ខេត្តបាត់ដំបង៖ បុរសម្នាក់ត្រូវសមត្ថកិច្ចឃាត់ខ្លួនភ្លាមៗ ទាំងស្រវឹងធ្លាក់ភ្នែក ក្រោយពីជននេះចាក់សម្លាប់ប្រពន្ធ និង ចាក់ម្ដាយក្មេកឲ្យរងរបួសធ្ងន់ ដោយសារតែខឹងប្រពន្ធ និង ម្ដាយក្មេកស្ដីបន្ទោសរឿងដើរផឹកស៊ីមិនធ្វើការងារ។ ហេតុការណ៏នេះ…
ខេត្តបាត់ដំបង៖ បុរសម្នាក់ត្រូវសមត្ថកិច្ចឃាត់ខ្លួនភ្លាមៗ ទាំងស្រវឹងធ្លាក់ភ្នែក ក្រោយពីជននេះចាក់សម្លាប់ប្រពន្ធ និង ចាក់ម្ដាយក្មេកឲ្យរងរបួសធ្ងន់ ដោយសារតែខឹងប្រពន្ធ និង ម្ដាយក្មេកស្ដីបន្ទោសរឿងដើរផឹកស៊ីមិនធ្វើការងារ។
ហេតុការណ៏នេះ បានកើតឡើង កាលពីវេលាម៉ោង៥និង៣០នាទីល្ងាចថ្ងៃទី ២៨ កញ្ញា នៅភូមិស្ទឹងថ្មី ឃុំតាលាស់ ស្រុកមោងឬស្សី។
យោងតាមរបាយការណ៏សមត្ថកិច្ច បានឲ្យដឹងថា ជនសង្ស័យឈ្មោះ នាង សេរីរ័ត្ន អាយុ៣៤ឆ្នាំ (ប្ដី) រីឯប្រពន្ធដែលជននេះចាក់សម្លាប់ឈ្មោះ រៀប រី អាយុ៣០ឆ្នាំ (ប្រពន្ធ) និង ម្ដាយក្មេងរបួសធ្ងន់ឈ្មោះ ទូច ឡង់ អាយុ៥៦ឆ្នាំ រស់នៅក្នុងផ្ទះជាមួយគ្នា នៅភូមិ ឃុំកើតហេតុ។
របាយការណ៏បានបញ្ជាក់ថា ក្រោយប្រើអំពើហឹង្សាក្នុងគ្រួសាររហូតមានស្លាប់ មានរបួសយ៉ាងឃោឃៅ ជនសង្ស័យត្រូវបានកម្លាំងអធិការស្រុកមោងឬស្សី ចុះអន្តរាគមន៏ឃាត់ខ្លួនភ្លាមៗនៅកន្លែងកើតហេតុ។
នៅក្នុងហេតុការណ៏នេះ បើតាមសមត្ថកិច្ច បានឲ្យដឹងថា ជនដៃដល់បានប្រើប្រាសកាំបិតចុងស្រូច ចាក់ប្រពន្ធពី៏ក្រោយចំនួន០៣កាំបិតបណ្ដាលឲ្យរបួសធ្ងន់ តែបានស្លាប់ពេលបញ្ជូនដល់មន្ទីរពេទ្យ។ ដោយឡែកជនរងគ្រោះឈ្មោះ ទូច ឡង់ (ម្ដាយក្មេក) ត្រូវកូនប្រសារចាក់ត្រូវចំនួន០៣កាំបិតដែរ ចំដើមទ្រូង០២កាំបិត និង ចំស្លាបប្រជៀវខាងឆ្វេង០១កាំបិតបណ្ដាលឲ្យរងរបួសធ្ងន់។
មូលហេតុ ដែលនាំឲ្យមានអំពើហឹង្សាដ៏ឃោឃៅនេះកើតឡើង បើតាមសមត្ថកិច្ច បាននិយាយថា ដំបូងជនដៃដល់ឈ្មោះ នាង សេរីរ័ត្ន បានទៅផឹកស៊ីជាមួយបក្ខពួក នៅភូមិស្ទឹងចក ឃុំព្រៃតូច។ ពេលកំពុងផឹកស៊ី ជននេះបានទូរស័ព្ទទៅសួរនាំប្រពន្ធ តែដោយសារជននេះស្រវឹង និយាយតបគ្នាបានបន្តិចប្រពន្ធក៏បិទទូរស័ព្ទ ហើយទូរស័ព្ទទៅទៀតក៏ប្រពន្ធមិនលើក។
ត្រង់ចំណុចនេះ ទំនងជាលោកប្ដីខឹងប្រពន្ធខ្លាំង ហើយចុចបិទទូរស័ព្ទ ក៏ជិះម៉ូតូទៅផ្ទះ។ ពេលជិះទៅដល់ផ្ទះ មិនទាន់ចុះពីលើម៉ូតូផង ស្រាប់តែប្រពន្ធនិងម្ដាយក្មេង ដែលកំពុងដេកលើអង្រឹងក្រោមផ្ទះ ចាប់ផ្ដើមព្រលះ១០០ៗ ទៅកាន់ជនដៃដល់គ្មានសំចៃមាត់។
សមត្ថកិច្ចបានបន្តថា ពេលនោះប្រពន្ធនិងម្ដាយក្មេក បានរករឿងតិះដៀលជេរប្រមាថកប់ៗមាត់ទៅលើជនដៃដល់ ពីរឿង«ដើរផឹកស៊ី»។ ដោយសារតែខឹងខ្លាំងពេក នៅពេលត្រូវប្រពន្ធនិងម្ដាយក្មេកជេរប្រមាថបែបនេះ ជនសង្ស័យខឹងក៏ស្ទុះទៅទាញកាំបិតចាក់ទៅលើប្រពន្ធ និង ម្ដាយក្មេកដោយគ្មានញញើតដៃឡើយ។
ស្ត្រីជាប្រពន្ធត្រូវរបួសចំនួន០៣កន្លែង តែពេលបញ្ជូនដល់មន្ទីរពេទ្យជនរងគ្រោះបានស្លាប់ រីឯម្ដាយក្មេករងរបួសធ្ងន់ ដោយសារកូនប្រសារចាក់ត្រូវចនួន០៣កាំបិតដែរ។ ប៉ុន្តែយ៉ាងណា កម្លាំងអធិការស្រុកមោងឬស្សី បានចុះអន្តរាគមន៏ភ្លាមៗ ឃាត់ខ្លួនជនដៃដល់។ ពេលនេះមន្ត្រីជំនាញ កំពុងសួរនាំជនសង្ស័យ ដើម្បីកសាងសំណុំរឿងបញ្ជូនទៅតុលាការហើយ៕
ចែករំលែកព័តមាននេះ