ទីក្រុងតេអេរ៉ង់៖ រដ្ឋាភិបាលអ៊ីរ៉ង់ចោទប្រកាន់ថាអ៊ីស្រាអែលបានប្រព្រឹត្ត «អំពើមនុស្សឃាតទ្រង់ទ្រាយធំ» នៅក្នុងហេតុការណ៍បញ្ជាឱ្យផ្ទុះឧបករណ៍ផ្ញើសារចល័ត (pager) ស្លាប់មនុស្ស១២នាក់ និងរបួស២៨០០នាក់។ ការចោទប្រកាន់នេះក៏មិនខុសពីអ្វីដែលក្រុមហេស្បូឡានៅប្រទេសលីបង់ចោទប្រកាន់ដូចគ្នាថានេះជាស្នាដៃរបស់អ៊ីស្រាអែលយ៉ាងពិតប្រាកដ។
អ្នកដែលរងគ្រោះខ្លាំងជាងគេគឺយុទ្ធជន និងមន្ត្រីជាន់ខ្ពស់របស់ក្រុមហេស្បូឡាព្រោះពួកគេជាអ្នកទិញឧបករណ៍នេះរហូតដល់៥ពាន់គ្រឿងប្រើប្រាស់នៅក្នុងចំណោមគ្នារបស់គេ។ រដ្ឋមន្ត្រីការបរទេសអ៊ីរ៉ង់ លោកអាប់បាស់ អារ៉ាក់ឈី (Abbas Araghchi) ប្រកាសថ្កោលទោសអំពើនេះ និងចាត់ទុកថាជាអំពើភេរវកម្មប្រព្រឹត្តឡើងដោយអ៊ីស្រាអែល និងជាភស្តុតាងបញ្ជាក់ពីអំពើមនុស្សឃាតទ្រង់ទ្រាយធំ។
លោកទើបតែនិយាយទូរស័ព្ទជាមួយជាមួយរដ្ឋមន្ត្រីការបរទេសលីបង់។ នៅក្នុងចំណោមជនរងគ្រោះដែលត្រូវរបួសដោយសារហេតុការណ៍ផ្ទុះឧបករណ៍ផ្ញើសារចល័តពេញផ្ទៃប្រទេសលីបង់នោះក៏មានឯកអគ្គរដ្ឋទូតអ៊ីរ៉ង់ប្រចាំប្រទេសលីបង់ផងដែរគឺលោកម៉ូថាបា អាម៉ានីផងដែរ (Mojtaba Amani)។ សារព័ត៌មានអ៊ីរ៉ង់ផ្សាយថាគាត់ត្រូវរបួសនៅត្រង់ដៃ និងមុខ។
ទូរទស្សន៍របស់រដ្ឋអ៊ីរ៉ង់ផ្សាយថាលោកអាម៉ានីត្រូវរបួសមិនធ្ងន់ធ្ងរពេកទេ។ ស្ថានទូតអ៊ីរ៉ង់នៅទីក្រុងបេរូតក៏បានប្រកាសនៅលើបណ្ដាញអ៊ិចច្រានចោលពាក្យចចាមអារ៉ាមដែលថាលោកឯកអគ្គរដ្ឋទូតរូបនេះមានរបួសធ្ងន់ដល់ថ្នាក់មិនអាចកម្រើកខ្លួនបាន និងងងឹតភ្នែក។ ទូរទស្សន៍នេះអះអាងថាគាត់ទទួលបានការព្យាបាលល្អណាស់។ អឌ្ឍចន្ទក្រហមអ៊ីរ៉ង់ថ្លែងថាខ្លួនបានបញ្ជូនក្រុមអ្នកជួយសង្គ្រោះ និងគ្រូពេទ្យវះកាត់ភ្នែកទៅប្រទេសលីបង់ជាបន្ទាន់ដើម្បីព្យាបាលមុខរបួសរបស់គាត់។
ប្រធានក្រុមគ្រូពេទ្យដែលទទួលបេសកកម្មទៅលីបង់លើកនេះប្រកាសថា «នៅក្នុងករណីចាំបាច់ យើងត្រៀមបញ្ជូនអ្នករបួសធ្ងន់ៗទៅប្រទេសអ៊ីរ៉ង់ដើម្បីបន្តការព្យាបាលនៅទីនោះ»។ រហូតមកដល់ពេលនេះ អ៊ីស្រាអែលនៅរក្សាភាពស្ងប់ស្ងាត់បានល្អណាស់។ ហេតុការណ៍ផ្ទុះឧបករណ៍ផ្ញើសារចល័តទូទាំងប្រទេសលីបង់កាលពីម្សិលមិញនោះកើតឡើងត្រឹមតែបន្តិចប៉ុណ្ណោះបន្ទាប់ពីអ៊ីស្រាអែលប្រកាសថាខ្លួននឹងពង្រីកសង្គ្រាមដែលដុតបញ្ឆេះដំបូងដោយក្រុមហាម៉ាស់កាលពីថ្ងៃទី៧ ខែតុលា ឆ្នាំ២០២៣នោះឱ្យកាន់តែឆាបឆេះលើសពីតំបន់ហ្សាហ្សាទៅទៀត។
អ៊ីស្រាអែលចង់មានន័យថាខ្លួននឹងធ្វើសកម្មភាពអុជអាលឱ្យក្រុមហេស្បូឡាដែលជាសម្ព័ន្ធមិត្តរបស់ក្រុមហាម៉ាស់ចូលរួមលេងល្បែងសង្គ្រាមដ៏បង្ហូរឈាមនេះដែរ។ អ្នកនាំពាក្យអ៊ីរ៉ង់ថ្លែងនៅក្នុងសេចក្ដីប្រកាសថាអ៊ីរ៉ង់ស្ថិតនៅជាមួយក្រុមគ្រួសារជនរងគ្រោះដែលស្លាប់ និងរបួសទាំងអស់។ លោកថ្លែងថាយើងចាំបាច់ត្រូវតែប្រយុទ្ធប្រឆាំងនឹងអំពើភេរវកម្ម និងគ្រោះគំរាមកំហែងដែលបង្កឡើងដោយអ៊ីស្រាអែល៕
ចែករំលែកព័តមាននេះ