មិនមែនជាឪពុក ហើយក៏មិនមែនជាម្តាយ តែក្មេងប្រុសម្នាក់នេះ ទោះវ័យនៅក្មេងខ្ចី ត្រូវរងនូវអម្រែកដ៏ធ្ងន់ដូចទូលផែនដីទាំងមូល ។ ក្មេងប្រុសម្នាក់នេះទើបតែមានវ័យ១៣ឆ្នាំ ជាវ័យដែលសមតែបានគេងឆ្អែត និងទទួលបានការថ្នាក់ថ្នមពីឪពុកម្តាយ តែប្អូនត្រូវងើបម៉ោង…
មិនមែនជាឪពុក ហើយក៏មិនមែនជាម្តាយ តែក្មេងប្រុសម្នាក់នេះ ទោះវ័យនៅក្មេងខ្ចី ត្រូវរងនូវអម្រែកដ៏ធ្ងន់ដូចទូលផែនដីទាំងមូល ។ ក្មេងប្រុសម្នាក់នេះទើបតែមានវ័យ១៣ឆ្នាំ ជាវ័យដែលសមតែបានគេងឆ្អែត និងទទួលបានការថ្នាក់ថ្នមពីឪពុកម្តាយ តែប្អូនត្រូវងើបម៉ោង ៣ ភ្លឺ ដើម្បីទៅស៊ីឈ្នួលគេយកលុយមកចិញ្ចឹមប្អូនៗ ។
នេះគេហៅថា អម្រែកជីវិតពិតជាធ្ងន់ណាស់ សម្រាប់ក្មេងប្រុសម្នាក់នេះ រហូតធ្វើអោយមហាជនសឹងស្រក់ទឹកភ្នែកដោយមិនដឹងខ្លួន ។ ក្រោយពីម្តាយឪពុកបែកបាក់គ្នា ក្មេងប្រុសវ័យ១៣ឆ្នាំ ដែលរស់នៅរាជធានីភ្នំពេញរូបនេះ ត្រូវដើរតួនាទីជាម្តាយផង ឪពុកផង និងតួនាទីជាបងប្រុសដ៏កក់ក្តៅផង ត្រូវរ៉ាប់រងមួយគ្រួសារត្រូវស៊ីឈ្នួលបេះផ្កាម្ល៉េះ តាំងពីម៉ោង ៣ភ្លឺ ដែលជាម៉ោងមនុស្សច្រើនលើសលប់កំពុងលង់ក្នុងដំណេក តែប្អូនប្រុសនេះត្រូវជម្នះភាពងងុយ ដើម្បីរកលុយចិញ្ចឹមជីវិត ។
ជាការពិត ក្មេងប្រុសរូបនេះមានឈ្មោះ ថា មុត ផាណុប ។ ឆ្នាំនេះ ផាណុប មានអាយុទើបតែ ១៣ឆ្នាំប៉ុណ្ណោះ តែប្អូនត្រូវទៅធ្វើការចិញ្ចឹមប្អូន ដោយការដើររើសអេតចាយ បេះផ្កាម្លិះតាំងពីម៉ោង ៣ទាបភ្លឺ ដើម្បីបានលុយទៅរៀន និងមើលយាយឈឺនៅផ្ទះ ។
តោះមកស្តាប់ពីដំណើរជីវិតសែនកម្សត់របស់ប្អូនប្រុស មុត ផាណុប ដែលជាក្មេងម្នាក់តស៊ូ និងព្យយាមសិក្សារៀនសូត្រ និងរកប្រាក់កាក់ដើម្បីចិញ្ចឹមជីវិត ។
តាមរយៈបទសម្ភាសន៍ជាមួយសារព័ត៌មានកោះសន្តិភាព ប្អូន មុត ផាណុប និយាយថា ក្រោយពេលម្តាយឪពុកប្អូនបានបែកបាក់គ្នា ប្អូនរស់នៅជាមួយយាយ និងបងប្អូនចំនួន២ទៀត ។ ស្ថិតក្នុងវ័យ១៣ឆ្នាំ ផាណុប ថ្លែងថា ខ្លួនប្អូនត្រូវក្រោកម៉ោង៣ភ្លឺ ដើម្បីបេះផ្កាម្លិះ យកទៅលក់ នៅតាមភ្លើងស្កុបតាមដងវិថីនានា ដើម្បីបានប្រាក់យកមកផ្គត់ផ្គង់គ្រួសារ លុះដល់ម៉ោង១២ថ្ងៃត្រង់ ទើបត្រឡប់មកផ្ទះសម្បែងវិញ ដើម្បីងូតទឹកហូបបាយធ្វើដំណើរទៅសាលាសិល្បៈហ្វូនណន ។
