សហរដ្ឋអាមេរិក ៖ El Cosmico គឺជាសណ្ឋាគារ និងកន្លែងបោះតង់ ដែលកំពុងដំណើរការដ៏ពេញនិយមសម្រាប់អ្នកចូលចិត្តការផ្សងព្រេង ដែលមានទីតាំងនៅភាគខាងលិចទីក្រុងម៉ាហ្វា (Marfa) រដ្ឋតិចសាស់…
សហរដ្ឋអាមេរិក ៖ El Cosmico គឺជាសណ្ឋាគារ និងកន្លែងបោះតង់ ដែលកំពុងដំណើរការដ៏ពេញនិយមសម្រាប់អ្នកចូលចិត្តការផ្សងព្រេង ដែលមានទីតាំងនៅភាគខាងលិចទីក្រុងម៉ាហ្វា (Marfa) រដ្ឋតិចសាស់ (Texas) សហរដ្ឋអាមេរិក។ ប៉ុន្តែទោះយ៉ាងនេះក្តី El Cosmico កំពុងបន្តសាងសង់បន្ទប់ស្នាក់នៅថ្មី ៤៣បន្ទប់បន្ថែមទៀត រួមនឹងផ្ទះលំហែ ១៨ខ្នងផ្សេងទៀត ដែលបង្កើតឡើងដោយម៉ាស៊ីនបោះពុម្ព 3D ឬ 3D Printer នៅលើផ្ទៃដីចំនួន៤០ហិចតា។
ប្រភពពីទីភ្នាក់ងារសារព័ត៌មាន Reuters កាលពីថ្ងៃទី២៦ ខែកញ្ញា ឆ្នាំ២០២៤ បានឱ្យដឹងថា លោក លីស ឡាំប៊ឺត (Liz Lambert) ម្ចាស់សណ្ឋាគារខាងលើ រួមនឹងដៃគូរកស៊ីរបស់លោក ដែលនៅពីក្រោយគម្រោងដ៏អស្ចារ្យមួយនេះបានថ្លែងថា El Cosmico គឺជាសណ្ឋាគារបង្កើតឡើងដោយម៉ាស៊ីនបោះពុម្ព 3D ដំបូងបង្អស់លើពិភពលោក ដោយប្រើម៉ាស៊ីនរបស់ក្រុមហ៊ុន ICON និង Architects Bjarke Ingels Group ដែលមានមូលដ្ឋាននៅទីក្រុងអូស្ទីន (Austin) រដ្ឋតិចសាស់។
លោកបន្តថា «បច្ចេកវិទ្យាដ៏ទំនើបនេះ អនុញ្ញាតឱ្យមានការច្នៃប្រឌិតមិនធ្លាប់មានពីមុន។ បន្ទប់ស្នាក់នៅភាគច្រើនជាធម្មតាត្រូវសាងសង់ឡើងដោយជញ្ជាំងបិទជិត ហើយត្រូវចំណាយពេលយូរសម្រាប់ការសាងសង់។ ប៉ុន្តែការបង្កើតឡើងដោយម៉ាស៊ីនបោះពុម្ព 3D ខ្ញុំនឹកមិនដល់ថាអាចសាងសង់បន្ទប់ស្នាក់នៅ ដោយជួបឧបសគ្គតូចតាចបំផុត និងដោយរលូនបែបនេះទេ។ វាគឺជាវិធីដ៏ឆ្កួតមួយក្នុងការសាងសង់»។
