វៀតណាម ៖ ទោះជាមេឃរំលំ ភ្នំរលាយ ក៏មិនអាចរារាំងថ្ងៃពិសេសរបស់គូព្រេងពីបុព្វេមួយគូនេះបានឡើយ ដូចយើងដឹងហើយថា ភាគខាងជើងប្រទេសវៀតណាម កំពុងលិចលង់ដោយទឹកជំនន់ដ៏ធ្ងន់ធ្ងរបំផុតជាប្រវត្តិសាស្ត្រ ហើយក្នុងចំណោមបណ្តាខេត្តជាច្រើននោះ ខេត្តBac…
វៀតណាម ៖ ទោះជាមេឃរំលំ ភ្នំរលាយ ក៏មិនអាចរារាំងថ្ងៃពិសេសរបស់គូព្រេងពីបុព្វេមួយគូនេះបានឡើយ ដូចយើងដឹងហើយថា ភាគខាងជើងប្រទេសវៀតណាម កំពុងលិចលង់ដោយទឹកជំនន់ដ៏ធ្ងន់ធ្ងរបំផុតជាប្រវត្តិសាស្ត្រ ហើយក្នុងចំណោមបណ្តាខេត្តជាច្រើននោះ ខេត្តBac Ninh ក៏កំពុងរងគ្រោះយ៉ាងដំណំដូចគ្នា ។
ផ្ទុយពីរឿងរ៉ាវ និងព័ត៌មានទុក្ខសោកព្រាត់ប្រាស់បាត់បង់មនុស្សជាទីស្រលាញ់ជាច្រើនករណី ដោយសារតែគ្រោះមហន្តធម្មជាតិដែលត្រូវបានបង្ហោះជាបន្តបន្ទាប់ នៅតាមប្រព័ន្ធផ្សព្វផ្សាយនោះ ពិធីមង្គលការក្នុងទឹកជំនន់មួយនៅឯខេត្ត Bac Ninh បានចេញមកបំបែកភាពសោកសៅ និងបង្កើតស្នាមញញឹមសម្រាប់ប្រជាជនវៀតណាម ដែលបានតាមដានបណ្តាញសង្គម ។
តាមរយៈរូបភាពដែលត្រូវបានបង្ហោះចែកចាយ បង្ហាញឱ្យឃើញពីសកមម្មនៃពិធីដង្ហែជំនូនរបស់ក្រុមគ្រួសារកូនកម្លោះចូលទៅកាន់រោងពីធីមង្គលការ ដោយមនុស្សសឹងទាំងអស់ត្រូវដើរលយទឹក ។ គេអាចឃើញទាំងឪពុកម្តាយ បងប្អូនសាច់ញាតិ មិត្តភភ្តិ ដែលចូលរួមខ្លះលាត់ជើងខោឡើងលើ ខ្លះទទូឆ័ត្រ ចំណែកឯជំនូនវិញត្រូវបានដឹកតាមទូក ។
កូនកម្លោះវ័យក្មេង ស្លៀកឈុតក្រហមយ៉ាងសង្ហា ពាក់វ៉ែនតា ដៃកាន់បាច់ផ្កា អមដោយអ្នកកំដរប្រុស៥នាក់ ជាមួយឈុតផ្កាឈូកយ៉ាងស្រស់ ដើរសំដៅទៅរោងពិធី ដោយមានការរងចាំទទួលស្វាគមន៍ពីសាច់ញាតិ និងភ្ញៀវជាច្រើនរូប ជាពិសេសនោះ គឺ កូនក្រមុំដ៏ស្រស់សោភា ជាមួយទឹកមុខ ប្រកបដោយស្នាមញញឹម បង្ហាញឱ្យឃើញពីក្តីរំភើបសម្រាប់ថ្ងៃពិសេសបំផុតនៅក្នុងជីវិត ។
កូនកម្លោះ និងកូនក្រមុំ ក្នុងពិធីមង្គលការដ៏កម្រមួយនេះត្រូវបានគេស្គាល់ថា កូនក្រមុំឈ្មោះ Diem Thi Linh កើតឆ្នាំ២០០១ អាយុ២៣ឆ្នាំ ដោយឡែក កូនកម្លោះឈ្មោះ Nguyen Van Phuong កើតឆ្នាំ ១៩៩៩ អាយុ២៥ឆ្នាំ ។ ក្នុងចំណោមរូបភាពជាច្រើនសន្លឹក រូបដែលមើលទៅហើយមានក្តីសុខបំផុតនោះ គឺរូបកូនកម្លោះអៀវកូនក្រមុំដើរឆ្លងទឹក ហើយត្រូវបានអ្នកលេងបណ្តាញសង្គមខមិនបែបចំអន់ថា ប្តីអៀវប្រពន្ធកាត់ទឹកចូលបន្ទប់ផ្សំដំណេក ។ អ្នកលេងបណ្តាញសង្គមបានបន្សល់ទុកនូវមតិគួរឱ្យចាប់អារម្មណ៍ជាច្រើនអំពីពិធីមង្គលការក្នុងទឹកជំនន់មួយនេះថា «អាពាហ៍ពិពាហ៍ដ៏គួរឱ្យចង់ចាំបែបនេះនឹងមានអនុស្សាវរីយ៍ដ៏ស្រស់ស្អាត ដើម្បីប្រាប់កូនៗ និងចៅរបស់យើង» ពេលវេលានេះ គឺពិតជាមិនអាចបំភ្លេចបានសម្រាប់មួយជីវិត» ។ កូនកម្លោះ Nguyen Van Phuong បានអះអាងថា គ្រួសាររបស់ពួកគេទាំងសងខាងបានត្រៀមខ្លួនជាយូរណាស់មកហើយ សម្រាប់ពិធីមង្គលការមួយនេះ ដូច្នេះហើយបើទោះបីជាមានស្ថានភាពទឹកជំនន់កំពុងជន់លិចយ៉ាងណាក្តី ក៏យើងទាំងពីរនៅតែបន្តរៀបចំពិធីមង្គលការតាមការគ្រោងទុក ។
កូនកម្លោះថ្មោងថ្មី ដែលបានរៀបការក្នុងទឹកជំនន់ដ៏ត្រជាក់ត្រជុំបានរៀបរាប់បន្ថែមថា «ទោះបីជាវាលំបាកយ៉ាងណាក៏ដោយ ក៏គ្រប់គ្នានៅតែរីករាយជាមួយខ្ញុំ ដើម្បីទៅយកប្រពន្ធរបស់ខ្ញុំ ។ ខ្ញុំសូមអរគុណយ៉ាងជ្រាលជ្រៅទៅដល់អ្នកមានគុណទាំងសងខាង រួមទាំងបងប្អូនសាច់ញាតិ ក៏ដូចជា មិត្តភក្តិរបស់ខ្ញុំ ដែលបានតស៊ូចូលរួមក្នុងថ្ងៃដ៏ពិសេសសម្រាប់ជីវិតរបស់ខ្ញុំ» ។
កូនកម្លោះបង្ហើបថា តាមពិតខ្លួនខ្ញុំក៏ពិបាកចិត្តបន្តិចដែរ ពេលរៀបការនៅថ្ងៃលិចទឹក ប៉ុន្តែក្នុងថ្ងៃរៀបការខ្ញុំមានអារម្មណ៍ពួកខ្ញុំមានសំណាងណាស់ ព្រោះពិធីបានប្រព្រឹត្តទៅដោយរលូន ។ យ៉ាងណាក៏ដោយ ដោយសារតែផ្ទះកូនក្រមុំ ត្រូវទឹកជំនន់ជន់លិចជ្រៅពេកពួកគេគ្រាន់តែរៀបចំតែពិធីមង្គលការតាមប្រពៃណីពេលព្រឹកប៉ុណ្ណោះ ដោយពិធីជប់លៀងទទួលភ្ញៀវនៅពេលល្ងាចត្រូវរៀបចំនៅផ្ទះខាងកូនកំលោះនៅស្រុក Yen Phong ខេត្ត Bac Ninh ដែលមិនត្រូវបានទឹកលិច ។
សូមជម្រាបថា កម្រងរូបថតនៃពិធីមង្គលការក្នុងទឹកជំនន់មួយនេះ ត្រូវបានបង្ហោះដោយអ្នកថតរូបវ័យក្មេង Pham Chi Ba នៅខេត្ត Bac Ninh ដែលលោកជាអ្នកផ្តិតយករូបភាពទាំងនោះដោយផ្ទាល់ ។ អ្នកថតរូប Pham Chi Ba បាននិយាយថា ក្នុងរយៈពេល៣ឆ្នាំនៃអាជីពថតរូបរបស់ខ្លួន វា គឺជាលើកទីមួយហើយដែលលោកបានថតរូបអាពាហ៍ពិពាហ៍នៅក្នុងទឹកជំនន់បែបនេះ ។ Pham Chi Ba បានប្រាប់ពីអារម្មណ៍របស់ខ្លួនថា «ថតរូបក្នុងទឹកជំនន់ ខ្ញុំពិតជាបារម្ភពីការងារ និងអាណិតទៅកូនកម្លោះកូនក្រមុំ ។ ដូចនេះហើយ ខ្ញុំបានព្យាយាមឱ្យអស់ពីសមត្ថភាព ដើម្បីផ្តិតយករូបភាពដែលស្រស់ស្អាត និងគួរឱ្យចងចាំបំផុតសម្រាប់គូស្នេហ៍វ័យក្មេង» ៕
ចែករំលែកព័តមាននេះ