ទីក្រុងម៉ូស្គូ៖ ថ្មីៗនេះ ប្រទេសរុស្ស៊ីបង្ហើបឱ្យដឹងអំពីផែនការបង្កើនចំនួនកងទ័ពរៀបរយរបស់ខ្លួនរហូតដល់មួយលានកន្លះ។ អ្នកនាំពាក្យវិមានក្រឹមឡាំងពន្យល់ត្រង់ចំណុចនេះថាដោយសារប្រទេសរុស្ស៊ីប្រឈមនឹងការគំរាមកំហែងកាន់តែខ្លាំងចំពោះសន្តិសុខជាតិរបស់ខ្លួននៅតាមព្រំដែន។ ក្នុងនោះក៏មានចំណុចអរិភាព (ឬភាពយកគ្នាជាសត្រូវ) ពីសំណាក់ក្រុមបស្ចិមប្រទេសផងដែរ។
លោកពូទីនបានចុះហត្ថលេខាលើក្រឹត្យថ្មីមួយកាលពីថ្ងៃចន្ទដើម្បីបង្កើនចំនួនកងទ័ពសកម្មដែលសព្វថ្ងៃនេះមានចំនួនមួយសែន ប្រាំបីម៉ឺននាក់ត្រូវបង្កើនដល់មួយលាន ប្រាំសែននាក់នាពេលអនាគត។ បើដូច្នេះមែន មានន័យថារុស្ស៊ីនឹងក្លាយជាប្រទេសមានចំនួនកងទ័ពសកម្មលំដាប់ទីពីរពិភពលោកបន្ទាប់ពីប្រទេសចិន។ រុស្ស៊ីនឹងរុញច្រានប្រទេសអាមេរិកឱ្យឈរទៅ លំដាប់ទី២វិញ ខណៈដែលអាមេរិកសព្វថ្ងៃនេះមានកងទ័ពសកម្មមួយលាន បីសែននាក់។ នេះបើយោងតាមសារព័ត៌មានរុស្ស៊ី។
អ្នកនាំពាក្យវិមានក្រឹមឡាំង លោកឌីមីទ្រី ប៉េស្កូស (Dmtry Pskov) ថ្លែងថាផែនការបង្កើនចំនួនកងទ័ពនេះមានហេតុផលចេញពីការគំរាមកំហែងទៅលើសន្តិសុខជាតិរបស់រុស្ស៊ីនៅតាមព្រំដែន។ ម៉្យាងដោយសារទំនាស់កាន់តែខ្លាំងនៅខាងលិចព្រំដែន និងម៉្យាងទៀតដោយសារបញ្ហាអស្ថិរភាពនៅខាងកើតព្រំដែន។ ចាប់តាំងពីសង្គ្រាមអ៊ុយក្រែនផ្ទុះឡើងរហូតមកដល់ពេលនេះ ជាលើកទីបីហើយដែលលោកពូទីនចេញបញ្ជាឱ្យបង្កើនចំនួនកងទ័ព។
ឥឡូវនេះ ចំនួនកងទ័ពរុស្ស៊ីដែលកំពុងច្បាំងនៅលើទឹកដីអ៊ុយក្រែនបានកើនឡើងដល់៧សែននាក់។ នេះបើយោងតាមការប៉ាន់ស្មានរបស់លោកពូទីនកាលពីខែមិថុនា។ កាលពី៦សប្ដាហ៍កន្លងទៅនេះ រុស្ស៊ីបានបញ្ជូនកងទ័ពជាច្រើនទៅព្រំដែនដើម្បីទប់ទល់នឹងការវាយឆ្មក់របស់អ៊ុយក្រែនឆ្លងព្រំដែនចូលទឹកដីរុស្ស៊ីត្រង់តំបន់ខឺស។ ស្របពេលជាមួយគ្នានោះ រុស្ស៊ីក៏បានបញ្ចេញកងទ័ពជាច្រើនទៀតដើម្បីបង្កើនការវាយលុកនៅអ៊ុយក្រែនខាងកើត។
ប្រទេសទាំង២ពុំដែលប្រកាសជាចំហថាខ្លួនបានបាត់បង់កម្លាំងប្រយុទ្ធអស់ប៉ុន្មាននាក់នោះទេគិតទាំងចំនួនកងទ័ពដែលស្លាប់ និងរបួស។ ប៉ុន្តែអ្នកវិភាគឯករាជ្យប៉ាន់ស្មានថាភាគីម្ខាងៗស្លាប់ និងរបួសមិនតិចម៉ឺននាក់ទេចាប់តាំងពីសង្គ្រាមផ្ទុះឡើងដំបូងកាលពីដើមឆ្នាំ២០២២។ ប្រទេសរុស្ស៊ីធ្លាប់បាននិយាយជាច្រើនដងមកហើយអំពីការគំរាមកំហែងទៅលើសន្តិសុខជាតិរបស់ខ្លួនដែលមានចំណុចចាប់ផ្ដើមចេញពីតំបន់ព្រំដែន។
ជាពិសេស រុស្ស៊ីចង់សំដៅទៅលើការគំរាមកំហែងពីសំណាក់អង្គការណាតូ។ រុស្ស៊ីយល់ថាណាតូបានខិតកាន់តែកៀកនឹងរបបផ្ទះរបស់ខ្លួន។ ដូច្នេះមិនអាចនៅសម្ងំស្ងៀមបានទេ ត្រូវតែធ្វើអ្វីម៉្យាងដើម្បីរំដោះខ្លួនចេញពីការហ៊ុមព័ទ្ធ។ ក៏ប៉ុន្តែណាតូក៏ធ្លាប់បានបកស្រាយជាហូរហែផងដែរថាខ្លួនគ្មានចង់ប្រឈមមុខគ្នាជាមួយរុស្ស៊ីទេ។ ណាតូលើកទឡ្ហីករណ៍ថាទង្វើឈ្លានពានរបស់រុស្ស៊ីទៅលើប្រទេសជិតខាងឯណោះទៅវិញទេដែលធ្វើឱ្យសភាពការណ៍កាន់តែតឹងតែងពីមួយថ្ងៃទៅមួយថ្ងៃ៕
ចែករំលែកព័តមាននេះ