រាជធានីភ្នំពេញ ៖ ជាព្រឹត្តិការណ៍ដ៏សំខាន់មួយសម្រាប់ កិច្ចសហប្រតិបត្តិការមេគង្គ ដែលនាយករដ្ឋមន្ត្រីកាណាដា ឯកឧត្ដម ចាស្ទីន ទ្រូដូ (Justin Trudeau)…
រាជធានីភ្នំពេញ ៖ ជាព្រឹត្តិការណ៍ដ៏សំខាន់មួយសម្រាប់ កិច្ចសហប្រតិបត្តិការមេគង្គ ដែលនាយករដ្ឋមន្ត្រីកាណាដា ឯកឧត្ដម ចាស្ទីន ទ្រូដូ (Justin Trudeau) បានមកបំពេញទស្សនកិច្ចផ្លូវការនៅទីស្នាក់ការកណ្តាលនៃគណៈកម្មាធិការទន្លេមេគង្គ(MRC) នៅក្នុងទីក្រុងវៀងច័ន្ទន៍ ប្រទេសឡាវ ដែលឯកឧត្ដមបានក្លាយជាប្រមុខរដ្ឋាភិបាលនៃដៃគូអភិវឌ្ឍន៍របស់ MRC ដំបូងគេបង្អស់ ដែលបានមកធ្វើទស្សនកិច្ចនៅស្ថាប័ននេះ។
យោងតាមសេចក្ដីប្រកាសព័ត៌មានរបស់គណៈកម្មាធិការទន្លេមេគង្គបានលើកឡើងថាដំណើរទស្សនកិច្ចរបស់នាយករដ្ឋមន្ត្រីកាណាដានៅថ្ងៃទី១១ ខែតុលា ឆ្នាំ២០២៤កើតឡើងស្របពេលដែលកិច្ចប្រជុំកំពូលអាស៊ាន ដែលត្រូវបានរៀបចំធ្វើជាម្ចាស់ផ្ទះដោយប្រទេសឡាវ ហើយវាបានគូសបញ្ជាក់ពីការប្តេជ្ញាចិត្តកាន់តែខ្លាំងឡើងរបស់ប្រទេសកាណាដា ចំពោះការគ្រប់គ្រង ប្រកបដោយចីរភាពនៃទន្លេមេគង្គ។ ទន្លេនេះ ជួយដល់ជីវភាពរស់នៅរបស់ប្រជាជនរាប់លាននាក់ ដែល រស់នៅក្នុងតំបន់អាស៊ីអាគ្នេយ៍។
ក្នុងសេចក្ដីប្រកាសព័ត៌មានបានឱ្យដឹងថា ក្នុងដំណើរទស្សនកិច្ចនេះ ឯកឧត្ដមនាយករដ្ឋមន្ត្រី Justin Trudeau បានជួបជាមួយអ្នកនេសាទ និងកសិករ ដែលពួកគាត់ពឹងផ្អែកលើទន្លេមេគង្គសម្រាប់ការចិញ្ចឹមជីវិត។ អមដំណើរដោយរដ្ឋមន្ត្រីក្រសួង ជំរុញការនាំចេញ ពាណិជ្ជកម្មអន្តរជាតិ និងអភិវឌ្ឍន៍សេដ្ឋកិច្ច លោកជំទាវ ម៉ារី អ៊ឹង (Mary Ng) និង នាយកប្រតិបត្តិ នៃ MRC លោកបណ្ឌិត អានុឡាក់ គិធិឃួន (Anoulak Kittikhoun)។
ក្នុងឱកាសនោះ ឯកឧត្ដមនាយករដ្ឋមន្ត្រីកាណាដា បានជជែកដោយផ្ទាល់ ជាមួយក្រុមអ្នកនេសាទ និងកសិករ ដោយស្តាប់រឿងរ៉ាវរបស់ពួកគេ ថាតើទន្លេមេគង្គបានទ្រទ្រង់ជីវិត ប្រចាំថ្ងៃរបស់ពួកគាត់យ៉ាងដូចម្តេច។ ឯកឧត្ដមនាយករដ្ឋមន្ដ្រីក៏បានឈ្វេងយល់ដោយផ្ទាល់ អំពីបញ្ហាប្រឈម ដែលពួកគេ ជួបប្រទះ ដែលបង្កឡើងដោយការប្រែប្រួលអាកាសធាតុ និងបរិស្ថាន ព្រមទាំងបញ្ហាការគ្រប់គ្រងទឹក ឆ្លងដែនផងដែរ។