លោកបានបន្ថែមថា តាមរយៈការប្រើម៉ាស៊ីនបោះពុម្ព 3D បន្ទប់ស្នាក់នៅអាចរួមបញ្ចូលលក្ខណៈស្ថាបត្យកម្មដ៏អស្ចារ្យ និងគ្រប់ទម្រង់ ដែលជាធម្មតាមានតម្លៃថ្លៃខ្លាំងណាស់ សម្រាប់ការចំណាយលើការសាងសង់ ពិសេសការចម្លងទ្រង់ទ្រាយតាមរចនាបថសំណង់បុរាណ។ ការពង្រីកបន្ទប់របស់សណ្ឋាគារ និងកន្លែងបោះតង់ El Cosmico គ្រោងបញ្ចប់នៅឆ្នាំ ២០២៦។ ហើយបន្ទប់ស្នាក់នឹងមានតម្លៃចន្លោះពី ២០០ ទៅ ៤៥០ដុល្លារក្នុង១យប់។
នៅក្នុងដំណើរការសាងសង់ បន្ទាប់ពីចេញម៉ូដក្នុងប្រព័ន្ធកុំព្យូទ័ររួចហើយ ការបោះពុម្ព 3D នឹងធ្វើឡើងដោយត្រូវការអ្នកបច្ចេកទេសតែម្នាក់ប៉ុណ្ណោះ ដើម្បីពិនិត្យម៉ាស៊ីនថា តើបោះពុម្ពតាមម៉ូដដែលអតិថិជនចង់បានដែរឬទេ0x017d7 នៅពេលដែលដៃមនុស្សយន្ត និងក្បាលម៉ាស៊ីនបោះពុម្ពកំពុងដំណើរការ។ ទឹកថ្នាំនៃម៉ាស៊ីនបោះពុម្ព 3D គឺជាសម្ភារៈដ៏សំខាន់ដោយផ្សារភ្ជាប់ជាមូលដ្ឋានលើស៊ីម៉ងត៍ដ៏ពិសេសហៅថា Lavacrete គឺជាល្បាយដែលបានបង្កើតឡើងសម្រាប់ភាពរឹងមាំ មាត្រដ្ឋានតម្លៃសមរម្យ និងលទ្ធភាពបោះពុម្ព។
លោក ជេសុន បាឡាដ (Jason Ballard) ស្ថាបនិក និងនាយកប្រតិបត្តិក្រុមហ៊ុន ICON បានថ្លែងថា បុគ្គលិកជំនាញបានធ្វើការកែសម្រួល និងលាយសារធាតុសម្រាប់ការបោះពុម្ពដោយផ្អែកតាមលក្ខខណ្ឌអាកាសធាតុជាក់ស្តែង។ វេទមន្តកើតឡើងនៅក្នុងសារធាតុផ្សំដែលអនុញ្ញាតឱ្យយើងបន្តការបោះពុម្ព ដោយលោកបន្ថែមថា សំណើម សីតុណ្ហភាព និងចំណាំងផ្លាតនៃពន្លឺព្រះអាទិត្យ គឺប៉ះពាល់ដល់ដំណើរការបោះពុម្ព និងសូម្បីតែការចាក់ពណ៌ចុងក្រោយ។
លោក មីឡាដ បាសលី (Milad Bazli) សាស្ត្រាចារ្យវិទ្យាសាស្ត្រ និងបច្ចេកវិទ្យាសាកលវិទ្យាល័យ Charles Darwin ប្រទេសអូស្ត្រាលី បានថ្លែងថា «នៅក្នុងរយៈពេលវែងទៅមុខទៀត សំណង់បោះពុម្ព 3D អាចផ្លាស់ប្តូរការងារជំនាញមួយចំនួន។ ហើយខ្ញុំគិតថា តាមទស្សនៈសង្គម និងឥទ្ធិពលសេដ្ឋកិច្ច ទាក់ទងការងារក្នុងស្រុក ជាពិសេសនៅតំបន់ដាច់ស្រយាល នោះនឹងក្លាយជាបញ្ហាប្រឈមមួយ ដែលយើងត្រូវតែពិចារណានៅពេលយើងប្រើវិធីសាស្ត្របោះពុម្ព 3D»៕ (ប្រភព ៖ Reuters)
ចែករំលែកព័តមាននេះ