ទីក្រុងម៉ាយអាមី៖ អាជ្ញាធរនៅរដ្ឋផ្លរីដា ប្រទេសអាមេរិក កំពុងធ្វើការយ៉ាងដុតដៃដុតជើងដើម្បីត្រៀមទប់ទល់នឹងការបោកបក់ដ៏ខ្លាំងក្លានៃខ្យល់ព្យុះកំបុតត្បូងឈ្មោះមីលតុន (Milton)។ មានន័យថាផ្លរីដាដែលទើបតែរួចផុតពីខ្យល់ព្យុះមុននេះឈ្មោះហេលេន (Helene) ត្រឹមតែ២អាទិត្យប៉ុណ្ណោះ និងមិនទាន់បោសសម្អាតសំរាម និងកម្ទេចកម្ទីបានស្អាតល្អឡើងវិញនៅឡើយផង…
ទីក្រុងម៉ាយអាមី៖ អាជ្ញាធរនៅរដ្ឋផ្លរីដា ប្រទេសអាមេរិក កំពុងធ្វើការយ៉ាងដុតដៃដុតជើងដើម្បីត្រៀមទប់ទល់នឹងការបោកបក់ដ៏ខ្លាំងក្លានៃខ្យល់ព្យុះកំបុតត្បូងឈ្មោះមីលតុន (Milton)។ មានន័យថាផ្លរីដាដែលទើបតែរួចផុតពីខ្យល់ព្យុះមុននេះឈ្មោះហេលេន (Helene) ត្រឹមតែ២អាទិត្យប៉ុណ្ណោះ និងមិនទាន់បោសសម្អាតសំរាម និងកម្ទេចកម្ទីបានស្អាតល្អឡើងវិញនៅឡើយផង ឥឡូវនេះថែមខ្យល់ព្យុះថ្មីមួយទៀត។ នៅតាមផ្លូវហាយវេត្រូវកកស្ទះដោយសារមនុស្សសម្រុកធ្វើដំណើរចាកចេញទៅកាន់ទីកន្លែងសុវត្ថិភាព។
ការិយាល័យឧតុនិយមព្យាករថាខ្យល់ព្យុះមីលតុនអាចនឹងបក់ទៅដល់តំបន់មាត់សមុទ្ររដ្ឋផ្លរីដានៅថ្ងៃពុធសប្ដាហ៍នេះ ហើយនឹងពាំនាំទៅជាមួយនូវភ្លៀងលាយខ្យល់កន្ត្រាក់ធ្លាក់យ៉ាងជោគជាំ។ តំបន់ដែលខ្យល់ព្យុះវាយប្រហារគឺឆកសមុទ្រតំាប៉ា (Tampa Bay) ដែលជាកន្លែងពុំធ្លាប់កើតមានខ្យល់ព្យុះទេអស់ជាងមួយទសវត្សមកហើយ។ ក្រុមអ្នកវិទ្យាសាស្ត្រព្យាករថាខ្យល់ព្យុះនេះមុនពេលបក់ទៅដល់តំបន់ដីគោក វានឹងថមថាយកម្លាំងបន្តិចវិញ។ ប៉ុន្តែទោះជាបែបនេះក្ដី ល្បឿនខ្យល់បក់នៅតែមិនអន់ពេកពេកក្នុងឋានៈជាខ្យល់ព្យុះកម្រិតហារីខេន (hurricane) ឬខ្យល់ព្យុះនៅមហាសមុទ្រអាត្លង់ទិច។
អភិបាលរដ្ឋផ្លរីដាថ្លែងថាគេត្រូវតែខិតខំបោសសម្អាតសំរាម និងកម្ទេចកម្ទីដែលបន្សល់ទុកដោយខ្យល់ព្យុះហេលេនឱ្យបានរួចរាល់ជាមុនសិន មុនពេលការមកដល់នៃខ្យល់ព្យុះមីលតុន។ ធ្វើបែបនេះដើម្បីកុំឱ្យអ្នកដែលត្រូវរត់លូនដោយសារមីលតុនក្លាយជាអ្នករងគ្រោះមុតដៃមុតជើងដោយសារគំនរបាក់បែកបន្សល់ទុកពីខ្យល់ព្យុះកាលពីវគ្គមុន។ នៅក្នុងការបោសសម្អាតនេះ គេប្រើប្រាស់រថយន្តជាងបីរយគ្រឿង។
អាជ្ញាធរបានចេញបញ្ជាឱ្យជម្លៀសមនុស្ស ខណៈដែលក្រុមអ្នកឧតុនិយមព្យាករថារលកសមុទ្រអាចនឹងមានកម្ពស់ចាប់ពី ២,៤ម៉ែត្រទៅ៣,៦ម៉ែត្រនៅឆកសមុទ្រតាំប៉ា។ នេះជាកម្ពស់ទឹករលកដ៏ខ្ពស់មិនធ្លាប់មាននៅក្នុងតំបន់។ ខ្យល់ព្យុះនេះអាចនឹងបង្កជាគ្រោះទឹកជំនន់លិចប៉ាចហាចយ៉ាងល្ហល្ហេវ។ គេព្យាករថានៅផ្លរីដា និងតំបន់ម្ដុំៗនោះដែលខ្យល់ព្យុះឆ្លងកាត់អាចនឹងទទួលបានរបបទឹកភ្លៀងចាប់ពី១៣ទៅ២៥សង់ទីម៉ែត្រ។ កន្លែងខ្លះអាចនឹងទទួលបានរហូតដល់៣៨សង់ទីម៉ែត្រ៕
ចែករំលែកព័តមាននេះ