ទីក្រុងវៀងចន្ទន៍៖ អគ្គលេខាធិការអង្គការសហប្រជាជាតិ លោកហ្គូតេរ៉េ ថ្លែងនៅក្នុងសន្និសីទសារព័ត៌មានថានៅពេលដែលជម្លោះប្រដាប់អាវុធផ្ទុះឡើងកាន់តែខ្លាំងនៅមជ្ឈិមបូព៌ា វាគឺជាការគំរាមកំហែងចំពោះសន្តិសុខជាសាកល។ ដូច្នេះ លោកយល់ថាគេត្រូវតែធ្វើអ្វីៗគ្រប់យ៉ាងដើម្បីទប់ស្កាត់មិនឱ្យសង្គ្រាមផ្ទុះឡើងពេញទំហឹងទីនោះទេទោះបីដោយវិធីណាក៏ដោយ។
លោកហ្គូតេរ៉េថ្លែងដូច្នេះនៅពេលចូលរួមកិច្ចប្រជុំអាស៊ាននៅទីក្រុងវៀងចន្ទន៍ ប្រទេសឡាវ ហើយឆ្លៀតនិយាយជាមួយអ្នកកាសែតនៅខាងក្រៅកិច្ចប្រជុំ។ លោកថ្កោលទោសទង្វើរបស់អ៊ីស្រាអែលដែលបន្តវាយប្រហារមូលដ្ឋានរបស់ក្រុមហេសបូឡានៅលីបង់ ប៉ុន្តែក៏បានធ្វើឱ្យបុគ្គលិករបស់អង្គការសហប្រជាជាតិរងរបួសជាច្រើននាក់ផងដែរ។ លោកយល់ថាកងកម្លាំងថែរក្សាសន្តិភាព (របស់អង្គការសហប្រជាជាតិដែលឈរជើងនៅលីបង់) គួរណាស់ទទួលបានការការពារយ៉ាងពេញលេញ។
ទាហានអ៊ីស្រាអែលបានបាញ់កាំភ្លើងទៅលើប៉ុស្តិ៍យាមរបស់ទាហានអង្គការសហប្រជាជាតិប្រចាំការនៅលីបង់ខាងត្បូងកាលពីថ្ងៃសុក្របណ្ដាលឱ្យរបួស២នាក់។ នេះបើតាមការបង្ហើបឱ្យដឹងពីបុគ្គលិកអង្គការសហប្រជាជាតិ។ វាជាការប្រទាំងប្រទើសគ្នាឈានដល់ថ្ងៃទី៣ហើយដែលប្រព្រឹត្តឡើងដោយទាហានអ៊ីស្រាអែលទៅលើទាហានអង្គការសហប្រជាជាតិ។
នៅប្រទេសអ៊ីស្រាអែលភាគខាងជើង ជនជាតិថៃម្នាក់ដែលជាពលករចំណាកស្រុកបានស្លាប់ភ្លាមៗនៅនឹងកន្លែងកើតហេតុនៅពេលក្រុមហេសបូឡាបាញ់មីស៊ីលប្រឆាំងរថក្រោះទៅលើកសិដ្ឋានដែលគាត់កំពុងធ្វើការ។ នេះបើយោងតាមសេវាកម្មផ្នែករថយន្តគិលានសង្គ្រោះ។ កងទ័ពអាកាសអ៊ីស្រាអែលវាយបកវិញ និងបាញ់ស្លាប់មេបញ្ជាការរបស់ក្រុមហេសបូឡាម្នាក់ដែលជាអ្នកបញ្ជាកងទ័ពបាញ់មីស៊ីលប្រឆាំងរថក្រោះចូលទៅតំបន់នោះ។ នេះបើតាមការអះអាងរបស់យោធាអ៊ីស្រាអែល។
រហូតមកដល់ពេលនេះ ក្រុមហេសបូឡាមិនទាន់បានធ្វើអត្ថាធិប្បាយអ្វីទាំងអស់ដើម្បីឆ្លើយតបទៅនឹងការអះអាងនោះ។ ប្រភពពីខាងអង្គការសហប្រជាជាតិប្រាប់ថាកងរក្សាសន្តិភាពក្រោមឆ័ត្ររបស់ UN (ហៅកាត់ថា UNIFIL) ដែលប៉ុស្តិ៍របស់ខ្លួនរងការវាយប្រហារពីសំណាក់ទាហានអ៊ីស្រាអែលកាលពីថ្ងៃសុក្រនោះស្ថិតនៅលើទីតាំងបញ្ជាការដ្ឋានធំរបស់ UN តែម្ដង។
កាលពីថ្ងៃព្រហស្បតិ៍ UNIFIL ថ្លែងថាទាហានរបស់ខ្លួន២នាក់រងរបួសនៅពេលរថក្រោះអ៊ីស្រាអែលបាញ់តម្រង់ទៅរកប៉ុស្តិ៍របស់ពួកគេ ធ្វើឱ្យបង្គោលប៉ុស្តិ៍ដួលមកដី និងធ្វើឱ្យទាហាន UN ដែលប្រចាំការនៅលើនោះរងរបួស។ កាលពីថ្ងៃសុក្រដដែល ទាហានអ៊ីស្រាអែលក៏បានជ្រៀតចូលតំបន់ហាមឃាត់របស់ UNIFIL ដែលពួកគេធ្លាប់បាញ់គ្រាប់កាំភ្លើងចូលមួយសាហើយ។ ទោះជាយ៉ាងណាក្ដី រាល់ការអះអាងនេះត្រូវអ៊ីស្រាអែលរក្សាទុកតែក្នុងចិត្តដោយមិនព្រមធ្វើអត្ថាធិប្បាយតបតអ្វីទាំងអស់៕
ចែករំលែកព័តមាននេះ