ADផ្ទាំងផ្សព្វផ្សាយពាណិជ្ជកម្ម

ទឹកទន្លេហក់ឡើង! លិច១២វត្ត សាលា៤កន្លែង ផ្លូវ១១ខ្សែ និងបាក់ច្រាំង៧ករណី នៅខេត្តកំពង់ចាម

2 ខែ មុន

កំពង់ចាម
២៥ ខែ កញ្ញា ឆ្នាំ ២០២៤ ម៉ោង ១៨:០៩

ខេត្តកំពង់ចាម ៖ ទោះបីជាទឹកទន្លេបានហក់ឡើងលិចបរិវេណវត្តព្រះអង្គខ្មៅស្ថិតនៅក្នុងឃុំកោះសំរោង ស្រុកកំពង់សៀម យ៉ាងណាក៏ដោយគឺពុទ្ធបរិស័ទចំណុះជើងវត្ត បាននាំគ្នាធ្វើដំណើរតាមទូកយកចង្ហាន់មកប្រគេនព្រះសង្ឃក្នុងរដូវដាក់បិណ្ឌ ។ជាមួយនោះក៏មានលំនៅឋានប្រជាពលរដ្ឋចំនួន ៣៥គ្រួសារនៅកោះដាច់ ត្រូវបានរុះរើមកកន្លែងសុវត្ថិភាព ដើម្បីជៀសវាងកុំឲ្យគ្រោះថ្នាក់ដោយប្រការណាមួយ។…

ព្រះភិក្ខុវ៉ា សុខៈ គង់នៅវត្តព្រះអង្គខ្មៅមានថេរៈដីកាឲ្យដឹងនាព្រឹកថ្ងៃទី២៥ កញ្ញាឆ្នាំ២០២៤ ថា: ដោយសារតែទឹកទន្លេបានបន្តហក់ឡើងក្នុងរយៈពេលប៉ុន្មានថ្ងៃនេះ ជាហេតុធ្វើឲ្យបរិវេណវត្តរបស់ព្រះអង្គ ត្រូវបានទឹកហូរចូលនៅថ្ងៃទី២៤កញ្ញាហើយនៅព្រឹកថ្ងៃទី២៥ កញ្ញា គឺទឹកបានលិចបរិវេណវត្តត្រឹមជង្គង់មនុស្សចាស់។ទោះជាបែបនេះក៏ដោយមិនមានបញ្ហាណាមួយចោទឡើងនោះទេ។គឺបងប្អូនពុទ្ធបរិស័ទនៅក្នុងឃុំកោះសំរោង ទាំងក្មេងចាស់ប្រុសស្រីបានជិះទូកយកចង្ហាន់មកប្រគេនព្រះសង្ឃចំនួន៩អង្គ នៅវត្តព្រះអង្គខ្មៅ។

ព្រះភិក្ខុវ៉ា សុខៈ មានថេរដីកាបន្តឲ្យដឹងទៀតថា ទឹកទន្លេមេគង្គពុំដែលឡើងមកលិចបរិវេណវត្តចំនួន៥ ព្រះវស្សាមកហើយទើបតែមកដល់ឆ្នាំ២០២៤នេះបានឡើងលិចបរិវេណវត្ត ហាក់បីដូចចម្លែកជាងបណ្ដាឆ្នាំមុនៗ។ប្រជាពលរដ្ឋក៏ដូចជាពុទ្ធបរិស័ទដែលយកចង្ហាន់មកប្រគេនព្រះសង្ឃគឺភាគច្រើនជាអ្នកនៅឃុំកោះសំរោង ចំណែកអ្នកមកពីក្រៅវិញពុំទាន់ឃើញមាននៅឡើយទេ។ ជាមួយនោះព្រះសង្ឃដែលគង់នៅវត្តព្រះអង្គខ្មៅមិនខ្វះចង្ហាន់សម្រាប់ឆាន់នោះទេ គឺពលរដ្ឋស្រឡាញ់ព្រះពុទ្ធសាសនា បាននាំគ្នាតស៊ូធ្វើដំណើរតាមទូក ឬគោយន្តយកចង្ហាន់មកវត្តជាហូរហែ។

