បើរដ្ឋាភិបាលថៃថ្មីរបស់លោកស្រី ផៃថងថាន ស៊ីណាវ៉ាត្រា មានលំនឹងហើយអាចបន្តអាយុកាលគ្រប់រហូតដល់ការបោះឆ្នោតអាណត្តិក្រោយបន្ត រឿងដែលថៃអាចនឹងដាក់គោលដៅអាទិភាព នៅក្នុងការជំរុញទំនាក់ទំនងជាមួយនឹងកម្ពុជា គឺចាំបាច់បំផុត គឺពាក់ព័ន្ធនឹងគម្រោងថាមពលរួមគ្នា នៅតំបន់ត្រួតស៊ីគ្នានៅឈូងសមុទ្រថៃ ហើយថៃក៏អាចនឹងសើររើ…
បើរដ្ឋាភិបាលថៃថ្មីរបស់លោកស្រី ផៃថងថាន ស៊ីណាវ៉ាត្រា មានលំនឹងហើយអាចបន្តអាយុកាលគ្រប់រហូតដល់ការបោះឆ្នោតអាណត្តិក្រោយបន្ត រឿងដែលថៃអាចនឹងដាក់គោលដៅអាទិភាព នៅក្នុងការជំរុញទំនាក់ទំនងជាមួយនឹងកម្ពុជា គឺចាំបាច់បំផុត គឺពាក់ព័ន្ធនឹងគម្រោងថាមពលរួមគ្នា នៅតំបន់ត្រួតស៊ីគ្នានៅឈូងសមុទ្រថៃ ហើយថៃក៏អាចនឹងសើររើ គម្រោងអភិវឌ្ឍន៍តំបន់ត្រីកោណកម្ពុជា ថៃ និងឡាវផងដែរ ។
គោលនយោបាយពាណិជ្ជកម្ម សេដ្ឋកិច្ច ការទូត ពលករឥន្តោប្រវេសន៍ ការតភ្ជាប់សេដ្ឋកិច្ច ទេសចរណ៍ គឺជារឿងដែលកម្ពុជា និងថៃ កំពុងតែធ្វើស្រាប់ ហើយរដ្ឋាភិបាលថៃបានបន្តជាមួយកម្ពុជាជាបន្តបន្ទាប់ ហើយនឹងបន្តធ្វើទៅមុខថែមទៀត ប៉ុន្តែរឿងពីរខាងលើអាចជាគម្រោងថ្មីដែលថៃនឹងបន្ត នៅក្នុងគោលដៅ អាទិភាព ពីព្រោះវា គឺជាគោលដៅដែលលោក ថាក់ស៊ីន ស៊ីណាវ៉ាត្រា ដែលជាអ្នកដែលមានឥទ្ធិពលរបស់ រដ្ឋាភិបាលថៃប៉ងតាំងពីសម័យលោកនៅជានាយករដ្ឋមន្ត្រីថៃ មុនរដ្ឋប្រហារបណ្តេញលោកចេញពីដំណែងនៅក្នុងឆ្នាំ២០០៦ ។
រដ្ឋបាលថៃថ្មីទី២ ដែលកើតពីការបោះឆ្នោតនៅខែឧសភា ឆ្នាំ២០២៣ បានចាប់កំណើតជាផ្លូវការ កាលពីថ្ងៃទី០៦ ខែកញ្ញា ឆ្នាំ២០២៤ ខណៈដែលរដ្ឋបាលចាស់ស្លា.ប់ពេលចាប់កំណើតជិត១ឆ្នាំ ។ ភាគច្រើនរដ្ឋបាលថ្មីនេះ គឺភាគច្រើនជាសមាសភាពដដែលគ្រាន់តែប្តូរក្បាល ប៉ុន្តែទោះបីជាយ៉ាងណាក៏ដោយចក្ខុវិស័យនៃការដឹកនាំប្រហែលជាចេញមកពីប្រភពតែមួយ ដូច្នេះហើយគោលដៅអទិភាពនៃនយោបាយ ការបរទេសថៃចំពោះកម្ពុជាទំនងជាមិនប្រែប្រួលធំដុំឡើយ ។