ឯកឧត្ដមនាយករដ្ឋមន្ត្រី ទ្រូដូ បានកោតសរសើរចំពោះតួនាទីរបស់ MRC ក្នុងការជំរុញ កិច្ចសហប្រតិបត្តិការក្នុងចំណោមប្រទេសតាមដងមេគង្គ រួមមានកម្ពុជា ឡាវ ថៃ និងវៀតណាម ហើយការខិតខំប្រឹងប្រែង របស់ MRC ដើម្បីធានាថាសហគមន៍ដែលរស់នៅតាមដងទន្លេបន្តទទួលបានអត្ថប្រយោជន៍ពីធនធានដ៏សម្បូរ បែបរបស់ទន្លេមួយនេះ។ ឯកឧត្ដមនាយករដ្ឋមន្ត្រីបានមានប្រសាសន៍ថា៖ «កាណាដាទទួលស្គាល់ពីសារៈសំខាន់យ៉ាងខ្លាំងក្លារបស់ទន្លេមេគង្គ ដែលទន្លេនេះមិនត្រឹមតែជាប្រភពនៃការអភិវឌ្ឍប៉ុណ្ណោះទេ ប៉ុន្តែជាខ្សែជីវិត សម្រាប់មនុស្សរាប់លាននាក់»។ ឯកឧត្ដមនាយករដ្ឋមន្ដ្រីបានបន្តថា គណៈកម្មការទន្លេមេគង្គ កំពុងធ្វើការងារដ៏សំខាន់មួយ ដោយកៀងគប្រទេសនានាឱ្យរួបរួមគ្នា ដើម្បីគ្រប់គ្រង និងការពារធនធានរួមអស់ទាំងនេះ។
ឯកឧត្ដមនាយករដ្ឋមន្ដ្រីបានអះអាងថា៖ «ប្រទេស កាណាដាមានមោទនភាព ក្នុងការគាំទ្របេសកកម្មមួយនេះ ហើយយើងនឹងបន្តធ្វើការជាមួយ MRC ដើម្បីការពារទន្លេមេគង្គសម្រាប់មនុស្សជំនាន់ក្រោយ»។ សូមរម្លឹកផងដែរថា នាពេលថ្មីៗនេះ ប្រទេសកាណាដាបានប្រកាសជាផ្លូវការនូវភាពជាដៃគូអភិវឌ្ឍន៍របស់ខ្លួន ជាមួយ MRC ដោយបានបរិច្ចាគថវិកាចំនួន ២ លាន ដុល្លាកាណាដា (ប្រហែល ១.៥ លានដុល្លារ អាម៉េរិក) តាមរយៈកិច្ចការសកលប្រទេសកាដាណា ដែលជាក្រសួងរបស់រដ្ឋាភិបាលដែលទទួលបន្ទុកលើ ការគ្រប់គ្រងទំនាក់ទំនងការទូត ពាណិជ្ជកម្មអន្តរជាតិ និងជំនួយការអភិវឌ្ឍ។ មូលនិធិនេះ មានគោល បំណងគាំទ្រដល់គំនិតផ្តួចផ្តើមសំខាន់ៗរបស់ MRC រួមមានការគ្រប់គ្រងទឹកឆ្លងដែន ការតាមដានទន្លេ និង ការព្យាករណ៍ ដោយផ្តោតជាពិសេសលើការលើកកម្ពស់ភាពធន់របស់សហគមន៍ចំពោះបញ្ហាប្រឈម ទាក់ទងនឹងទឹក។
លោកបណ្ឌិត អានុឡាក់ គិធិឃួន (Anoulak Kittikhoun) នាយកប្រតិបត្តិ MRC បានគូសបញ្ជាក់ ពីការគាំទ្រដ៏សំខាន់របស់ប្រទេសកាណាដាក្នុងការជំរុញបេសកកម្មរបស់ MRC និងការចូលរួមរបស់ ប្រទេសកាដាណានៅក្នុងតំបន់។ លោកបណ្ឌិតបានថ្លែងបន្ថែមថា៖ «យើងមានកិត្តិយស ចំពោះដំណើរទស្សនកិច្ចរបស់ឯកឧត្ដមនាយករដ្ឋមន្ត្រី ទ្រូដូ ដែលបង្កើតជាជំពូកថ្មីមួយ នៅក្នុងកិច្ចសហប្រតិបត្តិការរបស់យើងជាមួយប្រទេសកាណាដា។ ការគាំទ្ររបស់ កាណាដាធ្វើឡើងក្នុងពេលដ៏សំខាន់មួយ ពិសេសស្របពេលដែលយើងបង្កើនកិច្ចខិតខំប្រឹងប្រែង ក្នុងការគ្រប់គ្រងធនធានទឹកទន្លេមេគង្គ ដើម្បីជាប្រយោជន៍ដល់ប្រជាជនទាំងអស់នៅក្នុងតំបន់ ក៏ដូចជារបស់ រដ្ឋាភិបាលរបស់ពួកគេ។
ចែករំលែកព័តមាននេះ