រាជធានីភ្នំពេញ ៖ បុរសអ្នកបើកបររថយន្តដឹកអេតចាយម្នាក់ បានមើលទូរសព្ទក្នុងពេលកំពុងបើកបរ ស្រាប់តែជ្រុលទៅបុកពីក្រោយក្មេងស្រីសិស្សសាលា២នាក់ ដែលកំពុងអង្គុយលើកង់ ឈប់រង់ចាំភ្លើងស្តុបក្រហម ទាំងកំរោល បណ្ដាលឲ្យរងរបួសធ្ងន់ទាំង២នាក់។ បន្ទាប់មកបុរសនោះ…
រាជធានីភ្នំពេញ ៖ បុរសអ្នកបើកបររថយន្តដឹកអេតចាយម្នាក់ បានមើលទូរសព្ទក្នុងពេលកំពុងបើកបរ ស្រាប់តែជ្រុលទៅបុកពីក្រោយក្មេងស្រីសិស្សសាលា២នាក់ ដែលកំពុងអង្គុយលើកង់ ឈប់រង់ចាំភ្លើងស្តុបក្រហម ទាំងកំរោល បណ្ដាលឲ្យរងរបួសធ្ងន់ទាំង២នាក់។ បន្ទាប់មកបុរសនោះ បានឈប់រថយន្តរួចចុះរត់គេចខ្លួន ប៉ុន្តែត្រូវបានអ្នកដំណើរ ដេញតាមឃាត់បាន រួចព្រួតគ្នាវាយម្នាក់១ដៃ ១ជើង រងរបួសប៉ោងមុខ និងទ្រមខ្លួន រួចទើប្រគល់ឲ្យនគរបាលនាំទៅចាត់ការបន្ត ។
ឧប្បត្តិហេតុគ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង០៦និង៣០នាទី ព្រឹកថ្ងៃទី២៣ ខែកញ្ញា ឆ្នាំ២០២៤ នៅលើផ្លូវ៥០ម៉ែត្រកែងនិងផ្លូវ២១៧ ត្រង់ចំណុចភ្លើងស្តុបបាគូ ស្ថិតនៅក្នុងភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ ។
បុរសខាងលើមិនទាន់ត្រូវបានស្គាល់អត្តសញ្ញាណនៅឡើយទេ គាត់បើកបររថយន្ត ១គ្រឿង ពណ៍ស ពាក់ស្លាកលេខភ្នំពេញ 3B-3910 ដឹកអេតចាយ ហើយត្រូវបាននគរបាល នាំយកទៅសាកសួរនៅអធិការដ្ខានគរបាលខណ្ឌដង្កោភ្លាមៗ ។ ដោយឡែកក្មេងស្រីរងគ្រោះទាំង២នាក់នោះ ក៏ពុំទាន់បានស្គាល់អត្តសញ្ញាណដែរ ហើយត្រូវបានបញ្ជូនទៅសង្គ្រោះបន្ទាន់ នៅមន្ទីពេទ្យបង្អែកដង្កោ ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ ក្មេងស្រីសិស្សសាលារងគ្រោះទាំង ២នាក់ខាងលើ បានជិះកង់ ១គ្រឿង ឌុបគ្នា ចេញពីផ្ទះទៅសាលារៀន ដោយធ្វើដំណើរក្នុងទិសដៅពីលិចទៅកើត លុះពេលទៅដល់ត្រង់ចំណុចកើតហេតុ បានឈប់រងចាំភ្លើងស្តុបក្រហម ស្រាប់ពេលនោះ រថយន្តដឹកអេតចាយ បើកបរដោយបុរសខាងលើ ក្នុងទិសដៅស្របគ្នា ទៅដល់បុកពីក្រោយទាំងកំរោល តែម្ដង ។
ប្រភពដដែល បានប្រាប់ឲ្យដឹងបន្តទៀតថា អ្នកបើកបររថយន្តខាងលើ បើករថយន្តបណ្តើរ និងមើលទូរសព្ទបណ្តើរ អត់មើលទៅមុខនោះទេ ទើបបានជាជ្រុលចង្កូតទៅបុកក្មេងស្រីរងគ្រោះទាំង២នាក់នោះ ទាំងកំរោលបែបនេះ ។ បន្ទាប់មក អ្នកបើកបររថយន្តនេះ បានឈប់ រួចបើកទ្វាររថយន្តចុះរត់គេចខ្លួន ប៉ុន្តែត្រូវបានអ្នកដំណើរជួយដេញស្ទាក់ចាប់បាន និងនាំគ្នាវាយទាត់ធាក់ម្នាក់១ដៃ១ជើង បណ្ដាលឲ្យរងរបួសមុខមាត់យ៉ាងដំណំ ។
ប្រភពខាងលើ បានប្រាប់បន្ថែមទៀតថា ក្រោយពេលកើតហេតុ កម្លាំងប៉ុស្តិ៍នគរបាលរដ្ឋបាលសង្កាត់ដង្កោ សហការណ៍ជាមួយកម្លាំងនគរបាលចរាចរណ៍ខណ្ឌដង្កោ បានចុះទៅកាន់ទីនោះ ជួយអន្តរាគមន៍ ។ ដោយនាំយកអ្នកបើកបររថយន្តទៅកាន់អធិការដ្ឋានខណ្ឌដង្កោ បន្ទាប់មកបញ្ជូនក្មេងស្រីរងគ្រោះ ទៅកាន់មន្ទីរពេទ្យបង្អែកដង្កោ ដើម្បីសង្គ្រោះបន្ទាន់ រួចធ្វើការវាស់វែង នាំយករថយន្តបង្ក និងកង់ទៅរក្សាទុករង់ចាំការដោះស្រាយពេលក្រោយ ៕
ចែករំលែកព័តមាននេះ