មានសំបុរស្រអែមស្រស់ ទឹកមុខស្លូតបូត កុមារា មុត ផាណុប បង្ហើបថា ជីវភាពប្អូនលំបាកខ្លាំង ខណៈពេលចំណូលដែលប្អូនរកមកបានពីការបេះផ្កាម្លិះ គឺចន្លោះត្រឹម១ម៉ឺន៥ពាន់ ទៅ២ម៉ឺនរៀលក្នុងមួយថ្ងៃ ។ សម្រាប់ចំណាយលើការហូបចុកប្រចាំថ្ងៃ គឺអស់ប្រហែល ១៥០០០រៀល ជាមួយបងប្អូន៣នាក់ និងយាយម្នាក់ដែលមានព្រះជន្ម៧០ឆ្នាំ ដែលលោកយាយក៏កំពុងមានជម្ងឺប្រចាំកាយ ។ ប្អូនផាណុបថា កាលពីកន្លងទៅយាយប្អូនមិនទាន់ឈឺ គឺបានយាយនេះហើយដែលតែងទៅលាងចានអោយគេ តាមរោងការរោងបុណ្យ ដើម្បីបានប្រាក់យកមកចិញ្ចឹមចៅនោះ ។
ប្អូនប្រុស ផាណុប ដែលមានកន្លែងកំណើតនៅភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញបន្តទៀតថា ក្រៅពីបេះផ្កាពេលខ្លះទៀត ប្អូនក៏រើសអេតចាយ សំបកកំប៉ុងដប នៅកន្លែងរោងបុណ្យការ ឬតាមផ្លូវ ដើម្បីដោះទាល់មួយគ្រាៗ ។
បើងាកមកបទសម្ភាសន៍ជាមួយលោកគ្រូ ខេមរៈ ប៊ុនណា ដែលជាលោកគ្រូរបស់ប្អូនផ្ទាល់នៅ សាលាសិល្បៈហ្វូណន លោកថា ក្មេងប្រុសរូបនេះរៀងកម្សត់ជាងគេ នៅសាលារបស់លោកផ្ទាល់ ដោយប្អូនត្រូវងើបតាំងព្រឹកទៅបេះផ្កា ដើម្បីចិញ្ចឹមគ្រួសារ ។
ជាញឹកញាប់ លោកគ្រូ ខេមរៈ ប៊ុនណា តែងអប់រំទូន្មានប្អូនថា « សព្វថ្ងៃលោកខំធ្វើស្ពាន ធ្វើផ្លូវអោយប្អូនដើម្បីប្អូនមានចំណេះ » ដោយត្រង់ចំណុចនេះលោកចង់សំដៅថា លោកបង្រៀនមិនគិតប្រាក់ ផ្តល់ទាំងចំណេះដឹង និងអោយប្អូនប្រឹងសង្វាតការសិក្សា ដើម្បីមានចំណេះធ្វើការងាយអោយគេ ក្លាយជាមនុស្សល្អក្នុងសង្គមជាតិ ។
បើងាកមកការសិក្សាវិញ លោកគ្រូខេមរៈ ប៊ុនណា ថាការសិក្សារបស់ប្អូនមធ្យម ដោយមួយរយៈនេះលោកតែងដាស់តឿនដល់ប្អូនអោយសង្វាតការសិក្សា ព្រោះមានតែចំណេះដឹងនេះហើយដែលអាចអោយប្អូនមានអនាគត និងល្អប្រសើរនោះ ៕ ដោយ៖លីហួ គីមឆាយ
ចែករំលែកព័តមាននេះ