សហរដ្ឋអាមេរិក ៖ រដ្ឋាភិបាលសហរដ្ឋអាមេរិកបានដាក់ពាក្យបណ្តឹងទាមទារសំណងចំនួន១០០លានដុល្លារអាមេរិក ប្រឆាំងនឹងក្រុមហ៊ុន ក៏ដូចជាប្រតិបត្តិករនៃកប៉ាល់ដឹកទំនិញដែលបានបុកបណ្តាលឱ្យបាក់ស្ពានហ្វ្រង់ស៊ីស ស្កុត ឃី (Francis Scott Key)…
សហរដ្ឋអាមេរិក ៖ រដ្ឋាភិបាលសហរដ្ឋអាមេរិកបានដាក់ពាក្យបណ្តឹងទាមទារសំណងចំនួន១០០លានដុល្លារអាមេរិក ប្រឆាំងនឹងក្រុមហ៊ុន ក៏ដូចជាប្រតិបត្តិករនៃកប៉ាល់ដឹកទំនិញដែលបានបុកបណ្តាលឱ្យបាក់ស្ពានហ្វ្រង់ស៊ីស ស្កុត ឃី (Francis Scott Key) ស្ថិតនៅក្នុងទីក្រុងបាលទីម័រ (Baltimore) រដ្ឋម៉ារីលែន (Maryland) សហរដ្ឋអាមេរិក កាលពីខែមីនាកន្លងទៅ។
មន្ត្រីក្រសួងយុត្តិធម៌អាមេរិកបានអះអាងថា ក្រុមហ៊ុន Synergy និងក្រុមហ៊ុន Grace Ocean បានដឹងច្បាស់អំពីបញ្ហាកើតឡើងលើកប៉ាល់ដឹកទំនិញឈ្មោះដាលី (Dali) ដោតទង់ជាតិសិង្ហបុរី មុនពេលគាំងម៉ាស៊ីន គ្មានថាមពលអគ្គីសនីគ្រប់គ្រាន់ ហើយនាវឹកមិនអាចបញ្ជាបានទើបទៅបុកស្ពានហ្វ្រង់ស៊ីស ស្កុត ឃី ឱ្យបាក់រលំ ដោយមនុស្ស៦នាក់បានបាត់បង់ជីវិត កាលពីថ្ងៃទី២៦ ខែមីនា ឆ្នាំ២០២៤ ។
រដ្ឋាភិបាលអាមេរិកបានអះអាងថា ខ្លួនចំណាយប្រាក់ជាង១០០លានដុល្លារ ដើម្បីសម្អាតកម្ទេចកម្ទីដែលត្រូវបានប៉ាន់ស្មានថាមានទម្ងន់ពី៣ពាន់ទៅ៤ពាន់តោន មុនអាចឱ្យកំពង់ផែបាលទីម័រ បើកដំណើរការឡើងវិញ។ លោកអគ្គមេធាវី Merrick Garland បានថ្លែងថា លោកចង់ធានាថាការចំណាយទាំងអស់ គឺជាបន្ទុករបស់ក្រុមហ៊ុនដែលបណ្តាលឱ្យមានឧប្បត្តិហេតុកើតឡើង មិនមែនដោយអ្នកបង់ពន្ធអាមេរិកនោះទេ។ ក្រសួងយុត្តិធម៌បានបញ្ជាក់ថា ប្រាក់ដែលទទួលបានពីការប្តឹងផ្តល់នេះ នឹងត្រូវចំណាយលើការសាងសង់ស្ពានឡើងវិញ។
សាកសពកម្មករចំនួន៦នាក់ដែលបានស្លាប់ អំឡុងពេលពួកគេកំពុងជួសជុលស្ពាននៅពេលត្រូវបានស្រង់ចេញពីទន្លេប៉ាតាបស្កូ (Patapsco) ពោលរយៈពេលប៉ុន្មានថ្ងៃ បន្ទាប់ពីកប៉ាល់បានបុកស្ពាន។ គ្រួសារជនរងគ្រោះចំនួន៣នាក់ កាលពីថ្ងៃចន្ទដើមសប្តាហ៍នេះ បានអះអាងថា ពួកគេកំពុងប្តឹងក្រុមហ៊ុន Grace Ocean។ ពាក្យបណ្តឹងរបស់ក្រសួងយុត្តិធម៌អាមេរិក ដែលបានដាក់នៅតុលាការស្រុកក្នុងរដ្ឋម៉ារីលែន បានចោទប្រកាន់ថា ប្រព័ន្ធអគ្គិសនី និងមេកានិចរបស់កប៉ាល់ដាលីត្រូវបានថែទាំមិនបានត្រឹមត្រូវ។ របាយការណ៍បឋមក្រុមប្រឹក្សាសុវត្ថិភាពដឹកជញ្ជូនជាតិអាមេរិកបានរកឃើញថា កប៉ាល់ដាលីបានអស់ថាមពលអគ្គិសនីចំនួន៤ដងក្នុងរយៈពេលតិចជាង១២ម៉ោង នៅមុនពេលបុកជាមួយស្ពាន។
ការខូចខាតត្រូវចំណាយពេលរាប់ខែដើម្បីជួសជុល និងផ្អាកការដឹកជញ្ជូនពាណិជ្ជកម្មចូលទៅក្នុងកំពង់ផែ ដែលជាច្រកដ៏មមាញឹកបំផុតមួយនៅអាមេរិក។ សមាជិក២០នាក់នៃនាវិករបស់កប៉ាល់ដាលី ត្រូវបានជាប់នៅលើកប៉ាល់អស់រយៈពេលជាច្រើនសប្តាហ៍ ដោយសារកប៉ាល់នៅតែជាប់គាំងដោយបេតុង និងដែករាប់តោនពីលើ។ ហើយការបុកបាក់ស្ពានហ្វ្រង់ស៊ីស ស្កុត ឃី ត្រូវបានចាត់ទុកថាជាករណីរងគ្រោះក្នុងសមុទ្រមានតម្លៃថ្លៃបំផុតក្នុងប្រវត្តិសាស្ត្រអាមេរិក។ ពាក់ព័ន្ធបញ្ហានេះ ក្រុមហ៊ុន Grace Ocean បានដាក់សំណើនៅតុលាការសហព័ន្ធ ដើម្បីកំណត់ការទទួលខុសត្រូវផ្លូវច្បាប់របស់ខ្លួន៕ (ប្រភព ៖ BBC)
ចែករំលែកព័តមាននេះ