ខេត្តកំពង់ចាម: ពិតជាគួរឱ្យអាណិតអាសូរដល់ប្រជាការពារម្នាក់ដែលមានជីវភាពខ្វះខាត ខណៈពេលជិះទូកម៉ាស៊ីនត្រឡប់មកពីរកត្រីវិញ បានជួបគ្រោះថ្នាក់ចរាចរណ៍ផ្លូវទឹក បណ្ដាលឱ្យស្លាប់នៅក្នុងហេតុការណ៍នេះ ចំណែកភាគីទូកម្ខាងទៀតបានបើកគេចខ្លួនបាត់។
ហេតុការណ៍នេះបានកើតឡើងនៅវេលាម៉ោង៣និង៣០នាទីយប់ទៀតភ្លឺឈានចូលព្រឹកថ្ងៃទី១៦កញ្ញា ២០២៤នៅចំណុចបឹងជ្រោយ ស្ថិតក្នុងភូមិបឹងជ្រោយ ឃុំសូទិព្វ ស្រុកជើងព្រៃ។
សមត្ថកិច្ចមូលដ្ឋានប្រាប់ឲ្យដឹងថា:ករណីគ្រោះថ្នាក់ចរាចរណ៍ផ្លូវទឹកមួយកើតឡើង រវាងទូកនិងទូកបានបុកគ្នាបណ្ដាលឱ្យ ជនរងគ្រោះឈ្មោះ ផាន លីម ភេទប្រុស អាយុ៦២ឆ្នាំ រស់នៅភូមិ ឃុំកើតហេតុខាងលើ បានធ្លាក់ពីលើទូក ចូលទឹកលង់ស្លាប់ ខណ:ជនរងគ្រោះត្រឡប់មកពីរកត្រីវិញ។ចំណែកភាគីទូកម្ខាងទៀតបានបើកគេចខ្លួនបាត់រហូតមកដល់រសៀលថ្ងៃទី១៧កញ្ញា ពុំទាន់ស្រាវជ្រាវឃើញនៅឡើយទេ។
សមត្ថកិច្ចបន្តឲ្យដឹងទៀតថារហូតដល់វេលាម៉ោង១០ព្រឹក ថ្ងៃទី១៧ កញ្ញា ទើបរកសាកសពឃើញនៅត្រង់កន្លែងគ្រោះថ្នាក់នោះ។ ផ្អែកតាមគណៈកម្មការត្រួតពិនិត្យធ្វើកោសលវិច្ច័យបានបញ្ជាក់ឲ្យឃើញថា សពពិតជាស្លាប់ដោយសារទូកបុកគ្នាប្រាកដមែន មិនពាក់ព័ន្ធបទល្មើសព្រហ្មទណ្ឌឡើយ។
សូមបញ្ជាក់ថាជារៀងរាល់ថ្ងៃទំនេរពីការងារបុរសរូបនេះតែងតែទៅរាយមងដាក់ត្រី នៅឯបឹងដើម្បីយកមកគ្រាន់ធ្វើម្ហូបអាហារសម្រាប់ជួយសម្រាលជីវភាពគ្រួសារ។
សមត្ថកិច្ចមូលដ្ឋានបានអះអាងថាបុរសដែលស្លាប់នេះគឺជាប្រជាការពារ ហើយមានចរិតស្លូតបូតគួរឱ្យរាប់អានទៀតផង។ជុំវិញករណីគ្រោះថ្នាក់ចរាចរណ៍ទូកនេសាទបុកគ្នានៅលើផ្ទៃទឹកបឹងនេះគេមិនដឹងថាភាគីទូកម្ខាងទៀតនៅទីណានោះទេ ។ ព្រោះតែយប់ណាមួយគ្រោះថ្នាក់នេះកើតឡើងពេលយប់អ្នករងគ្រោះជិះទូកម៉ាស៊ីនតែម្នាក់ឯងទៀត។ដោយមិនមានសាក្សីណាម្នាក់បានឃើញនោះទេតែតាមការពិនិត្យស្លាកស្នាមទូករបស់អ្នករងគ្រោះបង្ហាញថាពិតជាបានគ្រោះថ្នាក់ចរាចរណ៍នៅលើផ្ទៃទឹកដោយពិតប្រាកដមែន ៕
ចែករំលែកព័តមាននេះ