គោលនយោបាយពាណិជ្ជកម្ម សេដ្ឋកិច្ច ការទូត ពលករឥន្តោប្រវេសន៍ ការតភ្ជាប់សេដ្ឋកិច្ច ទេសចរណ៍ គឺជារឿងទំនាក់ទំនងជាប្រពៃណី ដែលថៃធ្វើជាមួយនឹងកម្ពុជាជាប្រចាំ សូម្បីតែក្នុងអំឡុងពេលដែលថៃដឹកនាំដោយរដ្ឋាភិបាលបង្កជម្លោះនៅតំបន់ព្រំដែន២០០៨ ដល់២០១១ ក៏ដោយ ប៉ុន្តែរឿងមួយចំនួន ដែលអាក់ខានហើយ ភាគីទាំងពីរធ្លាប់ជជែកគ្នានោះ គឺរឿងពាក់ព័ន្ធនឹងគម្រោងថាមពលរួមគ្នា នៅតំបន់ត្រួតស៊ីគ្នា នៅឈូងសមុទ្រថៃ ហើយនឹងការសើររើគម្រោងអភិវឌ្ឍន៍តំបន់ត្រីកោណកម្ពុជា ថៃ និងឡាវផងដែរ ។
នៅក្នុងចំណោមគម្រោងទាំងពីរសំខាន់ៗនេះ រឿងគម្រោងថាមពលរួមគ្នានៅតំបន់ត្រួតស៊ីគ្នា នៅឈូងសមុទ្រថៃ គឺកម្ពុជា និងថៃបង្ហើបច្បាស់បំផុត ជាពិសេស គឺនៅក្នុងអំឡុងពេលដែលសម្តេចធិបតី ហ៊ុន ម៉ាណែត ទៅបំពេញទស្សនៈកិច្ចថៃ កាលពីខែកុម្ភៈ ឆ្នាំ២០២៤ នៅពេលដែលសម្តេច និងលោក សេដ្ឋា ថាវេស៊ីន នៅកាលជានាយករដ្ឋមន្ត្រីបានប្រកាសភាពជាដៃគូយុទ្ធសាស្ត្រ ដើម្បីជំរុញកិច្ចសហប្រតិបត្តិការឱ្យកាន់តែជិតស្និទ្ធ ដើម្បីសន្តិភាព និងការអភិវឌ្ឍរួមរវាងប្រទេសទាំងពីរ ។
ក្នុងជំនួបទ្វេភាគីនៅវិមានរដ្ឋាភិបាល នាយករដ្ឋមន្ត្រីទាំងពីរបានពិភាក្សាគ្នាយ៉ាងទូលំទូលាយអំពីបញ្ហាទ្វេភាគី និងតំបន់ដែលមានផលប្រយោជន៍ទៅវិញទៅមក ។ ពួកគេបានឯកភាពលើកកម្ពស់ទំនាក់ទំនងថៃ-កម្ពុជា ទៅជាភាពជាដៃគូយុទ្ធសាស្ត្រ ដើម្បីបើកឱកាសថ្មីសម្រាប់ប្រទេសទាំងពីរធ្វើការកាន់តែជិតគ្នាក្នុងសក្តានុពលពេញលេញ ហើយជាពិសេស គឺគម្រោងថាមពលពាក់ព័ន្ធនឹងប្រេង និងឧស្ម័ននៅតំបន់ត្រួតស៊ីគ្នា ដែលមានវិសាលភាពប្រមាណជា២៧.០០០ គីឡូមែត្រការ៉េ ។
ដោយឡែករឿងតំបន់អភិវឌ្ឍន៍ត្រីកោណរួមគ្នាជាមួយនឹងកម្ពុជា-ឡាវ-ថៃ ដែលមានការពិភាក្សា និងលើកឡើង កាលពីអំឡុងដើមទស្សវត្សរ៍នៃឆ្នាំ២០០០ មិនច្បាស់នឹងចំមុខទេតែមានមានការបញ្ឆិតបញ្ឆៀងខ្លះៗ។
ពាក់ព័ន្ធនឹងរឿងនេះ សារព័ត៌មាន និងខាងបណ្ឌិតសភាថៃក៏បានបង្ហើបខ្លះៗដែរ ហើយនៅចាំបានថា សម្តេចតេជោ ហ៊ុន សែន ក៏ធ្លាប់បង្ហើបត្រួសៗខ្លះដែរអំពីបញ្ហានេះ ។ អ្វីដែលថៃលើកឡើងបញ្ឆិតបញ្ឆៀង កន្លងមក គឺការប៉ុនប៉ុងផ្តួចផ្តើមឲ្យមានការបើកព្រំដែន នៅប្រាសាទព្រះវិហារ ដែលបានបិទនៅពេលមាន បញ្ហាព្រំដែនរហូតដល់ការផ្ទុះអាវុធជាដើម ។
