ទីក្រុងបាងកក៖ ថ្មីៗនេះ តុលាការព្រហ្មទណ្ឌនៅប្រទេសថៃចេញសេចក្ដីបង្គាប់ឱ្យអាជ្ញាធរចាប់បញ្ជូនជនជាតិម៉ុងតាញ៉ាម្នាក់ឈ្មោះអ៊ីក្វៀនផ្ដាប (Y Quynh Pdap) ត្រឡប់ទៅប្រទេសវៀតណាមវិញដើម្បីកាត់ទោសពីបទភេរវកម្ម។ ចៅក្រមថៃអះអាងថាខ្លួនមានភស្តុតាងគ្រប់គ្រាន់ដើម្បីអនុញ្ញាតឱ្យធ្វើបត្យាប័នសកម្មជនរូបនេះតាមសំណើរបស់រដ្ឋាភិបាលវៀតណាម។
ជាបន្តទៅទៀតនេះជាសមត្ថកិច្ចរបស់រដ្ឋាភិបាលថៃដែលជាអ្នកសម្រេចចិត្តនៅវគ្គផ្ដាច់ព្រ័ត្រថាតើត្រូវចាប់បញ្ជូនគាត់ទៅវៀតណាមវិញ ឬយ៉ាងណា។ ឥឡូវនេះ គាត់កំពុងតែដេកភ័យ។ គាត់ថាបើអាជ្ញាធរថៃពិតជាចាប់បញ្ជូនគាត់ទៅវៀតណាមវិញមែន គាត់មុខជាត្រូវសមត្ថកិច្ចវៀតណាមវាយធ្វើទារុណកម្មទ្រមខ្លួនជាមិនខានទេ។ ស្រួលមិនស្រួលអាចនឹងស្លាប់ចោលឆ្អឹងនៅក្នុងមន្ទីរឃុំឃាំងក៏អាចថាបាន។
ចៅក្រមប្រកាសថាលោកទុកលទ្ធភាពនេះជូនទៅរដ្ឋាភិបាលថៃដើម្បីសម្រេចចិត្តជាលើកចុងក្រោយថាតើត្រូវធ្វើបត្យាប័នបុរសរូបនេះ ឬយ៉ាងណានៅក្នុងរង្វង់៩០ថ្ងៃខាងមុខនេះ។ បុរសឈ្មោះផ្ដាបកំពុងជាប់ឃុំនៅក្នុងពន្ធនាគារប្រទេសថៃ។ គាត់មានពេល៣០ថ្ងៃដើម្បីប្ដឹងទាស់នឹងសេចក្ដីសម្រេចរបស់ចៅក្រម។ តុលាការថ្លែងថាបើនៅក្នុងរង្វង់៩០ថ្ងៃទៀត រដ្ឋាភិបាលមិនចាប់បញ្ជូនគាត់ទៅឱ្យវៀតណាមវិញទេ មានន័យថាអាជ្ញាធរថៃត្រូវតែដោះលែងគាត់ឱ្យមានសេរីភាពឡើងវិញ។
បុរសរូបនេះបានរស់នៅប្រទេសថៃចាប់តាំងពីឆ្នាំ២០១៨នៅក្នុងឋានៈជាជនភៀសខ្លួននយោបាយដែលផ្ដល់សិទ្ធិដោយអង្គការយូអឹនអេចស៊ីអ័រ (UNHCR)។ ក្រោយមកនៅខែមិថុនា ឆ្នាំ២០២៤ គាត់ត្រូវសមត្ថកិច្ចថៃចាប់ខ្លួនបន្ទាប់ពីធ្វើសម្ភាសជាមួយអាជ្ញាធរកាណាដានៅស្ថានទូតកាណាដាប្រចាំទីក្រុងបាងកក។ បទសម្ភាសនោះពាក់ព័ន្ធនឹងការស្នើសុំសិទ្ធិជ្រកកោនបន្តនៅប្រទេសកាណាដាក្នុងឋានៈជាជនភៀសខ្លួន។
រដ្ឋាភិបាលវៀតណាមបានដាក់ពាក្យប្ដឹងគាត់ពីបទសង្ស័យរួមគំនិតប្រព្រឹត្តអំពើភេរវកម្ម។ ដូចដែលគេបានដឹងឮគ្រប់ៗគ្នាហើយថាព្រឹត្តិការណ៍បាញ់ប្រហារពីសំណាក់ក្រុមប្រដាប់អាវុធរបស់ម៉ុងតាញ៉ាទៅលើសាលាឃុំនៅខេត្តដាក់ឡាក់កាលពីខែមិថុនា ឆ្នាំ២០២៣។ គេមិនទាន់ដឹងច្បាស់ថាតើគាត់បានចូលរួមធ្វើសកម្មភាពនៅក្នុងអំពើក្បត់នោះដែឬទេ។ ប៉ុន្តែច្បាស់ហើយថាគាត់គ្មានវត្តមាននៅក្នុងចំណោមក្រុមបះបោរប្រដាប់អាវុធម៉ុងតាញ៉ាទាំងនោះទេ។
បុរសឈ្មោះផ្ដាបម្នាក់នេះជាជនអេដឺ (Ede) ដែលស្ថិតនៅក្នុងអម្បូរជនជាតិភាគតិចសរុប៣០ក្រុមរស់នៅប្រទេសវៀតណាមភាគកណ្ដាល។ ទីនោះជាតំបន់ខ្ពង់រាប និងសម្បូរព្រៃភ្នំក្រាស់ៗដែលគេចាត់ទុកជនជាតិភាគតិចទាំង៣០ក្រុមនេះថាជាជនជាតិម៉ុងតាញ៉ា ជាភាសាបារាំងមានន័យថា «អ្នករស់នៅតំបន់ព្រៃភ្នំ»។ ក្រុមសិទ្ធិមនុស្សបានស្នើសុំទៅរដ្ឋាភិបាលថៃសូមកុំចាប់បញ្ជូនបុរសឈ្មោះផ្ដាបទៅវៀតណាមធ្វើអ្វី។ បើមិនដូច្នេះទេជោគវាសនារបស់គាត់មិនដឹងថានឹងទៅជាយ៉ាងណាទេ៕
ចែករំលែកព័តមាននេះ