លោកសន សុក មេឃុំកោះសំរោងមានប្រសាសន៍ឲ្យដឹងថា នៅក្នុងឃុំកោះសំរោងទាំងមូលមានវត្តចំនួន៤ ហើយវត្តដែលលិចទឹកគឺមានវត្តព្រះអង្គខ្មៅបន្ទាប់មកវត្តកោះជ្រូកលិចតិចៗ។ចំណែកប្រជាពលរដ្ឋនៅកោះដាច់ចំនួន ៣៥គ្រួសារ បានរងផលប៉ះពាល់ពីគ្រោះទឹកជំនន់នេះក្នុងនោះមានអ្នកខ្លះហាក់ដូចជាបានដឹងហេតុការណ៍មុនបាននាំគ្នារួសរើលំនៅដ្ឋានមកកាន់កន្លែងសុវត្ថិភាព។រាល់ថ្ងៃប្រជាពលរដ្ឋធ្វើដំណើរតាមកំពុងដរ នៅកៀនជ្រៃតែបើទឹកបន្តឡើងទៀតត្រូវដូរទិសដៅមកថ្មគោល ឆ្ពោះមកវត្តកោះជ្រូក ដែលទីទួលខ្ពស់។ សូមបញ្ជាក់ថាលំនៅដ្ឋានពលរដ្ឋនៅភូមិទី៦គឺទឹកបានលិចតិចតួចនៅឡើយមិនមានបញ្ហាណាមួយចោទឡើងនោះទេ។ហើយប្រជាពលរដ្ឋនៅឃុំកោះសំរោងទាំងមូលសរុបមានចំនួន១៥៧០គ្រួសារស្មើជាង៧០០០ នាក់ អ្នកទន្លេបើសិនជាទឹកមិនឡើងមកលិចភូមិឋាននោះទេគឺជារឿងចម្លែក។

លោកទុន សៀង មេឃុំពាមកោះស្នា បានឲ្យដឹងនារសៀលថ្ងៃទី២៥កញ្ញាថាក្នុងរយៈពេលពីរបីថ្ងៃនេះកំពស់ទឹកទន្លេមេគង្គ បានហក់ឡើងខ្លាំងជាហេតុធ្វើឲ្យវត្តចំនួន៣បានទទួលរងការលិចលង់ក្នុងនោះរួមមាន÷ ១.វត្តព្រៃកសង្កែ ២.វត្តពាមកោះស្នា ៣.វត្តទួលរកា ហើយវត្តដែលលិចច្រើនជាងគេគឺវត្តព្រែកសង្កែនិងវត្តពាមកោះស្នា ដែលទឹកលិចចង្កេះមនុស្សចាស់ទៀត ពុទ្ធបរិស័ទមកវត្តត្រូវជិះទូក ចំណែកច្រាំងទន្លេវិញមិនមានបាក់នោះទេ។

លោកស្រី សុភ័ក្ត្រ អភិបាលរងខេត្តនិងជាអ្នកនាំពាក្យសាលាខេត្តមានប្រសាសន៍ឲ្យដឹងនិរសៀលថ្ងៃទី២៥ កញ្ញាថា រហូតមកដល់ពេលនេះស្រុកចំនួន៥បានទទួលរងផលប៉ះពាល់ពីទឹកជំនន់ទន្លេមេគង្គក្នុងនោះមានស្រុក÷ ស្ទឹងត្រង់ កំពង់សៀម កោះសូទិនកងមាសនិងស្រីសន្ធរ ហើយលិចវត្តចំនួន១២វត្ត លិចសាលារៀន៤សាលាលិចផ្លូវ១១ខ្សែ បាក់ច្រាំង៧ករណីចំពោះទំហំការខូចខាតមិនមានអ្វីធំដុំនៅឡើយទេ។

យោងតាមរបាយការណ៍របស់លោកអ៊ំវិបុល ប្រធានមន្ទីរធនធានទឹកនិងឧតុនិយមខេត្ត បានឲ្យដឹងថាកម្ពស់ទឹកទន្លេមេគង្គនៅថ្ងៃទី២៥កញ្ញាឆ្នាំ២០២៤មានកម្ពស់។១៤,១០ម៉ែត្រ។ចំពោះកម្រិតទឹកដែលឲ្យមានការប្រុងប្រយ័ត្នគឺ១៥,២០ម៉ែត្រ បង្កើនឲ្យមានការប្រុងប្រយ័ត្ន ៕