ក្រៅពីរឿងជាប្រពៃណីខាងលើ បញ្ហមួយចំនួនអាចរបស់កម្ពុជា និងថៃ ប្រហែលជានឹងធ្វើដែរនោះ គឺបញ្ហាការជំរុញការតភ្ជាប់ផ្លូវរថភ្លើងទៅថៃដែលមិនទាន់អាចតភ្ជាប់ការចូលរួមនៅក្នុងយុទ្ធសាស្ត្រ CLEAR Sky ជាមួយប្រទេសថៃ ឡាវ និងមីយ៉ាន់ម៉ា ដើម្បីពង្រឹងកិច្ចសហប្រតិបត្តិការក្នុងតំបន់។ល។
គោលបំណងនៃគោលនយោបាយថៃទាំងនេះនឹងត្រូវរដ្ឋបាលលោកស្រី ថៃថងថាន នឹងធ្វើជាជំហាន នៅពេលដែលលោកស្រីអាចដោះសាយបញ្ហាផ្ទៃក្នុង បានច្បាស់លាស់ ជាពិសេស គឺពាក់ព័ន្ធនឹងបញ្ហានៃការស្រុតចុះនៃសេដ្ឋកិច្ចរបស់រាជាណាចក្រនេះដែលបានទទួលតាំងពីការរីករាយកដាលនៃកូវីដ១៩ ការកើនឡើងនៃបំណុលគ្រួសារ បញ្ហានៃការជំរុញសេដ្ឋកិច្ចតាមគម្រោងចែកប្រាក់ទៅពលរដ្ឋដែលគណបក្ស ភឿថៃបានសន្យាធ្វើ តែរដ្ឋបាលមុននៅមិនទាន់អាចដោះស្រាយ ការពង្រឹង និងជំរុញទេសចរណ៍ ការទប់ស្កាត់នឹងការដួលរលំនៃតួនាទីស្នូលរបស់ថៃ នៅក្នុងការរក្សាតួនាទីខ្លួន ជាមជ្ឈមណ្ឌលនៃសហគ្រាសខ្នាត តូចនិងមធ្យម ដែលកំពុងតែជួបខ្យល់ព្យុះនៃការហូរចូលទំនិញថោកៗពីចិន ។ ល។
សរុបសេចក្តីទៅ នៅក្នុងករណីលោកស្រី ផៃថងថាន អាចដឹកនាំមានស្ថេរភាព ហើយអាចទប់ទល់នឹងចរន្ត នៃឥទ្ធិពលយោធានិយមក៏ដូចជា និន្នការសង្គម និងតម្រូវការនៅក្នុងប្រទេសថ្មីៗបាននោះច្បាស់ថា គោលនយោបាយទាំងនេះនឹងមកដល់កម្ពុជា ប៉ុន្តែនៅពេលនេះគេមិនទាន់ដឹងថា តើស្ថានភាពវានឹងយ៉ាងណានៅឡើយ ពីព្រោះក្រុមអ្នកតាមដានសភាពការណ៍បានឲ្យដឹងថា ក្រុមអ្នកប្រឆាំងនឹងគណបក្សភឿថៃ និងក្រុមចម្រុះបានកំពុងតែឃ្លាំមើលឥរិយាបទរបស់លោក ថាក់ស៊ីន ស៊ីណាវ៉ាត្រា ហើយនៅពេលដែល ពួកគេរកបានភស្តុតាងថា លោកនៅពីក្រោយខ្នងការសម្រេចចិត្តណាមួយនៃរដ្ឋាភិបាលថ្មីនេះ រដ្ឋាភិបាល នេះអាចនឹងរង្គោះរង្គឺជាថ្មីទៀតមិនខាន៕
ចែករំលែកព័តមាននេះ