ទីក្រុងម៉ូស្គូ៖ វិមានក្រឹមឡាំងថ្លែងថារុស្ស៊ីកែប្រែនយោបាយនុយក្លេអ៊ែររបស់ខ្លួនដើម្បីទុកជាការព្រមានទៅបស្ចិមប្រទេសថាពួកគេកុំចង់ធ្វើខ្លាំងដាក់រុស្ស៊ី។ មុនដំបូង រុស្ស៊ីត្រឹមរក្សាសិទ្ធិប្រើប្រាស់អាវុធនុយក្លេអ៊ែរនៅក្នុងករណីដែលប្រទេសដទៃវាយប្រហារដោយនុយក្លេអ៊ែរមកលើខ្លួនមុន ឬក្នុងករណីដែលប្រទេសដទៃវាយប្រហារទ្រង់ទ្រាយធំដែលអាចប៉ះពាល់ជោគវាសនា-អនាគតរបស់ជាតិខ្លួនតែប៉ុណ្ណោះ។
និយាយឱ្យស្រួលស្ដាប់រុស្ស៊ីសូមរក្សាសិទ្ធិប្រើអាវុធនុយក្លេអ៊ែរដើម្បីការពារជាតិមាតុភូមិរបស់ខ្លួនឱ្យនៅគង់វង្ស។ ប៉ុន្តែឥឡូវនេះ មិនចាំបាច់ដល់ថ្នាក់គេវាយប្រហារមុនទេ។ លោកពូទីនទើបតែប្រកាសថ្មីៗនេះថាបើពួកប្រទេសមហាអំណាចហ៊ានបណ្ដោយឱ្យអ៊ុយក្រែនបាញ់មីស៊ីលចូលទឹករុស្ស៊ី ពេលនោះរុស្ស៊ីមិនត្រឹមតែប្រើប្រាស់នុយក្លេអ៊ែរវាយអ៊ុយក្រែនទេ ប៉ុន្តែវាយទាំងប្រទេសដែលពូកែញោះអ៊ុយក្រែន។
រុស្ស៊ីក៏ព្រមានប្រើអាវុធនុយក្លេអ៊ែរផងដែរបើប្រទេសដទៃវាយប្រហារទ្រង់ទ្រាយធំដោយយន្តហោះក្ដី មីស៊ីលក្ដី ឬយន្តហោះដ្រូនក្ដី។ សូម្បីតែប្រទេសបេឡារូសដែលជាសម្ព័ន្ធមិត្តរបស់រុស្ស៊ីក៏ដោយ។ បើបេឡារូសទទួលរងការគំរាមកំហែងពីប្រទេសដទៃ រុស្ស៊ីនឹងចេញធ្វើអន្តរាគមន៍ដោយប្រើប្រាស់អាវុធនុយក្លេអ៊ែរដើម្បីការពារបេឡារូស។ អ្នកនាំពាក្យវិមានក្រឹមឡាំង លោកប៉េស្កូស (Peskov) ថ្លែងថាការកែសម្រួលនយោបាយនុយក្លេអ៊ែរលើកចុងក្រោយជាការផ្ញើសារព្រមានច្បាស់ៗតែម្ដង។
នេះជាសារដាស់តឿនប្រទេសទាំងនោះថាពួកគេនឹងទទួលរងផលវិបាកបើនៅតែជួយបន្ទរពីក្រោយខ្នងអ៊ុយក្រែនដើម្បីឱ្យអ៊ុយក្រែនមានចិត្តជ្រើមជ្រួល។ បើអ្នកឯងហ៊ានចាក់រុកអ៊ុយក្រែនឱ្យលោតទៅតាមខ្សែញាក់របស់អ្នកឯង អ្នកឯងក៏ត្រូវតែទទួលរងប្រតិកម្មពីរុស្ស៊ីដូចអ៊ុយក្រែនដែរ។ អ្នកនាំពាក្យវិមានក្រឹមឡាំងសូមផ្ដាំប្រទេសដែលនៅពីក្រោយខ្នងអ៊ុយក្រែនថាបើពួកគេជួយសាទរឱ្យអ៊ុយក្រែនវាយប្រហារប្រទេសរុស្ស៊ីមិនចាំបាច់ដោយប្រើនុយក្លេអ៊ែរទេ ប្រើតែអាវុធធម្មតាៗក៏ដោយក៏រុស្ស៊ីប្រើនុយក្លេអ៊ែរតបទៅវិញដែរ។
ការថ្លែងដូច្នេះនៅពេលគេឮសូរល្ហៀងៗថាប្រទេសមហាអំណាចអាមេរិក និងអង់គ្លេសកំពុងពិគ្រោះគ្នាថាតើត្រូវអនុញ្ញាតឱ្យអ៊ុយក្រែនប្រើប្រាស់អាវុធជំនួយរបស់ខ្លួនដើម្បីវាយប្រហាររុស្ស៊ីឬយ៉ាងណា។ អ្នកនាំពាក្យវិមានក្រឹមឡាំងមិនបានបញ្ចេញឈ្មោះប្រទេសអ៊ុយក្រែនទេ។ ប៉ុន្តែលោកថ្លែងថានយោបាយនុយក្លេអ៊ែររបស់រុស្ស៊ីត្រូវកែសម្រួលដោយសារសភាពការណ៍តានតឹងនៅតាមព្រំដែន។ ដូច្នេះ គេមិនចាំបាច់ឆ្ងល់ថាហេតុអ្វីរុស្ស៊ីបង្កើនចំនួនក្បាលគ្រាប់នុយក្លេអ៊ែរនៅក្នុងឃ្លាំងនោះទេ។
ការកែសម្រួលនយោបាយនុយក្លេអ៊ែរនេះក៏កើតឡើងស្របពេលដែលអ៊ុយក្រែនកំពុងនិយាយដុកក្រុមបស្ចិមប្រទេសឱ្យផ្ដល់សិទ្ធិឱ្យខ្លួនបាញ់មីស៊ីលចូលជ្រៅៗទៅក្នុងទឹកដីរុស្ស៊ី។ ប៉ុន្តែរហូតមកដល់ពេលនេះ ក្រុមបស្ចិមប្រទេសបានត្រឹមតែនិយាយតែមាត់ទទេតែប៉ុណ្ណោះ មិនទាន់អនុញ្ញាតជាលាយលក្ខណ៍អក្សរនៅឡើយទេ។
ថ្មីៗនេះ លោកហ្សេឡិនស្គីថ្លែងថាដើម្បីបញ្ចប់សង្គ្រាមនេះបានគេមិនអាចប្រើប្រាស់តែនយោបាយការទូតមួយមុខមិនគ្រប់គ្រាន់ទេ។ លោកយល់ថាប្រទេសមហាអំណាចត្រូវតែបង្ខំឱ្យរុស្ស៊ីទទួលយកសន្តិភាព។ តាមចិត្តរបស់លោកហ្សេឡិនស្គី លោកចង់វាយប្រហារមូលដ្ឋានទ័ពអាកាស និងហេដ្ឋារចនាសម្ព័ន្ធយោធាដែលរុស្ស៊ីវាយប្រហារចេញពីទីតាំងទាំងនោះ។ ប៉ុន្តែសេតវិមានមិនចង់ធ្វើដល់ថ្នាក់ហ្នឹងទេព្រោះខ្លាចសង្គ្រាមផ្ទុះឡើងកាន់តែខ្លាំង៕
ចែករំលែកព័តមាននេះ