពើលួច រយៈពេល០៣ថ្ងៃ, លើកទី២ នៅក្នុងឆ្នាំ២០២១ដដែល ជាប់ក្នុងបទលួច រយៈពេល១ឆ្នាំ, និងលើកទី៣ ក្នុងឆ្នាំ២០២២ ជាប់ក្នុងបទលួច រយៈពេល១ឆ្នាំ ។ ចំណែកបក្ខពួកម្នាក់ទៀត ឈ្មោះ ថា ប៊ុនរាជសិទ្ធិគុណ ហៅឡាញ អាយុ១៥ឆ្នាំ ជនជាតិខ្មែរ មានទីលំនៅនៅភូមិព្រៃចំការ ឃុំលំហាច ស្រុកអង្គស្នួល ខេត្ដកណ្ដាល ។ រីឯអ្នកទទួលទិញទូរសព្ទ ដែលលួចបាននោះឈ្មោះ សុខ សាត ភេទប្រុស អាយុ២៨ឆ្នាំ មានទីលំនៅនៅភូមិត្រពាំងពើក ឃុំពើក ស្រុកអង្គស្នួល ។
ស្ត្រីរងគ្រោះ ដែលជាម្ចាស់ទូរសព្ទខាងលើឈ្មោះ គឿន ស្រីហ៊ាង អាយុ២៤ឆ្នាំ ជនជាតិខ្មែរ មុខរបរ បុគ្គលិកហាងម៉ាស្សា ស្នាក់នៅក្នុងភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល។ បាត់បង់ទូរសព្ទម៉ាក iPhone 8plus ពណ៌ផ្កាឈូក មួយគ្រឿង ។
សកម្មភាពខាងលើ ពុំត្រូវបានគេដឹងលម្អិតនោះទេ គ្រាន់តែដឹងថា ជនសង្ស័យ២នាក់នោះ ជិះម៉ូតូមួយគ្រឿង ម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៧ ពាក់ស្លាកលេខ ព្រៃវែង1L-1891 ចេញធ្វើសកម្មភាពឆក់ ។ ដោយជនសង្ស័យឈ្មោះ សាំង សុផាត ហៅ ស៊ីមពីរ ហៅញ៉ា គឺជាអ្នកបើកបរម៉ូតូ ដឹកជនសង្ស័យឈ្មោះ ថា ប៊ុនរាជសិទ្ធិគុណ ហៅឡាញ ហើយឆក់ទូរសព្ទរបស់ស្ត្រីរងគ្រោះខាងលើ បានសម្រេចរួចគេចខ្លួនបាត់ ។
បន្ទាប់មកជនរងគ្រោះ បានដាក់ពាក្យប្ដឹងនៅប៉ុស្តិ៍នគរបាលដំណាក់អំពិល ហើយក៏ត្រូវនគរបាលធ្វើការស្រាវជ្រាវរហូតឈានដល់ការចាប់ខ្លួនជនសង្ស័យបានទាំង២នាក់ រួចនាំទៅសាកសួរ និងចាត់ការតាមច្បាប់តែម្ដង ។
ក្រោយនគរបាលសួរនាំជនសង្ស័យទាំងពីរនាក់ បានឆ្លើយសារភាពថា ពួកគេ ពិតជាបានធ្វើសកម្មភាពឆក់យកទូរសព្ទរបស់ជនរងគ្រោះពិតប្រាកដមែន ហើយបានយកទៅលក់ឲ្យឈ្មោះ សុខ សាត ភេទប្រុស អាយុ២៨ឆ្នាំ នៅភូមិត្រពាំងពើក ឃុំពើក ស្រុកអង្គស្នួល បានលុយចំនួន៤០,០០០រៀល (បួនម៉ឺនរៀល) ប៉ុណ្ណោះ យកចែកគ្នាចាយ ។
ជនសង្ស័យបានសារភាពបន្តទៀតថា កាលពីថ្ងៃទី០៩ ខែតុលា ឆ្នាំ២០២៤ វេលាម៉ោងប្រហែល១យប់រំលងអធ្រាត្រ ខ្លួនបានធ្វើសកម្មភាពឆក់ទូរសព្ទម៉ាក OPPO ១គ្រឿងពីអ្នកដំណើរ នៅតាមផ្លូវលេខ៥១ ស្ថិតនៅក្នុងឃុំសំបូរ ស្រុកសំរោងទង ខេត្ដកំពង់ស្ពឺ បានសម្រេច១ករណីផងដែរ ៕
ចែករំលែកព័តមាននេះ